ရှမ်းပြည်နယ်တွင်း ငြိမ်းချမ်းရေးဆွေးနွေးပွဲတွေ အကောင်အထည် ဖော်နိုင်ဖို့ ရှမ်းပြည်ပြန်လည် တည်ထောင်ရေး ကောင်စီက ကိုယ်စား လှယ်တွေ မြန်မာငြိမ်းချမ်းရေးဖော်ဆောင်ရေး ကော်မတီနဲ့ မကြာခင် ရက်ပိုင်းအတွင်း နေပြည်တော်မှာ တွေ့ဆုံဆွေးနွေး ကြဖို့ရှိတယ်လို့ တောင်ပိုင်း ရှမ်းပြည် တပ်မတော်ပြောခွင့်ရက ဗွီအိုအေ မြန်မာပိုင်း ကိုပြောပါတယ်။ အပစ်ရပ်ဖို့ နှစ်ဖက်ဆွေးနွေးနေကြပေမဲ့ လုံခြုံရေး အခြေအနေဟာ စိုးရိမ်နေ ရဆဲဖြစ်တဲ့အတွက် စစ်ပြေးဒုက္ခသည် အများစုကတော့ နေရင်းမပြန် ရဲသေး ပဲဖြစ်နေကြတယ်လို့ ရှမ်းလူထု အခြေပြု အဖွဲ့ကပြောပါတယ်။ အသေးစိတ်ကို မဆုမွန်က ဆက်ပြောပြပါမယ်။
မြန်မာစစ်တပ်နဲ့ SSAရှမ်းပြည်တောင်ပိုင်းတပ်မတော်ကြား စစ်ရေးပဋိပက္ခ တင်းမာမှုတွေလျော့ ချနိုင်ဖို့နဲ့ ငြိမ်းချမ်းရေး တည်ဆောက်နိုင်ရေး နိုင်ငံရေးဆွေးနွေးပွဲတွေ ဖြစ်မြောက် လာစေဖို့ RCSSရှမ်းပြည်ပြန်လည် တည်ထောင်ရေးကောင်စီအဖွဲ့ ကိုယ်စားလှယ်တွေ ဇွန်လ ၁၀ရက်နေ့နောက်ပိုင်းမှာ နေပြည်တော်ကို သွားရောက်ပြီးတွေ့ဆုံဖို့ စီစဉ်နေကြတယ်လို့ တောင်ပိုင်းရှမ်းပြည်တပ်မတော် လက်ထောက်ပြောခွင့်ရ ဗိုလ်ကြီးစိုင်းစိုင်မိန်းက ဗွီအိုအေမြန်မာပိုင်းကိုပြောပါတယ်။
“ဝန်ကြီးဦးအောင်မင်းတို့က အကြောင်းကြားလာတာကတော့ ဇွန်လ ၁၀ရက်နေ့နောက်ပိုင်းပေါ့နော်၊ ကျနော်တို့ဖက်က အဆင်သင့်ဖြစ်တယ် ဆိုရင် သွားရောက်တွေ့ဆုံနိုင်တယ်ဆိုပြီးတော့ အကြောင်းကြား လာခြင်းဖြစ် ပါတယ်။ အဲ့ဒီ့မှာ ကျနော် တို့ ငြိမ်းချမ်းရေးစောင့်ရှောက်ရေးအဖွဲ့ပေါ့နော်။ ဖွဲ့ဖို့ရော၊ မတရားအသင်းဥပဒေတွေ ပယ်ဖျက်ဖို့ရော၊ အဲ့ဒီ့ကိစ္စတွေကို ထပ်ဆွေးနွေးဖို့ဆန္ဒရှိပါတယ်။”
ရှမ်းပြည်တောင်ပိုင်း တပ်မတော်ခေါင်းဆောင်ပိုင်းတွေနဲ့ မြန်မာအစိုးရတာဝန်ရှိသူတွေ တွေ့ဆုံတဲ့အခါ လက်နက်ကိုင် အင်အားစု တွေအားလုံးနဲ့ အစိုးရတပ်တွေကြား တတိုင်းပြည်လုံးအတိုင်းအတာနဲ့ အပစ်အခတ်ရပ်စဲရေးနဲ့ နိုင်ငံရေး ဆွေးနွေးပွဲ တွေဖြစ်မြောက်နိုင်ဖို့ ယုံကြည်မှုတည်ဆောက်ဖို့ တိုက်တွန်းတောင်းဆိုသွားဖို့ရှိတယ်လို့လည်း ဗိုလ်ကြီး စိုင်းစိုင်မိန်း ကပြောပါတယ်။
