ဖာချယ် ကျေးရွာအုပ်ချုပ်ရေးမှူးကို RCSS/SSA က ဖမ်းဆီးခြင်း မဟုတ်ကြောင်း တရားဝင်ငြင်း

ရှမ်းပြည်နယ်အရှေ့ပိုင်း မိုင်းတုံမြို့နယ် ဖာချယ်ကျေးရွာအုပ်စု အုပ်ချုပ်ရေးမှူး ဦးတင်အောင်ကို ဧပြီလ ၁၉ ရက် ည ၈ နာရီခွဲခန့်က အမည်မသိ လက်နက်ကိုင် လူအင်အား ငါးယောက်က နေအိမ်တွင် လာရောက် ခေါ်ဆောင်သွားမှုတွင် RCSS/SSA အနေနှင့် လုံးဝပတ်သက်ခြင်း မရှိသည်ကို ရှမ်းပြည် ပြန်လည်ထူထောင်ရေးကောင်စီ ဗိုလ်မှူးချုပ်စိုင်းလူးက ရှမ်းပြည်နယ်အစိုးရထံ တရားဝင် စာပို့ ငြင်းဆိုလိုက်ကြောင်း RCSS/SSA မိုင်းတုံ ဆက်ဆံရေးရုံး တာဝန်ခံ ဗိုလ်ကြီးစိုင်းလွန့်ဆန် က ပြောကြားသည်။

