အဓမ္မပြုကျင့်မှုဖြင့်
အမှုဖွင့်ခံရသူ မန္တလေးခရိုင်တရားရုံးမှ ရုံးအုပ်ဦးတင်မောင်ဝင်းအား
ပြင်ဦးလွင်မြို့မ ရဲစခန်းမှ စခန်းမှူး ဦးကံလှိုင်ကိုယ်တိုင်
ဝင်ရောက်ဖမ်းဆီးသော်လည်း မန္တလေးခရိုင်တရားသူကြီး ဒေါ်ခင်ခင်လှက
အကာအကွယ်ပေးကာ ဖမ်းဆီးခံစေမှု မရှိသဖြင့် အမှုဖွင့်ခံရသူ လွတ်မြောက်နေကြောင်း
အဓမ္မပြုကျင့်ခံရသူနှင့် သူမ၏ မိခင်က ရန်ကုန်မြို့ရှိ
မြန်မာဂျာနယ်လစ်ကွန်ရက်(MJN) ရုံးခန်းတွင် ဇူလိုင် ၃ ရက်က လာရောက်
သတင်းစာရှင်းလင်းမှု ပြုလုပ်ခဲ့ကြောင်း သိရသည်။ဖြစ်စဉ်မှာ မူးယစ်ဆေးဝါးအမှုဖြင့် အမှုဖွင့် တရားစွဲခံရသူ ကိုမင်းသူရဇော်အတွက် ညီမဖြစ်သူ မ ........ က တရားရုံးချိန်းများသို့ သွားရောက်စဉ် မန္တလေးခရိုင် တရားရုံးမှ ရုံးအုပ်ဦးတင်မောင်ဝင်းနှင့်
“ဦးတင်မောင်ဝင်းက ဒီလိုဖြစ်တာနဲ့ ပတ်သက်ပြီး ဘယ်သူ့မှမပြောနဲ့။ လိုအပ်တဲ့ အကူအညီရှိရင်တောင်း။ နင့်အစ်ကိုအတွက်လည်း စိတ်မပူနဲ့လို့ ပြောပါတယ်။ နောက်ရက်တွေကျတော့ သူကရှောင်နေပါတယ်။ သူ့ကိုဆက်သွယ်လို့ရတော့ ပိုက်ဆံညှိမယ်။ သားမယားစရိတ်ပေးမယ်။ အမှုလည်း ပိတ်ပေးမယ်လို့ ပြောတယ်” ဟု မ..........က ဆို သည်။
မ............၏ မိခင်ဖြစ်သူ ဒေါ်မာလာ၏ သားဖြစ်သူ ကိုမင်းသူရဇော်မှာ မူးယစ်ဆေးဝါးမှုဖြင့် ဖမ်းဆီးခံရသည် ဆိုသော်လည်း သူ့အား ဦးလေးတော်စပ်သူ ဦးခင်မောင်ထွေး၏ ဇနီးဖြစ်သူ ဒေါ်ခင်မာလွင်က မူးယစ်ဆေးဝါး ရောင်းချခိုင်းသဖြင့် မရောင်းရဲ၍ မန္တလေးမြို့ မောရဂီဝါရပ်၊ ရပ်ကွက်အုပ်ချုပ်ရေးမှူး ရုံးသို့သွားကာ မူးယစ်ဆေးဝါးအား အပ်နှံရာမှ ဖမ်းဆီးခံခဲ့ရကြောင်း ဒေါ်မာလာကဆိုသည်။ ကိုမင်းသူရဇော်က ထိုသို့ အပ်နှံခဲ့သဖြင့် မူးယစ်ဆေးဝါးဖြန့်ချိသူ ဒေါ်ခင်မာလွင်နှင့် ဒေါ်နီနီထွေးတို့အား ဆက်စပ်ဖမ်းဆီးနိုင်ခဲ့ပြီး ကိုမင်းသူရဇော်အား အစိုးရသက်သေအဖြစ် ဖမ်းဆီးမည်ဖြစ်ကြောင်းနှင့် မကြာမီပြန်လွတ် လာမည်ဖြစ်ကြောင်း အမှတ် (၈) ရဲစခန်းမှ တာဝန်ရှိ ရဲအရာရှိများနှင့် မောရဂီဝါရပ်၊ ရပ်ကွက်အုပ်ချုပ်ရေးမှူးရုံးမှ တာဝန်ရှိသူများက မိခင်ဖြစ်သူ ဒေါ်မာလာအား လက်မှတ်ရေးထိုးစေခဲ့ကြောင်း ဒေါ်မာလာက ဆိုသည်။
