အိမ်ရှင်ကရိုက်နှက်သဖြင့် အိမ်ဖော်တဦးဒဏ်ရာများဖြင့် ထွက်ပြေးလာ

ဧရာဝတီတိုင်း လေးမျက်နှာမြို့နယ်မှ ရန်ကုန်မြို့တွင် အိမ်ဖော်အဖြစ် လာရောက်လုပ်ကိုင်သူ အသက် ၁၇ နှစ် အရွယ် မိန်းကလေးတဦးသည် အိမ်ရှင်မှ ရိုက်နှက်သဖြင့် ထွက်ပြေးခဲ့ရသည့် ဖြစ်စဉ် တခု ဧပြီ ၁၇ ရက် က ဖြစ်ပွားခဲ့ကြောင်း သိရသည်။ 

မအိအိဖြိုးဆိုသူသည် ၎င်းနေ့ မနက်ပိုင်း ၆ နာရီခန့်က သူမအလုပ်လုပ်ကိုင်သည့်နေအိမ်မှ ထွက်ပြေးလာခဲ့ရာ လမ်းခရီးတွင် သုဝဏ္ဏ ၂၉ ရပ်ကွက် မြကန်သာလမ်းမှ လမ်းသူလမ်းသားများနှင့် ဆုံတွေ့ခဲ့သည်ဟု သိရသည်။

''မနက်ပိုင်း ၆ နာရီကျော်ကျော်လောက် အဲဒီကောင်မလေးက မြို့ထဲလမ်းကို ဘယ်လိုသွားရမှာလဲဆိုပြီး ငိုပြီးလာမေးတယ်။ ဒါနဲ့ အကျိုးအကြောင်းမေးကြည့်တော့ သူရိုက်ခံထားရတဲ့ဒဏ်ရာတွေပြပြီး ထွက်ပြေးလာခဲ့တဲ့အကြောင်း ပြောပြတယ်။ ကျွန်တော်တို့လည်း သက်ဆိုင်ရာရပ်ကွက်အုပ်ချုပ်ရေးမှူး၊ ရဲစခန်းတွေကို အကြောင်းကြားခဲ့ပါတယ်''ဟု ၎င်းလမ်းတွင် နေထိုင်သူတဦးက ပြောသည်။

မအိအိဖြိုးသည် ဧရာဝတီတိုင်း လေးမျက်နှာအပိုင် ဘဲများကုန်းအုပ်စုတွင် နေထိုင်သူတဦးဖြစ်ပြီး ရန်ကုန်သို့ အိမ်ဖော်အဖြစ် တလလျှင် ကျပ်ငါးသောင်းဖြင့် လာရောက် အလုပ်လုပ်ကိုင်သည်မှာ ၁ နှစ်နှင့် ၇ လခန့်ရှိပြီဖြစ်ကြောင်း သူမက News Watch ကို ပြောသည်။ 

''သမီးသူတို့ဆီတော့ မပြန်ချင်တော့ဘူး။ ရွာပဲပြန်ချင်တော့တယ်။ အရင်ကလည်း ထွက်ပြေးဖူးတယ်။ ၂ ခါ၊ ၃ ခါ လောက်ရှိပါပြီ။ ပြန်မိတယ်။ ပြန်ပြီး အရိုက်ခံရတာပါပဲ။ နှာခေါင်းထဲက သွေးတွေပါ ထွက်တယ်။ တခုခုကို အတင်း ၀န်ခံခိုင်းတယ်။ ၀န်မခံမချင်း ရိုက်နေသေးတယ်။ ခေါင်းကွဲတာ ၃ ခါရှိပါပြီ။ မိဘတွေက အဆင်မပြေတော့ နေနေရတာပါ''ဟု သူမ က ပြောသည်။

သက်ဆိုင်ရာ ရပ်ကွက်အုပ်ချုပ်ရေးမှူးနှင့် ရဲတပ်သားများက အဆိုပါကိစ္စနှင့် ပတ်သက်၍ သုဝဏ္ဏရဲစခန်းအတွင်း အိမ်ရှင်ဖြစ်သူများနှင့် ဖြေရှင်းမှုပြုလုပ်ပေးခဲ့ကြောင်း၊ မအိအိဖြိုးအနေဖြင့် အိမ်ရှင်များအား ပေးလျော်ရန် ငွေကျပ် ၄ သိန်းခန့် ကျန်ရှိနေသေးကြောင်း သုဝဏ္ဏမြို့မ ရဲစခန်းမှ ရဲအုပ်မြင့်ဇော်ဦး က ပြောသည်။

''ကောင်မလေး ဒဏ်ရာတွေက လွန်ခဲ့တဲ့ ၁ လလောက်က ရထားတဲ့ဒဏ်ရာတွေပါ။ ဒီမှာ ရဲမေတွေ သက်သေတွေနဲ့ စစ်ဆေးထားတာပါ။ ဘယ်လိုလုပ်မလဲဆိုတာ သေချာဆုံးဖြတ်လို့ မရသေးဘူး'' ဟု မြို့မရဲစခန်းမှူးက ပြောသည်။

''သူတို့က ပြန်ပို့ပေးမယ်လို့တော့ ပြောနေတယ်။ ကျွန်မတို့က ထိထိရောက်ရောက် မလုပ်နိုင်လို့ စိတ်မကောင်း ဖြစ်မိတယ်။ ပြန်လိုက်သွားရင်တော့ ကောင်မလေးအတွက် မကောင်းဘူး။ သူ့ရဲ့ ခြေထောက်တွေ၊ တင်ပါးတွေ၊ မျက်လုံးတွေက ဒဏ်ရာတွေကတော့ ဘယ်တုန်းကပဲလုပ်ခဲ့လုပ်ခဲ့ အခုထိတောင် ဒဏ်ရာတွေရှိနေသေးတယ်''ဟု လိုက်ပါကူညီပေးခဲ့သူတဦးက ဆိုပါသည်။

မအိအိဖြိုးသည် ရန်ကုန်တိုင်းဒေသကြီး သင်္ဃန်းကျွန်းမြို့နယ် သုဝဏ္ဏ၊ ရန်ကုန်သစ်ရပ်ကွက်အတွင်းရှိ အိမ်တအိမ်တွင် အိမ်ဖော်အဖြစ် လာရောက်လုပ်ကိုင် ခြင်းဖြစ်သည်ဟု သိရသည်။

မင်းဗညား

News Watch(စောင့်ကြည့်သတင်းဂျာနယ်)