Sunday, March 31, 2013

လျှပ်စစ်မီးရရှိရေးကော်မတီ ဥက္ကဋ္ဌ နှင့် ရွာသားများ အပြန်အလှန် တရားဆွဲ



ပြည်ခရိုင်၊ ၀က်ထီးကန်မြို့နယ်၊ လွှစင်ကုန်း ကျေးရွာ အုပ်ချုပ်ရေးမှူး ဦးအေးစိုးမှ ကျေးရွာ လျှပ်စစ်မီး ရရှိရေးအတွက် လွန်ခဲ့သော (၆)နှစ်ခန့် က ငွေကျပ်သိန်း(၄၆၀) ကောက်ခံခဲ့ပြီး မီးတိုင်(၅၀) နှင့် ထရန်စဖော်မာ တစ်လုံးသာ တပ်ဆင်ပြီးစီးခဲ့မှုအပေါ် မကျေနပ်၍ တာဝန်ရှိသူများသို့ အဆင့်ဆင့်တိုင်ကြားရာမှ အပြန်အလှန် တရား ဆွဲမှုပေါ်ပေါက်ခဲ့ကြောင်း ကျေးရွာသူကျေးရွာသားများက ပြောကြားသည်။

“ရပ်ကွက်ရုံးမှာ လမ်းလျှောက်ကြေး (တရားဝင်ပြေစာမရဘဲ ပေးရသည့်ငွေ) ကျပ်သိန်း(၂၁၀)ကုန်ကျတယ် လို့ ကြေငြာထားတယ်။ကျွန် တော်တို့ပေးတုန်း က လာဘ်ငွေပေးရမယ်လို့မပြောထားဘူး။

ဘယ်သူ့ကိုပေးရတာလဲ။ဘာလို့ပေးရတာလဲ။ ဒါကို မကျေနပ်လို့ တိုင်တာပါ” ဟု လွှစင်ကုန်းကျေးရွာမှ ဦးမြင့်ဝေ က ပြောကြားသည်။

အဆိုပါ ကိစ္စရပ်အတွက် ကျေးရွာသူ ကျေးရွာသား (၅၅)ဦး လက်မှတ်ထိုးတိုင်ကြားခဲ့ခြင်းကြောင့် နိုင်ငံတော် သမ္မတရုံးမှ ဗိုလ်မှူးကြီး မြင့်ဦးလာရောက်စစ်ဆေးပြီး အဖြေမထွက်မီ အုပ်ချုပ်ရေးမှူး ဦးအေးစိုးမှ ဦးဆောင် တိုင်ကြားသူ ငါးဦးကို ပုဒ်မ၂၁၁ဖြင့် တရားစွဲလိုက်ကြောင်း၊ မိမိတို့ မှလည်းပြည်သူတို့၏ ယုံကြည်စွာအပ်နှံငွေ အလွဲသုံးစားမှု ပုဒ် မ ၄၀၆ ဖြင့် တရားပြန်ဆွဲကြောင်း ၎င်းက ဆက်လက်ပြောကြားသည်။

လွှစင်ကုန်းကျေးရွာ အုပ်ချုပ်ရေးမှူးဦးအေးစိုးက “ကျွန်တော်ကို ပုဂ္ဂိုလ်ရေးအရတိုင်တာပါ။ အမှန်တိုင်မယ်ဆို မီးလင်းရေးအဖွဲ့ တစ်ခုလုံးကိုတိုင်ရမယ်လေ။ ဒီကိစ္စ ဗောဓိကျောင်းဆရာတော်ကိုယ်တိုင်စီမံခန့်ခွဲပြီး အစည်း အဝေး ဆုံးဖြတ်ချက်နဲ့လုပ်တာ။ အစည်းအဝေးဆုံးဖြတ်ချက်တွေ ကျွန်တော်ဆီမှာရှိတယ်”ဟု ပြော ကြားသည်။

ကျေးရွာမီးလင်းရေး ကော်မတီကို (၂၀၀၇) ခုနှစ်က ယခင်အုပ်ချုပ်ရေးမှူးဦးစိုးသိန်းမှ ဖွဲ့စည်းခဲ့ကြောင်း၊ ထိုအချိန်က မိမိမှာရာအိမ်စုမှူးအဆင့်သာရှိပြီး မီးလင်းရေးဥက္ကဌတာဝန်ကိုယူရကြောင်း ၊ ဗောဓိကျောင်း ဆရာတော်မှာ ဘဏ္ဏာထိန်းအဖြစ်တာဝန်ယူပြီး ယခုတိုင်ကြားသူ အုပ်စုန၀င်းကွက်သစ်ဦးပိုင် ငွေကောက်ခံ သူဖြစ်ကြောင်း ၎င်းက ဆက်လက် ပြောကြားသည်။

ပြီးခဲ့သည့် ဇန်န၀ါရီလက ပဲခူးတိုင်းဒေသကြီး လွှတ်တော်အမတ်ဦးကျော် ကျော်လင်း လာရောက်စဉ် လျှပ်စစ်မီး ရရှိရန်အတွက် ငွေကျပ်သိန်း (၁၃၀၀)ခန့် ကုန်ကျမည်ဖြစ်ပြီး ကုမ္ပဏီများနှင့် ဆက်သွယ်ပေးမည်ဟု ပြော ခဲ့ကြောင်း လွှစင်ကုန်းကျေးရွာမှ ဦးဇော်ဦးက ပြောကြားသည်။

ဝက်ထီးကန်မြို့နယ်အတွင်းရှိ ကျေးရွာများဖြစ်သာ အေးမြသာယာ၊ အရှေ့ပုပ္ပါး၊ ဆီဆုန်ကုန်းကြီး၊ န၀င်း ကွက်သစ် ၊ လက်ပံချိုကျေးရွာတို့မှာလည်း လျှပ်စစ်မီးမရရှိသေးကြောင်းသိရသည်။

ကိုရေခဲ(ပြည်)
ref:The Myanma Age

No comments:

Post a Comment