မူးယစ်ဆေးဝါးမှုဖြင့် ဖမ်းဆီးခံရသူများ အမှုပေါ့လျော့ရန်နှင့် ပြစ်ဒဏ်မှလွတ်မြောက်ရန်ဆိုကာ မန္တလေးခရိုင် တရားသူကြီး ဒေါ်ခင်ခင်လှက မူးယစ်ဆေးဝါးဖြန့်ချိသူ ဒေါ်ခင်မာလွင်၏ အမျိုးသားဖြစ်သူ ဦးခင်မောင်ထွေးထံမှ ကျပ်သိန်း ၃ဝဝ တောင်းဆိုခဲ့ရာ ဦးခင်မောင်ထွေးက ကျပ်သိန်း ၁ဝဝ အား မန္တလေးခရိုင် တရားသူကြီး ဒေါ်ခင်ခင်လှအား ပေးအပ်ခဲ့ကြောင်းနှင့် ထိုသို့ပေးအပ်ချိန်၌ ဒေါ်မာလာ လိုက်ပါသွားခဲ့ကြောင်း ဒေါ်မာလာက ဆိုသည်။
ထိုသို့ ပေးအပ်ခဲ့သော်လည်း ၂ဝ၁၄ ခုနှစ် ဧပြီ ၁ဝ ရက်က အပြီးသတ်စီရင်ချက် ချရာတွင် ဒေါ်ခင်မာလွင်နှင့် ဒေါ်နီနီထွေးအား ထောင်ဒဏ် ၁၂ နှစ်၊ ကိုမင်းသူရဇော် အား ထောင်ဒဏ် ၁၆ နှစ် ချမှတ်ခဲ့ကြောင်း၊ မန္တလေးခရိုင် တရားသူကြီး ဒေါ်ခင်ခင်လှမှ ကျပ်သိန်း ၁ဝဝ အား လာဘ်ငွေအဖြစ် ရယူ၍ များပြားသည့် ထောင်ဒဏ်ချမှတ်မှုအပေါ် ဦးခင်မောင်ထွေးက ပြောဆိုမှု ပြုလုပ်သဖြင့် ဦးခင်မောင်ထွေး၊ ဦးသူရရဲထွဋ်နှင့် ဒေါ်မာလာတို့အား ပုဒ်မ ၃၅၃၊ ၂၉၄၊ ၅ဝ၆ ဖြင့် မန္တလေးခရိုင်တရားရုံးမှ ရုံးအုပ်ဦးတင်မောင်ဝင်းက တရားလိုပြုလုပ်ကာ တရားစွဲဆို အမှုဖွင့်ခံခဲ့ရကြောင်း ဒေါ်မာလာက ပြောကြားသည်။
“ကျွန်မသားက မူးယစ်ဆေးဝါးကို ရပ်ကွက်ရုံးသွားအပ်လို့ အစိုးရသက်သေအနေ နဲ့ ပြန်လွတ်လာမှာ ပြောပါတယ်။ ကျွန်မတို့က ဆင်းရဲတော့ ရှေ့နေလည်း မငှားနိုင်ပါဘူး။ စီရင်ချက်ချတော့ တကယ်ရောင်းတဲ့သူတွေက ထောင် ၁၂ နှစ်ပဲကျပြီး ကျွန်မသားက ထောင် ၁၆ နှစ် ကျခံခဲ့ရတယ်။ စီရင်ချက်ချတဲ့နေ့မှာ သားကို ထောင် ၁၆ နှစ် အချခံရတော့ ကျွန်မမူးလဲသွားတယ်။ ဒါပေမဲ့ ပုဒ်မ ၃၅၃ နဲ့ အမှုဖွင့်ခံရတယ်။ အခုဆို ကျွန်မသမီးက ရုံးအုပ်စော်ကားလို့ ဗိုက်ကြီးနေတယ်။ သားကလည်း ထောင် ၁၆ နှစ် အကျခံရတယ်။ ကျွန်မကိုလည်း တရားစွဲထားတယ်။ မတရားခံရတာပါ” ဟု ဒေါ်မာလာက ငိုရှိုက်၍ ပြောကြားသည်။
အဆိုပါ ဖြစ်ရပ်အတွက် မ..........က အဓမ္မပြုကျင့်ခံရသူ မ...........က အဓမ္မ ပြုကျင့်ခံရသည့် မြို့နယ်ဖြစ်သည့် ပြင်ဦးလွင် မြို့မရဲစခန်း၌ မေ ၂၁ ရက်က အမှုဖွင့်တိုင်ကြားရာ ရဲစခန်းက ပ/၁ဝ၇ ပုဒ်မ ၃၇၆ ဖြင့် အမှုဖွင့်ခဲ့ကြောင်း သိရသည်။
