မှောင်ခိုကုန်သွယ်မှု ပပျောက်စေရန် ရွေ့လျားစစ်ဆေးရေးအဖွဲ့ ဖွဲ့စည်းမည်

မန္တလေး၊ အောက်တိုဘာ-၂၈

မြန်မာနိုင်ငံရှိ ကုန်သွယ်မှုပြုရာ လမ်းကြောင်းများတစ်လျှောက်တွင် တရားမ၀င်ကုန်သွယ်မှုအား တားဆီးထိန်းချုပ်သွားမည့် ရွေ့လျားစစ်ဆေးရေးအဖွဲ့ ဖွဲ့စည်းဆောင်ရွက်မည်ဖြစ်ကြောင်း သတင်းရရှိသည်။

အဆိုပါအဖွဲ့ ဖွဲ့စည်းရခြင်းမှာ စားသုံးသူကို အကာအကွယ်ပေးရေး၊ တရားဝင်ကုန်သွယ်မှု မြင့်မားတိုးတက်စေရေး၊ တရားမ၀င်ကုန်သွယ်မှု တားဆီးထိန်းချုပ်သွားရန်နှင့် တရားဝင်ကုန်သွယ်မှုလမ်းကြောင်းပေါ် ရောက်ရှိစေရန် ရည်ရွယ်သည်ဟုဆိုသည်။

အောက်တိုဘာ ၂၈ ရက်က မန္တလေးပွဲစားကုန်သည် စက်ပိုင်များ မဟာကထိန်တော်အသင်းကြီး (မန်းကုန်စည်ဒိုင်)တွင် ရွေ့လျားစစ်ဆေးရေးအဖွဲ့(Mobile Team)၏ ဆောင်ရွက်မည့်ကိစ္စများနှင့် ပတ်သက်၍ မန္တလေးမြို့ရှိ ကုန်သည်များ၊ ကုန်တင်ယာဉ်ပိုင်ရှင်များနှင့် တွေ့ဆုံကာ ရှင်းလင်းပြောကြားခဲ့သည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန နယ်စပ်ကုန်သွယ်ရေးစခန်းများ၏ အနီးတစ်ဝိုက် ၅ မိုင်နှင့် ၁၀ မိုင်အတွင်းရှိ တရားမ၀င် ကုန်သွယ်မှုလမ်းကြောင်းများနှင့် တရားမ၀င်ကုန်သွယ်မှုတို့အား တားဆီးဆောင်ရွက်ရန် နယ်စပ်ကုန်သွယ်ရေးဦးစီးဌာနမှ ဦးဆောင်ဖွဲ့စည်းမည်ဖြစ်သည်။

ယင်းအဖွဲ့တွင် အကောက်ခွန်ဦးစီးဌာန၊ မြန်မာနိုင်ငံရဲတပ်ဖွဲ့၊ ဒေသအုပ်ချုပ်ရေးမှ ကိုယ်စားလှယ်၊ UMFCCI (သို့မဟုတ်) နယ်စပ်ကုန်သည်အသင်းမှ ကိုယ်စားလှယ်တို့နှင့်အတူ သတင်းလိုက်ပါရယူရန် သတင်းမီဒီယာကိုပါ ပါဝင်ဖွဲ့စည်းမည်ဖြစ်သည်ဟုဆိုသည်။ အဆိုပါအဖွဲ့သည် နယ်စပ်ကုန်သွယ်ရေးစခန်းဝန်းကျင်ရှိ ရှောင်ကွင်းလမ်းများ၊ နယ်စပ်ဒေသများမှ ပြည်တွင်းသို့ဝင်ရောက်သည့် ကုန်သွယ်မှုလမ်းကြောင်းများ၊ မြစ်ချောင်းများ၊ ပင်လယ်ရေကြောင်းမှ ၀င်ရောက်နိုင်သည့် ၀င်ပေါက်ထွက်ပေါက်များ၊ ဆိပ်ကမ်းများ၊ လေဆိပ်များနှင့် လိုအပ်ပါက ဈေးကွက်အတွင်းထိ နေရာအားလုံးတွင် စစ်ဆေးမှုများ ဆောင်ရွက်သွားမည်ဖြစ်သည်။ ပုံမှန်လမ်းကြောင်း ပုံမှန်နေရာ သတ်မှတ်၍ ဆောင်ရွက်ခြင်းမျိုးမဟုတ်ဘဲ အခြေအနေပေါ်မူတည်ကာ တရားမ၀င်ကုန်သွယ်နေသည့် နေရာများသို့ သွားရောက်စစ်ဆေး ဆောင်ရွက်ကြမည်ဟုဆိုသည်။

