ကချင်ပြည်နယ်၊ ၀ိုင်းမော်ဒေသမှ တရုတ်နိုင်ငံဘက်သို့ တန်ပေါင်းများစွာသောသစ်များ တရားမ၀င်ခိုးထုတ် ရောင်းချမှုနှင့် ပတ်သက်၍ KIO/KIA အဖွဲ့မှဆက်နွယ်နေမှုအပေါ်တွင် ကေအိုင်အိုအနေဖြင့် ကိုယ်တိုင်သစ်ခုတ် ရောင်းချခြင်းမရှိပေမယ့် နယ်မြေဒေသဖွံ့ဖြိုးရေးအတွက် သစ်ထုတ်လုပ်ရောင်းချသူများကို ပါမစ်ပေးတာမျိုးရှိ ကြောင်း KIO ခေါင်းဆောင်ဟောင်းဒေါက်တာတူးဂျာမှ DVB သတင်းဌာနသို့ပြောကြားခဲ့သည်ဟုသိရှိရသည်။
“ တိုက်ရိုက်လုပ်တာတော့မရှိပါဘူး၊ ဖြတ်သန်းမှုပေါ်မှာ သစ်သယ်တဲ့ကားတွေကို ဂိတ်တွေမှာ အခွန်ကောက်ခံ တာတော့ရှိတာပေါ့။ တခါတလေ သူတို့အနေနဲ့ပါမစ်ပေးတာမျိုးရှိတယ်။ ပါမစ်ပေးတယ်ဆိုတာကလည်း ဒီဒေသ ဖွံ့ဖြိုးရေးအတွက်ပေါ့လေ၊ လမ်းလုပ်မယ်၊ တံတားလုပ်မယ်ဆိုလို့ရှိရင်တော့ ငွေလိုတယ်လေ။ အဲခါကျတော့ ပါမစ် ပေးတာတခါတလေရှိတယ်။ အများအားဖြင့်ကတော့ အခွန်ကောက်ခံတာလောက်ပါ။ သူတို့ကိုယ်တိုင် သစ်တွေ ခုတ်တင်ပို့ရောင်းချတာတွေကတော့သိပ်မရှိပါဘူး” ဟု ဒေါက်တာတူးဂျာကဒီဗွီဘီသို့ ပြောကြားခဲ့ကြောင်း သိရှိရ သည်။
ဇန်နဝါရီ ၂ ရက်မှ ၄ ရက်အထိ တပ်မတော်စစ်ကြောင်းများ နယ်မြေရှင်းလင်းဆောင်ရွက်ရာမှ မြန်မာနိုင်ငံ သား ၂၀ဦး၊ တရုတ်နိုင်ငံသား ၁၀၂ ဦး၊ စုစုပေါင်း ၁၂၂ ဦးနှင့် တရားမဝင် သစ်ခိုးထုတ်သည့် ကုန်တင်ယာဉ် ၄၅၅ စီး၊ တရုတ်ယွမ်ငွေ ၁၂,ဝဝဝ နှင့်အတူ မူးယစ်ဆေးဝါးအမြောက်အများကို ဖမ်းဆီးရရှိခဲ့ခြင်းဖြစ်ကြောင်း သိရှိရပြီး ဖမ်းဆီးရမိသောတရုတ်နိုင်ငံသားများထံမှ ကေအိုင်အေ စီးပွားရေးတာဝန်ခံ ဗိုလ်မှူးချုပ် ဇောဘုတ်ထန်း လက်မှတ် ရေးထိုးထားသော သစ်ထုတ်လုပ်ခွင့်ပြုသည့် စာရွက်စာတမ်းများအား သိမ်းဆည်းရရှိခဲ့ကြောင်းသိရသည်။
KIA အနေဖြင့် လမ်းတံတားများ ဆောက်လုပ်ရန်နှင့် နယ်မြေဖွံ့ဖြိုးမှုများ လုပ်နေသည်ဟုဆိုသော်လည်း ကချင် ပြည်နယ်တွင် KIA မှဆောက်လုပ်ပေးထားသည့် လမ်းများ၊ တံတားများတစ်ခုမှမရှိကြောင်း၊ ရှိပြီးသားလမ်း၊ တံတားများကိုတောင် ဖောက်ခွဲဖျက်ဆီးနေကြောင်း၊ ယခုလို သစ်ခိုးထုတ်မှုများကိုလည်း ဒီတစ်ကြိမ်မှသာ ဖမ်းမိ ခြင်းဖြစ်ကြောင်း၊ KIA အနေဖြင့် ယခင်ကတည်းက တရုတ်မှောင်ခိုသမားများအား အခွန်ကောက်ခံ၍ သစ်ခိုးထုတ်ခွင့်များပြုကာ တရုတ်နိုင်ငံသို့ တင်ပို့ရောင်းချနေကြာင်းကို ၀ိုင်းမော်မြို့တွင်နေထိုင်သူ ကချင်လူမျိုး ဦးအော့န်ဘရန်နု မှပြောသည်။
KIA သည် လက်ရှိအခြေအနေတွင် အစိုးရနှင့် အပစ်အခတ်ရပ်စဲမှု ဆွေးနွေးပွဲများသို့ တက်ရောက်ခြင်းမရှိဘဲ သဘောထားတင်းမာလျက်ရှိသည်။ ၆၇ နှစ်မြောက်လွတ်လပ်ရေးနေ့တွင် ကျင်းပသော ဗိုလ်ရှုခံအခမ်းအနားသို့ တက်ရောက်ရန် နိုင်ငံတော်သမ္မတက ဖိတ်ကြားမှုအား KIA မှ ငြင်းဆန်ခဲ့ပြီးနောက်ပိုင်းတွင် ယခုလို ကိစ္စများ ဖြစ်ပေါ်လာခဲ့ခြင်းကြောင့် ပြည်သူများအကြားတွင် KIA ၏ ငြိမ်းချမ်းရေးမူဝါဒနှင့် သဘောထားအား ဝေဖန်မှုများ မြင့်တက်လာခဲ့သည်။
Credit:ဇော်မြင့်ထွန်း ( ဗန်းမော်)
နေ့စဉ်သတင်း
No comments:
Post a Comment