 |
ချမ်းမြသာစည်
မြို့နယ် တမ္ပပ၀တီရပ် ခတ္တန်းရပ်ကွက်ရှိ
အခင်းဖြစ်ပွားရာ သေဆုံးသူ
ဦးတင်မောင်မြင့်၏ နေအိမ်
|
မန္တလေးမြို့ ချမ်းမြသာစည် မြို့နယ် တမ္ပပ၀တီရပ် ခတ္တန်းရပ် ကွက်၌
ကြေးဆင်းတုတော် လုပ်ငန်း လုပ်ကိုင်နေသည့် ဦးတင်မောင်မြင့် ဆိုသူကို
ဓားဖြင့် ထိုးသတ်ခဲ့သည့် လူသတ်မှုတခု လွန်ခဲ့သည့်ရက်ပိုင်းက
ဖြစ်ပွားခဲ့ကြောင်း သတင်းရသည်။
လူသတ်မှု ကျူးလွန်သူကို နာရီပိုင်းအတွင်း ဖမ်းမိပြီး ၀န်ခံခဲ့သော် လည်း
သတ်ရသည့် အကြောင်းရင်းကို ဖော်ထုတ် မရသေး၍ စစ်ချက် ယူနေဆဲဖြစ်ကြောင်း
ချမ်းမြသာစည် အမှတ် ၁၀ ရဲစခန်း တာဝန်ရှိသူများက ပြောသည်။
ပြစ်မှု ကျူးလွန်သူမှာ ငတိ(ခေါ်)ကျော်မင်းဦး ဖြစ်ပြီး အသက် ၂၂ နှစ်
အရွယ်ရှိကြောင်း၊ ၄င်းမှာ ကွမ်း၊ ဆေးလိပ်၊ အရက် သောက် သုံး ခြင်း ကင်း၍
အများနှင့်လည်း ဆက်ဆံရေးပြေပြစ်သော လူငယ်တဦး ဖြစ်ကြောင်း သိရသည်။
သြဂုတ်လ ၂၃ ရက် ည ၁၀ နာရီခွဲခန့်က ကျော်မင်းဦးသည် အိမ်တွင်းသို့
ဝင်ရောက်ပုန်းအောင်းနေပြီး ဦးတင်မောင်မြင့်နှင့် ဇနီး အခန်းအတွင်းမှ
ထွက်လာစဉ် လှေကားအကွယ်မှ အသင့်ပါ ဓားနှင့်ထိုး၍ ထွက်ပြေးသွားခြင်း
ဖြစ်ကြောင်း၊ ဦးတင်မောင်မြင့်သည် ရင်ဘတ် ဒဏ်ရာ၊ ၀ဲဘက်နံဘေး ဒဏ်ရာ
တို့ဖြင့် သေဆုံးသွားပြီး ဇနီးဖြစ်သူ မဌေးဌေးဝင်းမှာလည်း နောက်ကျော နှင့်
ဝဲဘက် လက်မောင်း စသည်တို့တွင် ဓားဒဏ်ရာများရရှိခဲ့၍ ဆေးကုသမှုခံယူနေကြောင်း
ရဲ စခန်း တာဝန်ရှိသူများ က ပြောဆိုသည်။
မဌေးဌေးဝင်းကလည်း နေအိမ်တွင်း ဓားနှင့် ၀င်ရောက်ထိုးသူမှာ ငွေစင်ရပ်တွင်
နေထိုင်သော ကြေး အရောင်တင်သည့် ကျော်မင်းဦး ဖြစ်ကြောင်း ရဲ စစ်ချက်တွင်
ထွက်ဆိုထားသည်။
အခင်းဖြစ်ပွားသည့် ညတွင်းချင်း နေအိမ်တွင်ပင် ကျော်မင်းဦးသည် အေးဆေးစွာ အဖမ်းခံခဲ့ကြောင်း သိရသည်။
ဦးတင်မောင်မြင့် အိမ်ရှိ တန်ဖိုးကြီးပစ္စည်းများမှာ ယခုချိန်အထိ
ပျောက်ရှမှုမရှိသောကြောင့် ပစ္စည်းလိုချင်၍ သတ်ခြင်း မဖြစ်နိုင်ကြောင်း ရဲ က
ယူဆနေပြီး မည်သည့်အတွက် သတ်သည်ကို စုံစမ်းစစ်ဆေးနေသည်ဟု ဆိုသည်။
ယင်းအမှုကို ချမ်းမြသာစည် အမှတ် ၁၀ ရဲစခန်းမှ ပုဒ်မ (၃၀၂) ဖြင့် အမှုဖွင့် အရေးယူ ထားသည်။
ကျော်မင်းဦးသည် သေဆုံးသူ အသက် ၅၅ နှစ်ရှိ ဦးတင်မောင်မြင့်နှင့်
ဆရာတပည့်ဖြစ်ပြီး ဦးတင်မောင်မြင့်ထံမှ ကြေးအကြမ်းထည် ပန်းပု ပစ္စည်းများ
ယူဆောင်၍ ကြေးအရောင်တင်သည့် လုပ်ငန်း လုပ်ကိုင်လျက် ရှိကြောင်း သိရသည်။
ဦးတင်မောင်မြင့် အိမ်သို့ ကျော်မင်းဦးသည် အမြဲ ၀င်ထွက်သွားလာနေသူ
ဖြစ်ပြီး တခါတရံ ကတောက်ကဆ စကားများခြင်းများ လည်း ရှိကြောင်း
အနီးဝန်းကျင်ရှိ နေထိုင်သူများက ပြောဆိုကြသည်။
No comments:
Post a Comment