ယင်းအဖွဲ့၏ စစ်ဆေးဆောင်ရွက်မှုများကို နိုဝင်ဘာ ၁ ရက်တွင် စတင်မည်ဖြစ်ကြောင်း ဒုတိယညွှန်ကြားရေးမှူး ဦးသိန်းထွန်းဦးကပြောသည်။ ပညာပေးကာလအတွင်း ကုန်ပစ္စည်းတင်ပို့ခြင်း၊ တင်သွင်းခြင်းများနှင့် သက်ဆိုင်သည့်လိုင်စင်နှင့် တရားဝင်ဆောင်ရွက်ခွင့် စာရွက်စာတမ်းများ စစ်ဆေးသွားမည်ဖြစ်ပြီး မပြသနိုင်ပါက လိုင်စင်ပြုလုပ်ခြင်း၊ ဒဏ်ကြေးပေးဆောင်စေခြင်းတို့ ပြုလုပ်ရမည်ဖြစ်ပြီး ကန့်သတ်ကုန်ပစ္စည်းများ တင်ဆောင်လာလျှင်မူ တည်ဆဲဥပဒေနှင့်အညီ အရေးယူခံရမည်ဖြစ်သည်။ ပညာပေးကာလကျော်လွန်လျှင် ယာဉ်နှင့်ယာဉ်ပေါ်ပါ ပစ္စည်းများအား နိုင်ငံတော်ဘဏ္ဍာအဖြစ် သိမ်းဆည်းခြင်း၊ ယာဉ်မောင်းနှင့် ယာဉ်နောက်လိုက်တို့ကို တည်ဆဲဥပဒေနှင့်အညီ အရေးယူခြင်း၊ ပစ္စည်းနှင့်သက်ဆိုင်နေသည့် ကုမ္ပဏီလုပ်ငန်းရှင်အား အမည်မည်းစာရင်းတွင် ထည့်သွင်းကြေညာခြင်း၊ တည်ဆဲဥပဒေနှင့်အညီ အရေးယူခြင်းများ ဆောင်ရွက်သွားမည်ဟုဆိုသည်။

နယ်စပ်ကုန်သွယ်ရေးဦးစီးဌာနမှ ဒုတိယညွှန်ကြားရေးမှူးချုပ် ဦးညွန့်အောင်က “ကျွန်တော်တို့ဘက်ကတော့ ဟာကွက်မရှိအောင် တားဆီးသွားမှာ ဖြစ်ပါတယ်။ သတင်ပေးတွေလည်း မွေးသွားမှာပါ။ သတင်းပေးတဲ့သူကိုလည်း ဆုကြေးငွေချီးမြှင့်ပါမယ်။ သတင်းပေးသူနာမည်ကိုလည်း ထိမ်ချန်ပေးပါ့မယ်”ဟုပြောသည်။

