အမျိုးသား ပြန်လည်စည်းလုံး ညီညွတ်ရေးနှင့် ဒီမိုကရေစီ အသွင်ကူးပြောင်းရေး လုပ်ငန်းစဉ်များတွင် အားလုံး ပါဝင်နိုင်ရန် အမျိုးသားကာကွယ်ရေးနှင့် လုံခြုံရေးကောင်စီ၏ ထောက်ခံချက်နှင့် အထွေထွေ လွတ်ငြိမ်းချမ်းသာခွင့် ဆက်လက် ထုတ်ပြန်ပေးရန် နိုင်ငံတော်သမ္မတသို့ တိုက်တွန်းသည့် သင်္ဃန်းကျွန်းမြို့နယ် ပြည်သူ့လွှတ်တော် ကိုယ်စားလှယ် ဦးသိန်းညွန့်၏ အဆိုကို ပြည်သူ့လွှတ်တော်က ဆိုင်းငံ့လိုက်ကြောင်း ဥက္ကဋ္ဌ သူရဦးရွှေမန်းက ကြေညာသည်။
နေပြည်တော် ပြည်သူ့လွှတ်တော် အဆောက်အအုံ၌ မေလ ၂၉ ရက်နေ့က ကျင်းပသော ပထမအကြိမ် ပြည်သူ့လွှတ်တော် ဒဿမ ပုံမှန်အစည်းအဝေး ဒုတိယနေ့ အစီအစဉ်တွင် ယင်းသို့ ဆိုင်းငံ့လိုက်ခြင်း ဖြစ်သည်။
“ဒီအဆိုကို Sky-net က တစ်ဆင့် အကျဉ်းကျခံနေရသူတွေ သူတို့ မိသားစုတွေက အကြီးအကျယ် မျှော်လင့်နေမှာ” ဟု ဦးသိန်းညွန့်က ဆိုသည်။
သို့သော် အမျိုးသားကာကွယ်ရေးနှင့် လုံခြုံရေးကောင်စီဝင်လည်း ဖြစ်သူ ပြည်သူ့လွှတ်တော်ဥက္ကဋ္ဌ သူရဦးရွှေမန်း က ယင်းအဆိုကို လွှတ်တော် အစီအစဉ်များအတွင်း ထည့်သွင်းသည် ကိုပင် ကျေးဇူးတင်ကြောင်း၊ လွှတ်တော် အစီအစဉ်တွင် ပါဝင်ပြီး ဖြစ်သည့်အတွက် မလွဲမသွေ ဆွေးနွေးရမည် ဖြစ်ကြောင်း ၎င်းက ထပ်လောင်း ပြောကြားသည်။
နိုင်ငံတော်သမ္မတက လမ်းညွှန် ဖွဲ့စည်းထားသော လက်ကျန်နိုင်ငံရေး အကျဉ်းသားများ စိစစ်ရေး ကော်မတီဝင်လည်း ဖြစ်သူ ဦးသိန်းညွှန့်က ယခုအဆိုကို အကျဉ်းထောင်များအတွင်း ကျန်ရှိနေသော နိုင်ငံရေးအကျဉ်းသားဟု ယူဆရသူများ၊ နိုင်ငံရေးအကျဉ်းသား မဟုတ်သော်လည်း နိုင်ငံတော် တာဝန်ကို ထမ်းဆောင်ခဲ့သူများ ပြန်လည် လွတ်မြောက်လာရေးအတွက် နဝမအကြိမ် ပြည်သူ့လွှတ်တော် အစည်းအဝေးများ ကျင်းပနေစဉ် ဇန်နဝါရီ ၇ ရက်နေ့ကတည်းက တင်သွင်းထားခြင်း ဖြစ်ကြောင်း ရှင်းပြသည်။
နိုင်ငံတော်သမ္မတ ဦးသိန်းစိန်က ၂၀၁၄ ခုနှစ် ဇန်နဝါရီလ ၃ ရက်နေ့တွင် အမိန့်အမှတ် (၁/၂၀၁၄) ဖြင့် နောက်ဆုံးအကြိမ် အထွေထွေ လွတ်ငြိမ်းချမ်းသာခွင့် ထုတ်ပြန်ပေးခဲ့ပြီး အကျဉ်းထောင်များ အတွင်း နိုင်ငံရေးအကျဉ်းသား မရှိဟု ကြေညာခဲ့သော်လည်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ကမူ နိုင်ငံရေးအကျဉ်းသားများ ကျန်ရှိနေသေးကြောင်း ပြောဆို ထားသည်။
The Voice Weekly
No comments:
Post a Comment