Friday, September 28, 2012

လွှတ်တော်ကိုယ်စားလှယ်များပင် စစ်ဆေးမေးမြန်းမှုခံနေရသည့် ဧရာဝတီတိုင်း

ဧရာဝတီတိုင်းလွှတ်တော်အတွင်း အဆိုတင်သွင်းမေးမြန်းခဲ့သော လွှတ်တော်ကိုယ်စားလှယ်အချို့မှာ စစ်ဆေးမေးမြန်းမှုများနှင့်ကြုံတွေ့ ခဲ့ရသည်ဟု တိုင်းလွှတ်တော်ဥက္ကဌဦးဆန်းဆင့်က ဆိုသည်။
စက်တင်ဘာလ(၂၄)ရက်နေ့ ဧရာဝတီတိုင်းတိုင်း လွှတ်တော်အစည်းအဝေးခန်းမတွင် ကျင်းပသော တိုင်းလွှတ်တော် အထူးကိစ္စ ရပ်များဆိုင်ရာအစည်းအဝေးတွင် တိုင်းလွှတ်တော်ဥက္ကဌက ပြောကြားခဲ့ခြင်း ဖြစ်သည်။

ထိုသို့ပြောဆိုရာတွင် ရဲတပ်ဖွဲ့ဝင်များ အက်ဥပဒေပုဒ်မ(၃၅)ကို ပြဌာန်းချက်အတိုင်း အရေးယူဆောင်ရွက်ရန်အဆိုကို တင်သွင်း ခဲ့သော မြောင်းမြမဲဆန္ဒနယ်(၁) ကိုယ်စားလှယ်ဦးပြုံးချို၏ ကိုယ်ရေးအချက်အလက်များကိုဆွေးနွေးပြီး နံနက်(၂)နာရီခွဲ တွင် မြောင်းမြ ပြည်ခိုင်ဖြိုးအတွင်းရေးမှူးအိမ်တွင် သွားရောက်မေးမြန်းစစ်ဆေးခြင်းခံခဲ့ရကြောင်း သိရှိရသည်။

အလားတူ လ၀က ၀န်ထမ်းအချို့မှ သန်ခေါင်စာရင်းတစ်စောင်အား ကျပ်(၅၀၀)(၁၀၀၀) တောင်းသည့် ကိစ္စကို မေးခွန်းမေးမြန်း ရန် ပြင်ဆင်ထားစဉ် ငပုတောကိုယ်စားလှယ် ဦးအေးကြည်ကိုလည်း စစ်ဆေးရေးအဖွဲ့ တစ်ဖွဲ့ က ဘာကြောင့် ထိုကဲ့သို့ မေးခွန်း မျိုးမေးမြန်းရသည်ဆိုသည်ကို ဖိအားပေး စစ်ဆေးခံခဲ့ရမှုများလည်း ရှိကြောင်း တိုင်းဥက္ကဋ္ဌက ထည့်သွင်းပြောကြားခဲ့ခြင်းဖြစ်သည်။
ဧရာဝတီတိုင်းအတွင်းတွင် ထိုကဲ့သို့ နောက်ယောင်ခံစစ်ဆေးမှုများအား သတင်းသမားများနှင့် လူ့အခွင့်အရေး လှုပ်ရှားသူများလည်း ပြုလုပ်ခြင်းခံနေရကြောင်း သိရှိရသည်။
 ကျွန်တော်ဆို အိမ်မှာ မရှိတဲ့အချိန် မိသားစုဆီကို နယ်ထိန်းရဲတစ်ယောက်ကလာပြီးတော့ မှတ်ပုံတင် နံပါတ် တွေ သန်ခေါင်စာရင်းတွေ ယူသွားတာမျိုး လုပ်တဲ့အထိရှိတယ်ဟု ပြည်တွင်းပုံနှိပ်မီဒီယာတစ်ခုတွင် လုပ်ကိုင် နေသူ နယ်သတင်းထောက်တစ်ဦးက ပြောသည်။
ကျွန်တော်လည်း ထစ်ခနဲရှိ အိမ်နားကို ရဲတွေ ကင်းပုန်းချပြီး စောင်ခိုင်းတာမျိုးတွေ ခဏခဏကြုံရတယ်ဟုလူ့အခွင့်အရေးစောင့် ကြည့်ကာကွယ်ရေးကွန်ယက် (HRWDN) ခေါင်းဆောင်တစ်ဦးဖြစ်သည့် ကိုမြင့်နိုင် ကလည်း ပြောသည်။
ထိုကဲ့သို့ဖြစ်ရပ်များကို ဧရာဝတီတိုင်းလွှတ်တော်ဥက္ကဌက မိမိကိုယ်တိုင် ကျုံပျော်၊ ကန်ကြီးဒေါင့်၊ ရေကြည်ခရီးစဉ်များတွင် ရဲနယ်ထိန်းက မိမိ၏အပြန်တွင် ဒီပုဂ္ဂိုလ်ကြီး ဘာလာလုပ်သလဲ၊ ဘာပြောသွားသလဲဟု မေးမြန်း ခြင်းများရှိနေသည်ဟူ၍လည်း ကြားရကြောင်း သတင်းစာရှင်းလင်းပွဲတွင် ထုတ်ဖော်ပြောဆိုထားသည်။
ဖွဲ့စည်းပုံအခြေခံဥပဒေပုဒ်မ(၃၅၃)မှာတော့ မည်သူ့ကိုမှ တည်ဆဲဥပဒေနှင့်အညီမှ တစ်ပါးအသက်ကိုဖြစ်စေ၊ ပုဂ္ဂိုလ်ဆိုင်ရာ လွတ်လပ်မှုကိုဖြစ်စေ နစ်နာဆုံးရှုံးမှု မရှိစေရဆိုတာပါတဲ့အတွက် ဒီလုပ်ရပ်တွေဟာ အခြေခံဥပဒေနဲ့ငြိနေတယ်ဆိုတာ လုပ်ဆောင်နေတဲ့ အဖွဲ့အစည်းတွေအနေနဲ့ သိထားသင့်ပါတယ်ဟု ဧရာဝတီတိုင်းဒေသကြီးလွှတ်တော် ဥက္ကဌဦးဆန်းဆင့် က ပြောကြားခဲ့သည်။
ဧရာဝတီတိုင်းလွှတ်တော်သည် တိုင်းဝန်ကြီးချုပ်ဦးသိန်းအောင်နှင့် ၀န်ကြီးဦးသန်းထွန်းတို့ကို ပြီးခဲ့တဲ့လအတွင်းက ပြုလုပ်ခဲ့တဲ့ အစည်းအဝေးတွင် စွပ်စွဲပြစ်တင်မှုလုပ်ခဲ့ပြီး လွှတ်တော်ကို တောင်းပန်စေခဲ့သော်လည်း အဆိုပါ(၄)ရက်ကြာ ပြုလုပ်ခဲ့တဲ့အစည်း အဝေးကို တိုင်းဝန်ကြီးချုပ်က တစ်ရက်မှ တက်ရောက်ခဲ့ခြင်းမရှိသည့်အတွက် ထိုကိစ္စကို မကြာမီကျင်းပမည့်လွှတ်တော်အစည်းအဝေး တွင်ပြုလုပ်စေရန် ဆုံးဖြတ်ထားကြောင်းကိုလည်း တိုင်းလွှတ်တော်မှ တာဝန်ရှိသူများထံက သိရှိရသည်။
From-မြစ်မခ

No comments:

Post a Comment