အကြမ်းဖက် သမားများက နိုင်ငံခြား ခရီးသွားများအား ဦးတည်တိုက်ခိုက်မှု မဖြစ်စေရန် လုံခြုံရေးတိုးမြှင့်

ယခုနှစ် မေလအတွင်းက  အင်းလေးကန်သို့ လာရောက် လည်ပတ်ကြသော နိုင်ငံခြား ခရီးသွား ဧည့်သည် များကို တွေ့ရစဉ် (ဓာတ်ပုံ-အောင်မျိုးသန့်)

မြန်မာနိုင်ငံအတွင်း နိုင်ငံခြား ခရီးသွား ဧည့်သည်များအား အကြမ်းဖက် သမားများက ဦးတည်တိုက်ခိုက်မှု မပြုလုပ်စေရန် လုံခြုံရေးကို တိုးမြှင့်ဆောင်ရွက် လျက်ရှိနေကြောင်း နိုင်ငံခြား ခရီးသွားဧည့်သည် အများ ဆုံး ၀င်ရောက်သည့် ဒေသအချို့နှင့် နိုင်ငံခြား ခရီးသွား ဧည့်သည် စောင့်ရှောက်ရေး ရဲတပ်ဖွဲ့မှူးရုံးမှ စုံစမ်း သိရသည်။

ယခုနှစ်ပိုင်းအတွင်း ကောလာဟလ အမျိုးမျိုး ထွက်ပေါ်နေခြင်း၊ ပြည်တွင်းသို့ နယ်စပ်ဝင်ပေါက်များမှ ၀င်ရောက်လာသည့် အကြမ်းဖက် ဖောက်ခွဲရေး သမားအချို့ကိုလည်း ဖမ်းမိနေခြင်းနှင့် ပဋိပက္ခ ဖြစ်စဉ်များ ဆက်တိုက်ဖြစ်ပွား နေခြင်းကြောင့် နိုင်ငံခြား ခရီးသွား ဧည့်သည်များ၏ လုံခြုံရေးကိုလည်း ပိုမို တိုးမြှင့် ဆောင်ရွက်နေခြင်း ဖြစ်ကြောင်း သိရသည်။

မြန်မာနိုင်ငံ ရဲတပ်ဖွဲ့ဌာနချုပ်၊ နိုင်ငံခြားသား ခရီးသွား စောင့်ရှောက်ရေး ရဲတပ်ဖွဲ့မှူးရုံးမှ တပ်ဖွဲ့မှူး ရဲမှူးကြီး မျိုးမင်းဦးက ''ကျွန်တော်တို့ တပ်ဖွဲ့အနေနဲ့က နိုင်ငံတစ်ခုလုံး ကိုတော့ သက်ရောက်မှု မရှိသေး ဘူး။ ဒါပေမဲ့ နိုင်ငံခြား ခရီးသည် အများအပြား ၀င်ရောက်နေတဲ့ ဒေသတွေမှာတော့ လုံခြုံရေးကို ထိရောက် စွာ ဆောင်ရွက်နေတယ်။ အဲဒီဒေသ တွေမှာလည်း နိုင်ငံခြားသား ခရီးသွား ဧည့်သည်တွေ လုံခြုံရေး အတွက် သက်ဆိုင်ရာ နယ်မြေခံ ရဲတပ်ဖွဲ့တွေနဲ့ ပူးပေါင်းပြီးတော့ ဆောင်ရွက်နေတယ်။ အခုလက်ရှိ အချိန်မှာ နိုင်ငံခြားခရီးသွား ရဲတပ်ဖွဲ့ကို ဖွဲ့စည်းတာ မကြာသေးတဲ့အတွက် လိုအပ်မှုတွေ ကို နိုင်ငံ တကာမှာ ဆောင်ရွက်နေတဲ့ အခြေအနေတွေကို လေ့လာနေတယ်။ တိုးချဲ့ပြီးတော့ ဆောင်ရွက် သွားမယ်'' ဟု ဆိုသည်။

နိုင်ငံခြား ခရီးသွား ဧည့်သည်များ၏ လုံခြုံရေးကို လစ်ဟာမှု မရှိစေရန် ပြည်နယ်နှင့် တိုင်းဒေသကြီး အချို့တွင် ရဲတပ်ဖွဲ့မှ ဦးစီးပြီး ဟောပြောပွဲများနှင့် သတင်းအမြန်အဆန် ရရှိရေး အတွက် ခေါ်ယူဆွေးနွေး မှုများ ပြုလုပ်လျက် ရှိကြောင်း သိရသည်။

''ကျွန်တော်တို့ရဲ့ ဒေသက ခရီးသွား အများအပြား လာရောက်နေတဲ့ ဒေသတစ်ခု ဖြစ်ပါတယ်။ အဲဒါကြောင့် ရဲတပ်ဖွဲ့အနေနဲ့ လှည့်ကင်းပတ်ကင်းတွေကို နေ့တိုင်းဆောင်ရွက်တယ်။ ရှိတဲ့အင်အားနဲ့ အပြည့်အ၀ လုံခြုံရေး ဆောင်ရွက်ဖို့ အခက်အခဲတွေ ရှိတဲ့အတွက် ရပ်ကွက်အလိုက် ရာအိမ်မှူးတွေ၊ ဆယ်အိမ်မှူးတွေ ကို ခေါ်ယူပြီးတော့ နိုင်ငံခြား ခရီးသွား ဧည့်သည်တွေ တစ်ခုခုဖြစ်တာနဲ့ အမြန်ဆုံး သတင်းပေးပို့ဖို့ သြဂုတ် ၂၅ ရက်က အစည်းအဝေး ခေါ်ယူပြီးတော့ ပြောထားတယ်။ ပြီးခဲ့တဲ့ရက်က ဆိုရင် နိုင်ငံခြား ခရီးသွားဧည့်သည် နှစ်ဦးက လမ်းဘေးမှာပဲ အိပ်မယ်ဆိုပြီး လုပ်နေတဲ့အတွက် ဟိုတယ်ကို လိုက်ပို့ခဲ့ ရတဲ့ ဖြစ်စဉ်တွေရှိတယ်။ သူတို့နဲ့ ပတ်သက်ပြီးတော့ မှုခင်းနဲ့ဆက်စပ်တဲ့ ဖြစ်စဉ်တွေသာ မကဘူး။ ကျန်းမာရေး ကိစ္စတွေကိုလည်း ကူညီဆောင်ရွက် ပေးနေပါတယ်'' ဟု ရှမ်းပြည်နယ် ညောင်ရွှေမြို့မ ရဲစခန်းမှ ရဲတပ်ဖွဲ့မှူး ရဲမှူးကြီးမြင့်က သြဂုတ် ၂၆ ရက် နံနက်ပိုင်းက ဆိုသည်။

Eleven Media Group