အမှုဖွင့်ပြီးနောက် ရဲစခန်းမှ စခန်းမှူး ဒုရဲမှူးဦးကံလှိုင်ကိုယ်တိုင် ဦးဆောင်၍ သွားရောက်ဖမ်းဆီးရာ မန္တလေးခရိုင် တရားသူကြီး ဒေါ်ခင်ခင်လှက တရားရုံးအတွင်း ဖမ်းဆီးခွင့် မပြုနိုင်ကြောင်း ပြောဆိုကာ ဦးတင်မောင်ဝင်းအား ခွင့်တစ်လ ပေးခဲ့သဖြင့် ရဲစခန်းမှလက်ရှိ အချိန်အထိ ဖမ်းဆီးနိုင်မှု မရှိခဲ့ကြောင်း မြန်မာနိုင်ငံ အလုပ်သမား သမဂ္ဂများအဖွဲ့ချုပ် ဗဟိုအကြံပေး ဦးရန်နိုင်ထွေး၊ ဒေါ်မာလာနှင့် မ.......က ပြောကြားသည်။
“ရဲက ရဲလုပ်ငန်း ကုန်စင်အောင်လုပ်ပြီးတော့ တရားခံကို လိုက်ဖမ်းပါတယ်။ တရားခံဖြစ်တဲ့ ဦးတင်မောင်ဝင်းက ခရိုင်တရားရုံးရဲ့ ရုံးအုပ်ဖြစ်တဲ့အတွက် သူရုံးတက်တဲ့အချိန်မှာ သွားဖမ်းပါတယ်။ အဲ့ဒါကို ခရိုင်တရားသူကြီး ဒေါ်ခင်ခင်လှက သူ့ရုံးထဲမှာ လာမဖမ်းရဘူး။ ငါ့ရုံးထဲမှာ ဖမ်းခွင့်မပေးနိုင်ဘူး။ စစ်ချင်ရင် ရုံးထဲမှာပဲ စစ်ပါဆိုပြီး ရဲလုပ်ငန်းကို ဝင်နှောင့်ယှက်ပါတယ်။ ငါ့စီရင်ပိုင်ခွင့်ဆိုတဲ့ ပုံစံမျိုးလုပ်ပါတယ်။ ရဲတွေပြန်သွား ရပါတယ်။ ပြင်ဦးလွင်မြို့မရဲစခန်းက စခန်းမှူးကိုယ်တိုင် ဝင်ဖမ်းတာပါ။ အဲဒီလိုဖြစ်တော့ စခန်းမှူးက သူနဲ့တင်မပြီးတော့လို့ ခရိုင်တရားသူကြီး ဝင်ပါနေတဲ့ကိစ္စ၊ အကာအကွယ်ပေးနေတဲ့ ကိစ္စကို အထက်ကိုတင်ပြလိုက်တော့ အထက်ဖိအား ရောက်လာတဲ့အချိန်မှာ ခရိုင်တရားသူကြီးက မုဒိမ်းတရားခံ ဖြစ်နေတဲ့ ဦးတင်မောင်ဝင်းကို ခွင့်တစ်လ ပေးလိုက်ပါတယ်။ အဲဒါက တရားခံကို အားပေးကူညီလိုက်တာ ဖျောက်ဖျက်လိုက်တာပါ။ အဲဒီမှာ တရားခံဖြစ်နေတဲ့ ဦးတင်မောင်ဝင်းက သူကိုယ်တိုင် ဒေါ်မာလာတို့ကို အမှုဖွင့်ထားတဲ့အတွက် တရားရုံးကို မလာလို့ မရတော့ဘူး။ တရားရင်ဆိုင်တဲ့ အပတ်တိုင်းမှာ မုဒိမ်းတရားခံကို ဖမ်းဖို့လာနေပါတယ်။ အဲဒီလိုဖြစ်တဲ့အဆုံး ဦးတင်မောင်ဝင်းက ကြံရာမရဖြစ်ပြီး မဘသဆရာတော် ဦးဝီရသူကို လီဆည်ပြီး တိုင်ပါတယ်။ မဘသဆရာတော်တွေရဲ့ အကာအကွယ်ကို ယူထားပါတယ်” ဟု မြန်မာနိုင်ငံ အလုပ်သမားသမဂ္ဂများ အဖွဲ့ချုပ် ဗဟိုအကြံပေး ဦးရန်နိုင်ထွေးက ပြောကြားသည်။