သတင်းအချက်အလက်များ အချိန်နှင့်တစ်ပြေးညီ ဖော်ပြပေးရန် သတင်းမီဒီယာကိုပါ ၎င်းအဖွဲ့တွင် ထည့်သွင်းဖွဲ့စည်းမည်ဖြစ်ပြီး သတင်းထောက်များပါဝင်ရန် ပြန်ကြားရေးဝန်ကြီးဌာနသို့ အကူအညီတောင်းထားသည်ဟု ဒုတိယညွှန်ချုပ်ကဆိုသည်။ မန်းကုန်စည်ဒိုင်မှ ပဲကုန်သည် ကိုခင်မောင်နိုင်ဦးက “ချွတ်ခြုံကျနေတဲ့ ကျွန်တော်တို့ စီးပွားရေးတွေကို တရားဝင်ကုန်သွယ်မှုက အထောက်အပံ့ဖြစ်အောင် စွမ်းဆောင်ပေးဖို့ လိုမယ်လို့ ကျွန်တော်ထင်ပါတယ်။ တရားမ၀င်ကုန်သွယ်မှုကြောင့် အခွန်အခတွေ လွတ်သွားတဲ့အတွက် တရားဝင်ကုန်သွယ်တဲ့သူတွေ ထိခိုက်ပါတယ်။ တိုင်းပြည်ရဲ့အခွန်အခတွေ ထိခိုက်ပါတယ်။ တိုင်းပြည်ရဲ့အခွန်အခ ထိခိုက်တာ ကျွန်တော်တို့
ထိခိုက်တာပါပဲ။ အခုဖွဲ့စည်းတဲ့ မိုဘိုင်းတင်းမ်ကိုလည်း ယုံကြည်ပါရစေ”ဟုပြောသည်။ ယခင်အဖွဲ့အစည်း၏ စစ်ဆေးမှုကို ခံခဲ့ရဖူးသည့် ကုန်တင်ယာဉ်ကြီးဖြင့် ကုန်စည်ပို့ဆောင်သည့်လုပ်ငန်း လုပ်ကိုင်သူ အမျိုးသားတစ်ဦးက ဖမ်းဆီးစစ်ဆေးရာတွင် မညီမျှမှုများကိုလည်း ကြုံတွေ့ခဲ့ရဖူးသည်ဟုဆိုသည်။ “အားလုံးသာ အသိစိတ်ဓာတ်ရှိရှိ ပါဝင်မယ်ဆိုရင် မအောင်မြင်စရာအကြောင်း မရှိပါဘူး။ ရဲရဲကြီးအာမခံပါတယ်။ မှန်မှန်ကန်ကန်နဲ့ လမ်းကြောင်းပေါ်က တရားဝင်အခွန်အခ ပေးဆောင်ပြီး ရင်ကော့ပြီး သွားလို့ရတဲ့အဆင့်ထိ ကျွန်တော်တို့ဆောင်ရွက်ပေးပါ့မယ်။ အဲဒီမှာ ညှိလာရမယ့်အချက်တွေ ရှိပါတယ်။ တချို့အမယ်တွေမှာ ကျွန်တော်တို့ဘက်က အခွန်အခတွေများနေတာရှိမယ်။ အဲဒါတွေကို သက်ဆိုင်ရာအဆင့်ဆင့်ကို တင်ပြပြီး ညှိနှိုင်းဆောင်ရွက်သွားပေးမယ်ဆိုရင်တော့ ကျွန်တော်ထင်ပါတယ်။ မှောင်ခိုကို ပပျောက်သွားမယ်လို့တော့ မပြောလိုပါဘူး။ လျော့သွားပါမယ်”ဟု ဒုတိယညွှန်ကြားရေးမှူးချုပ် ဦးညွန့်အောင်ကပြောသည်။

၂၀၀၅ မှ ၂၀၁၁ ခုနှစ်အထိ နယ်စပ်ကုန်သွယ်ရေးစခန်းများတွင် O.S.S(One Stop Services)အဖွဲ့ဟူ၍ ရှိခဲ့သည်။ ယင်းအဖွဲ့ကို နယ်စပ်ကုန်သွယ်ရေးဦးစီးဌာနက ခေါင်းဆောင်ကာ အကောက်ခွန်ဦးစီးဌာန၊ ပြည်တွင်းအခွန်များဦးစီးဌာန၊ မြန်မာ့စီးပွားရေးဘဏ်၊ မြန်မာနိုင်ငံရဲတပ်ဖွဲ့၊ လူဝင်မှုကြီးကြပ်ရေးအဖွဲ့ (လ.၀.က) အစရှိသည့် ဌာနများမှပုဂ္ဂိုလ်များ ပါဝင်ဆောင်ရွက်ခဲ့ကြသည်။

From -7DayNewsJournal