လိပ်ကျွန်း လူသတ်မှုနဲ့ပတ်သက်ပြီး တရားစီရင်ရေး ဖြစ်စဉ်တွေမှာဗြိတိန်နဲ့ မြန်မာနိုင်ငံက လေ့လာစောင့်ကြည့်တဲ့ အဖွဲ့တွေ ကို ထိုင်းဘက်က မူအရ ခွင့်ပြုဖို့ သဘောတူလိုက်ပါပြီ။
ထိုင်းနိုင်ငံ ဘန်ကောက်မြို့မှာ မနေ့ အောက်တိုဘာလ ၁၄ ရက်နေ့က ထိုင်းဘုရင့်ရဲတပ်ဖွဲ့ ရဲချုပ် ရဲဗိုလ်ချုပ် မစ္စတာ ဆုမ်ယွတ် ပွန်ပန်မွမ် (Somyot Pumpanmuang) ၊ ထိုင်းနိုင်ငံဆိုင်ရာ မြန်မာသံအမတ် ဦးဝင်းမောင် နဲ့ ထိုင်းနိုင်ငံဆိုင်ရာ ဗြိတိန် သံအမတ် မစ္စတာ မာ့ခ်ကဲန့် တို့ ၃ ပွင့်ဆိုင် ၃ နာရီကြာ ဆွေးနွေး အပြီး လိပ်ကျွန်း လူသတ်မှု တရားခွင်တွေကို လေ့လာစောင့်ကြည့်ဖို့ မူအရ သဘောတူခဲ့တာပါဘဲ။
လိပ်ကျွန်း လူသတ်မှု တရားခွင်ကို ဘယ်လို လေ့လာစောင့်ကြည့်မယ်ဆိုတဲ့ အသေးစိပ်ကိုတော့ ဆက်လက်
ဆွေးနွေး သွား ကြ မှာဖြစ်တယ်လို့ ဒီကနေ့ထုတ် ဘန်ကောက်ပို့စ်သတင်းစာက ဖော်ပြထားပါတယ်။
မနေ့ကပဲ ဗြိတိန် လက်ထောက်နိုင်ငံခြားရေး ဝန်ကြီးက လန်ဒန်မှာ ရှိတဲ့ ထိုင်းသံရုံး တာဝန်ခံကို ပေးတဲ့ သတိထောက်စာပါ သဘောတရားကို ထိုင်း ဝန်ကြီးချုပ် ဗိုလ်ချုပ်ကြီး ပရာယုဒ်ချန်အိုချာ လက်ခံပေမယ့် လန်ဒန်က ထိုင်းယာယီ သံရုံးတာဝန်ခံ ကို ဆင့်ခေါ် မေးမြန်းခံရတယ်ဆိုတာကိုတော့ ငြင်းဆိုတဲ့အကြောင်း ဘန်ကောက်ပို့စ်က ဆိုပါတယ်။
ဗြိတိန် လက်ထောက်နိုင်ငံခြားရေး ဝန်ကြီးက ပေးပို့တဲ့ သတိထောက်စာမှာ လိပ်ကျွန်း လူသတ်မှု စုံစမ်း စစ်ဆေးရေး ကိစ္စ ကို ထိုင်း အာဏာပိုင်တွေ ဘယ်လို ကိုင်တွယ်ခဲ့တယ်ဆိုတာ ဗြိတိန်မှာ တကယ်ပဲ စိုးရိမ်မှု တခု ရှိနေတဲ့အကြောင်းပါဝင်ပါတယ်။
ဗြိတိန် လက်ထောက်နိုင်ငံခြားရေး ဝန်ကြီးက လိပ်ကျွန်း လူသတ်မှုကိစ္စ စုံစမ်းစစ်ဆေးမှုတွေမှာ ဗြိတိန် ရဲတပ်ဖွဲ့ကလည်း ကူညီဖို့ အဆင်သင့်ရှိတဲ့အကြောင်း ပြောဆိုထားသလို ဗြိတိန်အစိုးရနဲ့ သေဆုံးသူ မိသားစုတွေကလည်း စုံစမ်းစစ်ဆေးမှု ဖြစ်စဉ် တိုးတက်မှုတွေကို အချိန်နဲ့အမျှ လက်ခံရရှိလိုတယ်လို့ လည်း ပြောဆိုထားပါတယ်။
အောက်တိုဘာလ ၁၄ ရက်နေ့မှာပဲ လိပ်ကျွန်း လူသတ်မှု ကိစ္စနဲ့ပတ်သက်ပြီး အစိုးရသက်သေ အဖြစ်
မောင်မောင်အပါအဝင်မြန်မာ အလုပ်သမား ၃ ဦးတို့ဟာ ကော့စမွီ တရားရုံးမှာ ကြိုတင်စစ်ဆေး ထွက်ဆို ချက် ပေးခဲ့တာမှာ အခင်းဖြစ်ညက သူတို့ရဲ့ လှုပ်ရှားသွားလာမှု တွေကို ပြောဆိုသွားပြီး ထွက်ဆိုချက်တွေ ဟာ မောင်ဇော်လင်းနဲ့ မောင်ဝင်းဇော်ထွန်းတို့ကို လူသတ်မှုကျူးလွန်ကြောင်း စွဲဆိုထားတဲ့ အမှုအတွက် အထမမြောက်ဘူးလို့ သိရပါတယ်။
အိမ့်သံစဉ်
ဧရာဝတီ
No comments:
Post a Comment