“ပြည်ထောင်စုကို ငြိမ်းချမ်းရေးတည်ဆောက်မယ်ဆိုရင်၊ တနိုင်ငံလုံးအတိုင်းအတာနဲ့ အပစ်အခတ်ရပ်ဖို့က အဓိကကျတာ ပေါ့၊ အားလုံးက တောင်းဆိုနေတဲ့အချက်ဖြစ်တယ်။ ကျနော်တို့က အစိုးရက အတိုင်းအတာတခုအထိ လုပ်ပေးနိုင်မယ်လို့ ယုံကြည်ထားတယ်။ ကျနော်တို့ မျှော်လင့်ချက်ကတော့ တလှမ်းပြီးတလှမ်းပေါ့၊ ငြိမ်းချမ်းရေးဖော်ဆောင်တဲ့နေရာမှာ၊ ယုံကြည်မှု တည်ဆောက်ဖို့ လိုအပ်တယ်။ ဒါဟာ ငြိမ်းချမ်းရေးဖော်ဆောင်ဖို့ ယုံကြည်မှုတည်ဆောက်ဖို့ ခြေလှမ်း တလှမ်း ဖြစ်တယ်လို့ ယုံကြည်ထားတယ်။ အကယ်လို့ ငြိမ်းချမ်းရေးတည်ဆောက်မယ်ဆိုရင် နိုင်ငံရေးတွေ ဆွေးနွေးဖို့ လိုအပ်တယ်၊ နိုင်ငံရေးတွေ မဆွေးနွေးဘဲ အပစ်အခတ်ရပ်စဲထားရုံလောက်ပဲ လုပ်မယ်ဆိုရင် ကျနော်တို့ တစ်နှစ်ကျော် အပစ်ရပ်ခဲ့တယ်။ အခုအချိန်အထိ ငြိမ်းချမ်းရေးဟာ တော်တော်လေးကို ခက်ခဲနေတယ်။ ကျနော်တို့ နိုင်ငံရေးတွေ မြန်မြန်ဆွေးနွေးပြီးတော့ သဘောတူညီချက်တွေ မြန်မြန်ရနိုင်မှသာ ခိုင်မာတဲ့ငြိမ်းချမ်းရေးတွေ ဖော်ဆောင်နိုင်မယ်လို့ ကျနော်တို့ယုံကြည် ထားပါ တယ်။
ပြီးခဲ့တဲ့နှစ်က အပစ်ရပ်ဖို့ ပြည်နယ်အစိုးရနဲ့ သဘောတူညီချက် ရထားပြီးနောက်ပိုင်းမှာပဲ ရှမ်းပြည် နယ်တွင်း နှစ်ဖက်ထိပ်တိုက် ရင်ဆိုင်တိုက်ပွဲတွေဖြစ်ပွားနေ တာကြောင့် ရာချီတဲ့ဒုက္ခသည်တွေ ဟာ အိုးအိမ်စွန့်ခွာထွက်ပြေးနေကြရပါတယ်။ အခုထပ်ပြီး ငြိမ်းချမ်းရေးနှစ်ဘက် တွေ့ဆုံမှုတွေ လုပ်နေချိန် မှာ လောလောဆယ် စစ်ရေးအရှိန်လျော့နေပေမဲ့ စစ်ပြေး ဒုက္ခသည်အများစုကတော့ လုံခြုံရေး စိုးရိမ်နေကြဆဲဖြစ်လို့ နေရပ်ရင်းမပြန်ရဲကြသေးဘူးလို့ ရှမ်းလူထုအခြေပြုအဖွဲ့က စိုင်းခေးစိုင်က ဗွီအိုအေ ကိုပြောပါတယ်။
