Friday, March 22, 2013

မိထ္တီလာမြို့လယ် ဈေးဆိုင်ခန်းများနှင့် အဆောက်အအုံများ မီးလောင်

မနက် ၁၀ နာရီ ၃၀ မိနစ်
မိထ္တီလာမြို့လယ်ဈေးပတ်လမ်းနား၊ နာရီစင်အနီးအနားပတ်ဝန်းကျင်ရှိ ဈေးဆိုင်ခန်းများ၊ အဆောက်အအုံများ မီးလောင်ကျွမ်းနေပြီး အာဏာပိုင်များက မီးကို ကြိုးစားငြိမ်းသတ်နေရကြောင်း ဧရာဝတီသတင်းထောက်က သတင်းပေးပို့သည်။

"ဆိုင်ခန်းတွေနဲ့ အဆောက်အအုံတွေ အများကြီး မီးလောင်နေတယ်။ မီးလောင်နေတဲ့ အဆောက်အအုံထဲမှာ ဗလီတခုလည်းရှိနေတယ်။ ရပ်ကွက်သူ ရပ်ကွက်သားတွေနဲ့ အာဏာပိုင်တွေပေါင်းပြီး မီးကို ကြိုးစားငြိမ်းနေ ကြတယ်။ ဘယ်သူတွေရှို့လဲတော့မသိဘူး။ ဒေသခံတွေက အဲလို မီးရှို့မှုတွေမဖြစ်စေချင်ဘူး။ မန္တလေးတိုင်း ၀န်ကြီးချုပ် ဦးရဲမြင့်လည်း မီးလောင်တဲ့နေရာကို ရောက်နေတယ်။ အုပ်စုဖွဲ့တိုက်ခိုက်တာတွေ၊ သတ်ဖြတ် တာတွေတော့ ဒီနေ့မနက်ပိုင်းအထိ မကြားရသေးဘူး" ဟု ဧရာဝတီသတင်းထောက် က ပြော သည်။

မီးလောင်မှုကို အာဏာပိုင်များက ကြိုးစားငြိမ်းသတ်နေရသော်လည်း မီးညွှန့်ကျိုးအောင်ပင် မနည်းငြိမ်း သတ်နေရသည်ဟု သိရှိရသည်။

မိထ္တီလာမြို့သို့ ရောက်ရှိနေသော ပြည်တွင်းပြည်ပသတင်းထောက်များ၏ ကင်မရာများ အသိမ်းခံရခြင်း၊ ရိုက်ထားသော ဓာတ်ပုံများကို ဖျက်ခိုင်းခြင်းကို အုပ်စုဖွဲ့ထားသော လူအုပ်စုတခုက လုပ်ဆောင်နေပြီး ယင်းလူအုပ်တွင်ဦးဆောင်သူအချို့မှာ ရဟန်းနှင့်ကိုရင်များပါဝင်နေကြောင်း ကင်မရာအသိမ်းခံရသူ သတင်းထောက်တဦးက ဧရာဝတီသို့ အတည်ပြုပြောသည်။

မိထ္တီလာမြို့၏ လုံခြုံရေးအခြေအနေမှာ တမြို့လုံးသို့ လွှမ်းခြုံနိုင်ခြင်းမရှိဟု ဒေသခံများနှင့်သတင်းထောက် များထံ မေးမြန်းချက်များအရ သိရှိရသည်။
Irrawaddy (Burmese Version)
 

No comments:

Post a Comment