အထက်ပါ ဖြစ်ရပ်များအတွက် ပြင်ဦးလွင်မြို့မ ရဲစခန်းမှ စခန်းမှူး ဒုရဲမှူးဦးကံလှိုင်အား လက်ရှိရာထူးနှင့် ဖြစ်ရပ်များအပေါ် ဇူလိုင် ၃ ရက်က ဆက်သွယ်မေးမြန်းရာ တာဝန်ကျရဲဝန်ထမ်းက ဖြစ်ရပ်အား သိရှိမှုမရှိကြောင်းနှင့် ဦးကံလှိုင်မှာ အပြင်သို့သွားကြောင်း၊ ဦးကံလှိုင်၏ လက်ကိုင်ဖုန်းနံပါတ်အား EMG မှ မေးမြန်းသော်လည်း ဖုန်းချသွားခဲ့သည်။ ထပ်မံဖုန်းခေါ်၍ မေးမြန်းရာတွင်လည်း မကြားရကြောင်းသာ ပြောဆို၍ ဖုန်းချသွားခဲ့သည်။
မဘသဆရာတော် ဦးဝီရသူက မုဒိမ်းမှုဖြင့် အမှုဖွင့်ခံရသူ ဦးတင်မောင်ဝင်းအား အကာအကွယ် ပေးထားသည် ဆိုသည့်အပေါ် ဆရာတော် ဦးဝီရသူအား ဇူလိုင် ၃ ရက်က ဆက်သွယ်မေးမြန်းရာ ဆရာတော် စာချနေကြောင်းသာ ပြန်လည်ဖြေခဲ့သည်။
မန္တလေးခရိုင်တရားသူကြီး ဒေါ်ခင်ခင်လှအား ကျပ်သိန်း ၁ဝဝ လာဘ်စားသည်ဆိုခြင်း၊ မန္တလေးခရိုင်တရားရုံးအုပ် ဦးတင်မောင်ဝင်းအား အကာအကွယ်ပေးသည်ဟုဆိုခြင်း၊ ဦးတင်မောင်ဝင်းအား မုဒိမ်းမှုပုဒ်မဖြစ်သည့် ပုဒ်မ ၃၇၆ ဖြင့် အမှုဖွင့်ခံထားရခြင်း စသည့်အချက်အလက် များအတွက် ဒေါ်ခင်ခင်လှနှင့် ဦးတင်မောင်ဝင်းအား တုံ့ပြန်ပြောဆိုနိုင်ရန် ဦးတင်မောင်ဝင်း ကိုင်ဆောင်သည့် လက်ကိုင်ဖုန်းသို့ ဇူလိုင် ၃ ရက်က အကြိမ်များစွာ ဆက်သွယ်ရာ ဖုန်းမအားကြောင်းသာ အမြဲမပြတ် ဖြေဆိုမှုကို ကြုံခဲ့ရသည်။
မြန်မာနိုင်ငံ၏ တရားစီရင်ရေးနှင့်ဆိုင်သည့် တရားရေးဝန်ထမ်းများအား မြန်မာနိုင်ငံအမျိုးသား လူ့အခွင့်အရေးကော်မရှင်နှင့် လွှတ်တော်တွင်း တိုင်ကြားမှုများရှိနေပြီး အများဆုံး တိုင်ကြားခံနေရသည်။
လတ်တလော၌ပင် စစ်ကိုင်းတိုင်းဒေသကြီး မုံရွာမြို့နယ် တရားသူကြီးအဖြစ် တာဝန်ထမ်းဆောင်ခဲ့သူ ဒေါ်ခင်လဲ့လဲ့အား ကျပ်သိန်း ၅ဝ လာဘ်ယူမှုဖြင့် ပြည်ထောင်စု တရားလွှတ်တော်ချုပ်က ဖျာပုံမြို့ ဒုတိယမြို့နယ် တရားသူကြီးအဖြစ် ရာထူးသုံးနှစ်လျှော့ချသည့် ဖြစ်စဉ်တစ်ခု ယခုနှစ် ဇွန် ၁၆ ရက်က ဖြစ်ပွားခဲ့ကြောင်း သိရသည်။
အဓမ္မပြုကျင့်ခံရသူ၏ မိသားစုက ရန်ကုန်မြို့ရှိ မြန်မာဂျာနယ်လစ်ကွန်ရက် ရုံးခန်း၌ ရှင်းလင်းနေစဉ်
Eleven Media group
No comments:
Post a Comment