ရှမ်းပြည်ပြန်လည်ထူထောင်ရေး ကောင်စီ ဆက်ဆံရေးရုံးများ ကွပ်ကဲရေးဌာန ဆက်ဆံရေးမှူးချုပ် ဗိုလ်မှူးချုပ် စိုင်းလူးက ဧပြီ ၂၂ ရက်နေ့စွဲဖြင့် ရှမ်းပြည်နယ်အစိုးရ လုံခြုံရေးနှင့် နယ်စပ်ရေးရာ ဝန်ကြီးဌာန ဝန်ကြီး ဗိုလ်မှူးကြီး အောင်သူထံသို့ တရားဝင် အကြောင်းပြန်ကြားစာ ပေးပို့ခဲ့ခြင်း ဖြစ်ကြောင်း ၎င်းက ဆက်လက် ပြောကြားသည်။
ကျေးရွာအုပ်ချုပ်ရေးမှုးကို ဖမ်းဆီးခေါ်ဆောင်သွားခြင်းနှင့် ပတ်သက်၍ တာချီလိတ် ဗျူဟာမှူး ဗိုလ်မှူးကြီး ကျော်စွာလင်း၏ ပြောပြချက်အရသာ သိရပြီး SSA တပ်ဖွဲ့ဝင်များ ဖမ်းဆီးခေါ်ဆောင် သွားခြင်း ဖြစ်ပါက အမြန်ဆုံး လွှတ်ပေးရန် တောင်းဆိုသဖြင့် ယင်းသို့ တရားဝင် အကြောင်းပြန်ကြား ရခြင်း ဖြစ်ကြောင်း ရှမ်းပြည်နယ် အစိုးရအဖွဲ့ထံ ပေးပို့သည့် စာအရ သိရသည်။
RCSS/SSA အနေနှင့် နိုင်ငံတော်အစိုးရနှင့် မိမိတို့အကြား ငြိမ်းချမ်းရေး ဖော်ဆောင်နေချိန်တွင် မိမိတို့ အောက်ခြေတပ်များကို ဥပဒေမဲ့ လုပ်ရပ်များ မကျူးလွန်မိစေရန် တင်းတင်းကျပ်ကျပ် တားမြစ်ထားပါကြောင်း သို့ဖြစ်ပါ၍ ယခုဖြစ်ရပ်တွင် မိမိတို့ အဖွဲ့အစည်းနှင့် လုံးဝပတ်သက်မှု မရှိကြောင်းနှင့် အဖြစ်မှန် ပေါ်ပေါက်ရေးအတွက် အစိုးရနှင့် လက်တွဲ ဆောင်ရွက် သွားမည် ဖြစ်ကြောင်း ဖော်ပြပါရှိပြီး ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်း ကော်မတီ ဒုဥက္ကဋ္ဌ ဦးအောင်မင်းနှင့် အဖွဲ့ဝင် ဦးခင်မောင်စိုး၊ RCSS/SSA ဆက်ဆံရေးရုံးများ၊ မြန်မာ့ငြိမ်းချမ်းရေးစင်တာ (Myanmar Peace Center) တို့သို့ မိတ္တူပေးထားကြောင်း အဆိုပါစာတွင် ဖော်ပြထားသည်။
“မိုင်းတုံဗျူဟာနဲ့လဲ အဖြစ်မှန် ပေါ်ပေါက်ရေး လက်တွဲ ဆောင်ရွက်နေပါတယ်။ အရပ်ဝတ်တွေ၊ မျက်နှာဖုံးတွေနဲ့ ရုပ်ဖျက်ထားတယ် ဆိုတော့ SSA လို့ ပြောမရပါဘူး။ ကျွန်တော်တို့ လှုပ်ရှားတပ်ဖွဲ့တွေက ယူနီဖောင်း အပြည့်အစုံနဲ့သာ လုပ်ငန်းတာဝန် ဆောင်ရွက်နေကြပါ” ဟု မိုင်းတုံ-မိုင်းဆတ် ဆက်ဆံရေး တာဝန်ခံက ဆိုသည်။
ဖမ်းဆီးခေါ်ဆောင်သွားသည့် အဖွဲ့နှင့် မည်သည့် အကြောင်းကြောင့် ဖမ်းဆီး ခေါ်ဆောင်သွားသည်ကို ယခုအချိန်အထိ မသိရကြောင်း၊ မည်သည့် ဆက်သွယ်လာမှုမှလည်း မရှိကြောင်း ဖမ်းဆီး ခေါ်ဆောင် သွားခံရသူ ဦးတင်အောင်၏ မိသားစုက ဆိုသည်။
“ရှေ့မှာ ဆန် ၂ ပုံးတောင်းတာလဲ ပေးပြီးပါပြီ။ သစ်ခုတ်ချိန်းဆောဖိုးတွေ ကောက်ပေးဖို့ လာပြောတာတော့ သူက ငြင်းလိုက်တယ်။ တရားမဝင် သစ်ခုတ်တာလဲ အားမပေးဘူး။ တရားမဝင် ဆက်ကြေးတောင်းတာလဲ ကောက်မပေးဘူးနိုင်ဘူး။ ငြင်းလိုက်တယ်လို့ ကိုတင်အောင် အဖမ်းမခံရခင်က ကျွန်တော့်ကို ပြောဖူးတယ်” ဟု ဦးတင်အောင်နှင့် ဆွေမျိုးတော်စပ်သူ တစ်ဦးက ဆိုသည်။
SSA လက်နက်ကိုင် အဖွဲ့များက တရားမဝင် သစ်ခုတ်သူများထံမှ ချိန်းဆောတစ်လုံးလျှင် ထိုင်းဘတ်ငွေ နှစ်သောင်းမှ သုံးသောင်းအထိ တစ်နှစ်စာအတွက် တောင်း ခံနေကြောင်း၊ ပေးပြီးသူ များကို ဖြတ်ပိုင်းများ ပြန်လည်ပေးအပ်ပြီး ၎င်းတို့ စစ်ဆေးပါက ပြသရကြောင်း ဒေသခံများထံမှ စုံစမ်းသိရှိရသည်။
ယခုနှစ်ဆန်းပိုင်းကပင် ဆက်ကြေး ကောက်ခံမှုနှင့် ပတ်သက်၍ ရှမ်းပြည်နယ် အတွင်း စီးပွားရေး လုပ်ကိုင်သည့် ကုမ္ပဏီများနှင့် လုပ်ငန်းရှင်များထံကသာ အကူအညီ ရယူမည် ဖြစ်ပြီး လူထုထံက ကောက် ယူမှုမည် မဟုတ်ဟု RCSS/SSA မှ လူထုထံ သတင်းတစ်ရပ် ထုတ်ပြန်ထားကြောင်း ဒေသခံများက ဆိုသည်။
“သစ်ခုတ်တာကလဲ တရားမဝင်၊ ဆက်ကြေး တောင်းတာလဲ တရားမဝင်၊ ပြီးတော့ အရေးယူ ဆောင်ရွက်ဖို့ ကလဲ လက်နက်ကိုင် အဖွဲ့အစည်းကြီး ဆိုတော့ တပ်မတော်နဲ့ နိုင်ငံတော်အဆင့်ကပဲ ဆောင်ရွက်နိုင်စွမ်း ရှိမှာ ဖြစ်ပါတယ်” ဟု သစ်တောဝန်ထမ်းများနှင့် ရဲတပ်ဖွဲ့ဝင်များက ဆိုသည်။
RCSS သည် ပြည်ထောင်စုအဆင့် အပစ်အခတ်ရပ်စဲရေးအား အစိုးရနှင့် လက်မှတ်ရေးထိုးထားသည့် အဖွဲ့ဖြစ်သည်။

The Voice Weekly