ဒုက္ခသည်တွေ စစ်ဘေးဒဏ်ကြောင့် ဒီလိုအိုးအိမ်စွန့်ခွာ ထွက်ပြေးနေရချိန် ဒေသခံတွေရဲ့ အိုးအိမ်တွေကို ပျက်စီးခဲ့ရ တဲ့အနေအထားမှာ ရှမ်းပြည်တောင်ပိုင်းတပ်၊ သက်ဆိုင်ရာ နယ်မြေလွှတ်တော် ကိုယ်စားလှယ်တွေနဲ့ နိုင်ငံရေးပါတီတွေ ဘက်က ဒုက္ခသည်တွေ ဘဝပြန်လည်ထူထောင်ရေး ဝိုင်းဝန်း လုပ်ဆောင်ပေးနေကြတယ်လို့ လည်း ဗိုလ်ကြီးစိုင်းစိုင်မိန်း ကပြောပါတယ်။
မြန်မာအစိုးရဘက်က ပြည်ထောင်စုငြိမ်းချမ်းရေးဖော်ဆောင်ရေးအဖွဲ့က ရှမ်းပြည်တောင်ပိုင်းတပ်အပါ အဝင် မိုင်းလား တပ်ဖွဲ့၊ ဝသွေးစည်း ညီညွတ်ရေးတပ်ဖွဲ့၊ ရှမ်းပြည်တိုးတက်ရေး ပါတီတွေနဲ့ ဆွေးနွေးနေ သလို ရှမ်းပြည်နယ်မြောက်ပိုင်း တပ်နဲ့လည်း ဆွေးနွေးပွဲတွေဖြစ်မြောက်နိုင်ဖို့ ညှိနှိုင်းနေကြတာဖြစ်ပါတယ်။ ဒီလိုတဖွဲ့ချင်း သီးခြားစီတွေ့ဆုံနေကြ တဲ့ အတွက် ရှမ်းပြည်နယ်တွင်း စစ်မှန်တဲ့ ငြိမ်းချမ်းရေးအတွက် ဘုံသဘောတူညီချက်ရဖို့ ခက်ခဲနေတဲ့အနေအထားမှာ ရှိနေတယ်လို့လည်း စိုင်းခေးစိုင် က ထောက်ပြပြော ဆိုပါတယ်။
“ရှမ်းပြည်နယ်ထဲမှာ တပ်က ပေါင်းစုံရှိတယ်လေ၊ အဲ့ဒီ့ တပ်ပေါင်းစုံနဲ့ ဆွေးနွေးဖို့လည်း ခက်ခဲနေတာ နည်းနည်းရှိတယ်။ တစ်ဖွဲ့ချင်းစီ ဆွေးနွေးနေတဲ့အချိန်မှာ ကိုယ်လိုချင်တဲ့ ပှိုင့်က ဘုံသဘောတူညီ ချက်တွေပေါ့၊ ဒီဘုံသဘော တူညီမှုကို ရဖို့ကလည်း ရှေ့ဆက်နည်းနည်းကြန့်ကြာမယ်လို့ ကျနော်တို့ယူဆ ပါတယ်။”
SSAတောင်ပိုင်းဟာ ပြီးခဲ့တဲ့နှစ် ဒီဇင်ဘာလဆန်းမှာ အပစ်အခတ် ရပ်စဲဖို့ ပြည်နယ်အစိုးရနဲ့ သဘောတူညီ ထားတာ ဖြစ်ပါတယ်။ ဒီနောက်ပိုင်းမှာတော့ အနည်းဆုံး တိုက်ပွဲပေါင်း ၈၀လောက်ဖြစ်ပွားခဲ့သလို ပြီးခဲ့တဲ့မေလ ဒုတိယပတ်အတွင်း မူဆယ်၊ နမ်းခမ်းမြို့နယ်တွေမှာ နှစ်ဖက် ရင်ဆိုင် တိုက်ပွဲတွေ ပြင်းပြင်း ထန်ထန်ဖြစ်ခဲ့ပြီး ထောင်နဲ့ချီတဲ့ ရှမ်းပြည်သူတွေဟာ စစ်ပြေးဒုက္ခသည်တွေ အဖြစ် အိုးအိမ်စွန့်ခွာ ထွက်ပြေးတိမ်းရှောင် ခဲ့ရပါတယ်။
VOA
No comments:
Post a Comment