Friday, May 9, 2014

"မတ္တရာမြို့နယ် တပ်သိမ်းမြေအား ဒေသခံများ ပြန်လည်သိမ်းပိုက်၊ လယ်မြေပေါ်လုပ်ကိုင်လျှက်ရှိသော ငါးမွေးမြူရေးကန်အား ဖောက်ချ၍ စပါးပျိုးကြဲ


မန္တလေးတိုင်း ပြင်ဦးလွင်ခရိုင် မတ္တရာမြို့နယ် ရေနံ့သာကျေးရွာအုပ်စုရှိ ကွင်းအမှတ် ၁၄၅၊ ၁၄၆၊ ၁၄၇၊ ၁၄၈၊ ၁၄၉ တို့အပေါ်ရှိ လယ်မြေဧက ၄၀၀ ကျော်အား ၁၉၉၁ ခုနှစ်တွင် ခမရ ၁၁၆နှင့် ၁၁၉တပ်တို့မှ တပ်ရိက္ခာဖူလုံရေးအတွက်ဟုပြောဆိုကာ နစ်နာကြေးမပေးဘဲ မြေယာအစားပြန်လည်ပေးလျှော်ခြင်းမရှိဘဲ သိမ်းယူခဲ့သောကြောင့် ဒေသခံတောင်သူတစ်ရာကျော်တို့သည် ငါမွေးမြူထားသောကန်အား ဖေါက်ချပြီး မျိုးစပါးများ ပျိုးကြဲ၍ လုပ်ငန်းများ ဝင်ရောက်လုပ်ကိုင်နေခြင်းကြောင့် ဦးဆောင်သူ ၆ ဦးအား တရားစွဲမှုများပြုလုပ်ထားကြောင်း သိရသည်။ ယင်းအပြင် ငါးမွေးမြူရေးကန်အား ရဲအင်အား ၁၀၀ ကျော်ဖြင့်လုံခြုံရေးယူထားကြောင်း ဒေသခံတောင်သူများက ပြောသည်။


ဒေသခံတောင်သူများသည် ငါးမွေးမြူရေးကန်အား မေလ ၁ ရက်နေ့တွင် ကန်အားဖေါက်ချခဲ့ပြီး လယ်သိမ်းတိုက်ပွဲဝင်နေရာ ၇ ရက်ရှိသွားပြီဖြစ်ကြောင်း၊ ထိုသို့ရေများဖေါက်ချပြီး ရေမရှိသောနေရာများအား မိုးကြိုစပါးအဖြစ် ယနေ့တင်း ၆၀ ပျိုးကြဲထားနိုင်ပြီဖြစ်ကြောင်း ဒေသခံတောင်သူများက ပြောသည်။
"လယ်မြေသိမ်းတုန်းကလည်း ဘာမမပေးခဲ့ဘူး။လယ်မြေကိုလည်း ကန်တူးပြီး ငါးတွေမွေးခဲ့တော့ ဒီလိုမိုးရာသီရောက်ပြီဆိုရင်ရေလျှံတယ်။ ရွာတွေထဲလည်းဝင်တယ်။ တခြားလယ်လည်းပျက်စီးတယ်။ ဒါတွေကိုလည်းဖြေရှင်းပြီး ဘာမှလုပ်ပေးတာမရှိဘူး။

ရွာသားတွေအနေနဲ့ဖြစ်သလို နေထိုင်လုပ်ကိုင်နေရတယ်။ ဒါကြောင့် အခုလိုကန်ဖေါက်ပြီး လယ်မြေကိုပြန်သိမ်းယူတာပါ။ ရအောင်ဆက်လုပ်သွားမယ်။ ဘယ်လောက်တားတား ဂရုမစိုက်ဘူး။"ဟု လယ်သိမ်းခံတောင်သူ ဦးထွန်းဝင်း က ပြောသည်။
လက်ရှိတွင် ရဲများက အဆိုပါနေရာအား လုံခြုံရေးယူထားကာ ကန့်သတ်နယ်မြေလုပ်ကာ ဒေသခံများအားဝင်ရောက်ခွင့်ပိတ်ပင်ပြီး ထိန်းချုပ်ထားကြောင်းသိရသည်။

အဆိုပါသိမ်းဆည်းလယ်ယာမြေများ ပြန်လည်ရရှိစေရန် ၂၀၁၂ ခုနှစ်ကတည်းက သက်ဆိုင်အဆင့်ဆင့်သို့ တင်ပြတောင်းဆိုခဲ့သော်လည်း ယနေ့တိုင်း အကြောင်းတစ်စုံရာပြန်ကြားခြင်းမရှိသောကြောင့် ယခုကဲ့သို့ လယ်သိမ်းတိုက်ပွဲဝင်ခြင်းဖြစ်ကြောင်း ဒေသခံများက ဆိုသည်။
လယ်ယာမြေများအား စစ်တပ်မှရိက္ခာမလုံလောက်၍ သိမ်းသည်ဟုဆိုသော်လည်း သိမ်းဆည်းပြီးသည်နှင့် လုပ်ငန်းရှင်တစ်ဦးအား ဌားရမ်းလုပ်ကိုင်ခွင့်ပေးလိုက်ရာ အဆိုပါလုပ်ငန်းရှင်မှ ဧက ၄၀၀ ကျော်အား ကန်တူး၍ ငါးမွေးမြူခဲ့ကြောင်း သိရသည်။

ထိုသို့ ငါးမွေးမြူရေးလုပ်ကိုင်သောကြောင့် ဒေသခံများမှာ လယ်ယာမြေများဆုံးရှုံးသွားသည့်အပြင် မိုးရာသီရောက်တိုင်း ကန်ရေလျှံပြီး ရွာများအတွင်းသို့ ဝင်ရောက်သောကြောင့် ရေဘေးဒုက္ခများလည်းခံစားရကြောင်းသိရသည်။
ထို့ကြောင့်ဒေသခံတောင်သူများသည် လယ်ယာမြေပြန်လည်ရရှိသည်အထိ တိုက်ပွဲဝင်သွားမည်ဖြစ်ကြောင်းဒေသခံများကဆိုသည်။ အဆိုပါနေရာအား ရဲတစ်ရာကျော်လုံခြုံရေးယူထားသည်နှင့်ပတ်သက်၍ လုံခြုံရေးတာဝန်ယူထားသူ ရဲမှူးတစ်ဦးအားမေးမြန်းရာ ပြန်လည်ဖြေကြားခြင်း မရှိခဲ့ပေ။

အောင်ခိုင်မြဲ
News Watch(စောင့်ကြည့်သတင်းဂျာနယ်)

No comments:

Post a Comment