ကေအိုင်အေ ပြန်လွှဲပေးမည့် တပ်မတော်သားစာရင်း အစိုးရထံရောက်ပြီ

ကေအိုင်အိုထံသို့ အကြောင်းအမျိုးမျိုးဖြင့် ရောက်ရှိနေသော တပ်မတော်သား ၂၇ ဦးအား အစိုးရ ထံသို့ ပြန်လည်လွှဲပြောင်းပေးနိုင်ရေးအတွက် ၈၈ မျိုးဆက်ကျောင်းသားများမှတစ်ဆင့် အမည် စာရင်းပေး ပို့လိုက်ကြောင်း သိရသည်။

ဇန်နဝါရီ ၇ ရက်နေ့တွင် Myanmar Peace Center မှ ငြိမ်းချမ်းရေးကျွမ်းကျင် ပညာရှင် ဒေါက်တာ မင်းဇော်ဦးထံသို့ တပ်သား ၂၇ ဦး၏စာရင်း ရောက်ရှိ ခဲ့ကြောင်း ၄င်းက အတည်ပြုသည်။
ပြည်ထဲရေး၊ကာကွယ်ရေးနှင့် အခြား သက်ဆိုင်ရာဝန်ကြီး ဌာနအသီးသီးသို့ အဆိုပါစာရင်းကို ပေးပို့ လိုက် ပြီဖြစ်ကြောင်း ဒေါက်တာမင်းဇော်ဦးက ပြော သည်။

''စာရင်းအရ အရာရှိအဆင့် မပါ ပါဘူး။ တပ်သားအဆင့်တွေ ချည်းပါပဲ။ အဲဒီအတွက် အစိုးရဘက်ကနေပြီး ဘယ်လိုဆက်လက် ဆောင်ရွက်သွား မယ်ဆိုတာကိုတော့ ကျွန်တော်က တာဝန်ရှိသူမဟုတ်လို့ မပြောနိုင် ပါဘူး''ဟု အထက်ပါပုဂ္ဂိုလ်က ဆက်ပြောသည်။

ကေအိုင်အိုဘက်မှလည်း တပ်မတော်သားများ ပြန်လည်လွှတ်ပေးရန် အတွက် သက်ဆိုင်ရာဌာနများသို့ အကြောင်းကြားသွားမည့်အပြင် အဆိုပါ တပ်သား များ လုံခြုံမှုရှိရေးအတွက်ကိုပါ စီစဉ်ပြီးမှ ပြန်လည် လွှတ်ပေး မည်ဖြစ်ကြောင်း ကေအိုင်အိုပြောခွင့်ရဦးလနန်က ပေါ်ပြူလာ နယူးစ်သို့ပြော သည်။

ငြိမ်းချမ်းရေးကျွမ်းကျင်ပညာရှင် ဦးမင်းဇော်ဦးက ကေအိုင်အေဘက်သို့ ရောက်ရှိနေသည့် တပ်မတော် သားများအား ပြန်လည် လွှတ်ပေးခြင်းသည် နှစ်ဖက် ငြိမ်းချမ်းရေး ဖော်ဆောင်ရာတွင် ကောင်းမွန် သည့် ဘက်သို့ ဦးတည်နေကြောင်း သုံးသပ်သည်။

၂ဝ၁၂ ခုနှစ် မေလနှင့် ဇွန်လများက သမ္မတရုံး ပြည်ထောင်စုဝန်ကြီး ဦးအောင်မင်းနှင့် ကေအိုင်အေ စစ်ဦးစီးချုပ် ဗိုလ်ချုပ်ဂွမ်မော် တို့တွေ့ဆုံကြစဉ် ကေအိုင်အိုဘက်က ၄င်းတို့ထံတွင် ရောက်ရှိနေ သည့် စစ်သားများ ပြန်လည်လွှတ်ပေးမည် ဆိုသည့်အကြောင်း ကမ်းလှမ်းခဲ့ခြင်းအပေါ် ဦးအောင်မင်းက အကြိမ်ကြိမ် ဆက်သွယ်ခဲ့သော်လည်း ကေအိုင်အို ဘက်မှ လွှဲပြောင်း ပေးအပ်ခြင်းမရှိခဲ့ကြောင်း ငြိမ်းချမ်းရေးအကျိုးဆောင် တစ်ဦးက ပြောသည်။


Popular Myanmar News Journal