SSA နှင့် အစိုးရတပ် တပါတ်အတွင်း တိုက်ပွဲ လေးကြိမ်ဖြစ်ခဲ့

စံခလပူရီ (မဇ္ဈိမ) ။ ။ အပစ်အခတ် ရပ်စဲထားသည့် ၎င်းတို့၏ တပ်စခန်းကို အစိုးရတပ်များက တပတ်အတွင်းလေးကြိမ် လာရောက် တိုက်ခိုက်မှု ဖြစ်ပွားပြီးနောက် စစ်တပ်အပေါ် အစိုးရ၏ သြဇာ သက်ရောက်မှု မရှိသည်မှာ ပိုမို ထင်ရှားသွားပြီ ဖြစ်ကြောင်း ရှမ်းပြည် တပ်မတော် (တောင်ပိုင်း) RCSS/SSA-S က ပြောသည်။

“ကျနော်တို့ မြင်တာက တပ်နဲ့ အစိုးရ တခြားစီ ဖြစ်နေပါပြီ။ ဦးအောင်မင်းကလည်း သတင်းစဉ် အင်တာဗျူးတခုမှာ တပ်ကိစ္စကို သူပါဝင် စွက်ဖက်လို့ မရဘူး ဆိုတဲ့အကြောင်း ပြောတာ ကျနော်တို့ ကြားသိရပါတယ်။ ကျနော်တို့ ရှမ်းပြည်နယ် အစိုးရကလည်း တပ်ကို အမိန့်ပေးလို့ မရဘူးဆိုတာ ပိုပြီး ထင်ရှားနေပါပြီ” ဟု SSA ပြောခွင့်ရ စိုင်းလောင်းဆိုင် က ပြောသည်။

ပြီးခဲ့သည့် သီတင်းပတ်အတွင်း ရှမ်းပြည်နယ် တောင်ပိုင်း၊ လွယ်လင်ခရိုင်၊ မိုင်းကိုင်မြို့နယ် ဆားတောကျေးရွာအနီး၊
မောက်မိုင်မြို့နယ် ဝမ့်မိုင်ညူကျေးရွာအနီး၊ မိုင်းပြင်းမြို့နယ် မိုင်းပူးအွန်ဒေသနှင့် မိုင်းတုံမြို့နယ်အတွင်းတွင် နှစ်ဖက် တိုက်ဖွဲ့ကြား တိုက်ပွဲ လေးကြိမ် ဖြစ်ပွားခဲ့သည်ဟု ဆိုသည်။

တိုက်ပွဲ ဖြစ်ပွားသည့်နေရာမှ တပ်စခန်းများသည် အပစ်အခတ် မရပ်စဲမီကပင် မိမိတို့ အခြေချခဲ့သည့် တပ်စခန်းများ
ဖြစ်သည်ဟု SSA က ပြောသည်။

တိုက်ပွဲလေးခုအတွင်း အစိုးရတပ်မှ ၁ဝ ဦးထက်မနည်း ကျဆုံးပြီး၊ ၃ဝ ကျော် ဒဏ်ရာ ရရှိကြောင်း၊ မိမိတို့ဘက်မှ ထိခိုက် ကျဆုံးမှု မရှိကြောင်း SSA ဘက်က ပြောသော်လည်း၊ ဒေသခံများကမူ တိုက်ပွဲကြောင့် နှစ်ဖက်လုံးမှ ထိခိုက် ကျဆုံးမှု ရှိကြောင်း ပြောသည်။

၂ဝ၁၁ ခုနှစ်၊ ဒီဇင်္ဘာလ ၂ ရက်နေ့တွင် ပြည်နယ် အစိုးရနှင့် အပစ်အခတ် ရပ်စဲခဲ့သည့် RCSS/SSA သည် အပစ်အခတ် ရပ်စဲချိန်မှ စ၍ နှစ်ဘက်ကြား တိုက်ပွဲပေါင်း ၃၅ ကြိမ်ထက်မနည်း ဖြစ်ပွားခဲ့သည်။

အလားတူ အခြား အပစ်ရပ် ရှမ်းတပ် တခုဖြစ်သည့် ရှမ်းပြည် တပ်မတော် (မြောက်ပိုင်း) SSPP/SSA-N သည်လည်း ဇန်နဝါရီလ ၁၇ ရက်နေ့ အပစ်အခတ် ရပ်စဲချိန်မှ စ၍ အစိုးရတပ်နှင့် အကြိမ် ၃ဝ ခန့် တိုက်ပွဲများ ဖြစ်ပွားခဲ့သည်။