ကချင်ပြည်နယ် ဗန်းမော်ခရိုင် လွယ်ဂျယ်မြို့နယ် ခွဲ၏ တောင် ဘက် တောင်ပေါ် ဘုန်းကြီးကျောင်း ၀န်းအတွင်း၌ တည်ထား ကိုးကွယ် ထားသော သကျမုနိဆုတောင်းပြည့်ဘုရားရှိ ဗုဒ္ဓ ဆင်းတုတော်များ၊ ရှင်သီဝလိရုပ်ပွားတော်၊ ဘုရားသမိုင်း ကျောက်စာ များနှင့် ကျောင်း ထိုင်ဆရာတော် ဘဒ္ဒန္တ၀ါရိန္ဒ၏ အသုံး အဆောင်ပစ္စည်များအား စက်တင်ဘာ လကုန်ပိုင်းတွင် ကချင် လွတ်လပ်ရေးတပ်မတော် (KIA) အဖွဲ့ဝင်များမှ လာရောက်ဖျက်ဆီးသွားခဲ့ကြောင်း ယင်းဒေသခံ ရှမ်းတိုင်းရင်းသား များထံမှ သိရသည်။
“ သကျမုနိဆုတောင်းပြည်ဘုရား နေ့နံထောင့်တွေက ဗုဒ္ဓဆင်းတုတော် ၈ ဆူ ၊ စေတီတော်မှာရှိတဲ့ ဗုဒ္ဓဆင်းတုတော် ၅ ဆူ စုစုပေါင်း (၁၃) ဆူပေါ့၊ ပြီးတော့ ရှင်သီဝလိ ရုပ်ပွားတော်တစ်ဆူနဲ့ ဘုရား သမိုင်းကျောက် စာတွေ လည်း ပါသွားတယ်၊ ဒီ ၂၀၁၃ ခုနှစ် စက်တင်ဘာလကုန် ပိုင်းလောက်မှာ KIA တပ်ဖွဲ့ဝင်တွေလာပြီး ဖျက်ဆီးသွားတာပါ၊ ဒီမှာနေတဲ့ ဒေသခံရှမ်း လူမျိုးအားလုံးက မကျေမနပ် ဖြစ်နေကြတာပဲ ” ဟု မြို့ခံရှမ်း တိုင်းရင်းသားတစ်ဦးက ပြောပြသည်။
၂၀၁၁ ခုနှစ် ဇွန်လပိုင်းတွင် KIA အဖွဲ့မှ ဆရာတော်များ၊ ဒေသခံ လူထုများ တောင်ပေါ် ဘုန်းကြီးကျောင်းနှင့် အနီးဝန်းကျင် သို့မလာနိုင်ရန် မိုင်းများထောင်ထားသောကြောင့် ၎င်းနေရာသို့ ဖြတ် သန်း သွားလာခြင်း မပြုရဲတော့ကြောင်း ၊ ကျောင်းထိုင် ဆရာတော်မှာလည်း တစ်ဖက် တရုတ်နိုင်ငံ ကျင်းဖုန်းမြို့ရှိ ဘုန်းတော်ကြီး ကျောင်း သို့ ပြောင်းရွှေ့ သတင်းသုံးနေထိုင်ခဲ့ရ ကြောင်း သိရှိရသည်။
“ ဘုန်းကြီးကျောင်းကို ဘယ်သူမှ မလာရဲအောင် KIA က မိုင်းတွေထောင်ပြီး ခြောက်လှန့်တယ်၊ ဆရာတော်လည်း မနေရဲ တော့တဲ့အတွက် အခွင့်ကောင်းယူပြီး KIA အဖွဲ့က အခုလို ဗုဒ္ဓဆင်းတုတော်တွေကို ဖျက်ဆီးပစ်တာပါ၊ ကျွန်တော်တို့ ဒေသခံ ရှမ်းတွေကိုးကွယ်ယုံကြည်တဲ့ ဘုရားဆင်းတုတော်တွေ ဖျက်ဆီး ခံရတာကိုတော့ လုံးဝမကျေနပ်ပါဘူး၊ သူတို့ မကိုးကွယ်လည်း ဘာသာရေးအဆောက်အဦးတွေနဲ့ ဘုရားကျောင်းကန်တွေကိုတော့ မဖျက်ဆီးသင့်ဘူးလေ ” ဟု၎င်းမြို့ခံ က ဆက်လက်ပြောပြသည်။
အဆိုပါ ကိစ္စနှင့်ပတ်သက်၍ လွယ်ဂျယ်မြို့နယ်ခွဲရှိ ဒေသခံ ၀န်ထမ်းတစ်ဦးအား မေးမြန်းကြည့်ရာ “KIA ရဲ့အခုလို လုပ်ရပ်ဟာ အစွန်းရောက်သွားပါပြီ၊ အာဖဂန် နစ္စတန်နဲ့ ဘင်္ဂလားဒေ့ရှ် နိုင်ငံတွေမှာ ဘာသာရေး အဆောက်အဦးတွေကို မွတ်ဆလင်အစွန်းရောက်တွေက ဗုံးခွဲတိုက်ခိုက်တာ ကြားဖူးပါတယ်၊ KIA လည်း မွတ်ဆလင် အစွန်းရောက်တွေရဲ့ လမ်းစဉ် ကို လိုက်ပြီး ကိုယ်မကိုးကွယ်လည်း အခြားတိုင်းရင်းသားတွေ ကိုးကွယ်တဲ့ ဘုရားဆင်းတုတော်တွေကို ဖျက်ဆီးရဲတာပေါ့၊ KIA ဗဟိုဌာနချုပ် လိုင်ဇာမှာ မွတ်ဆလင် အစွန်းရောက်အဖွဲ့တွေ ရောက်လာပြီး နောက်ပိုင်းမှ အခုဖြစ်စဉ်ဖြစ် သွားတာပါ၊ KIA ဟာ မွတ်ဆလင် အစွန်းရောက်တွေနဲ့ ပေါင်းပြီး၊ အကြမ်းဖက်လုပ်ရပ်တွေ လုပ်နေတာ ရှင်းနေတာပဲလေ၊ ဒေသခံရှမ်း လူမျိုးတွေ ကတော့ ဘုရားဆင်းတုတော်တွေနဲ့ ဘုရား သမိုင်းကျောက် စာတွေ ဖျက်ဆီးခံရလို့ အတော်လေး မကျေမနပ် ဖြစ်နေကြ တယ်လို့ ကြားတယ် ” ဟု ပြောကြားသွားပါသည်။
KIA အဖွဲ့မှ ဘာသာရေးနှင့် ပတ်သက်သော ဗုဒ္ဓဆင်းတုတော်များ အပါအ၀င် အခြားအဆောင်အယောင်များအား ဖျက်ဆီး ခဲ့မှုအပေါ် ဒေသခံရှမ်းတိုင်းရင်းသား များက ကျေနပ်မှု မရှိသဖြင့် သက်ဆိုင်ရာ ဌာနဆိုင်ရာ အဖွဲ့အစည်းများသို့ တင်ပြ တိုင်ကြားသွားရန် စီစဉ်နေကြကြောင်း ယင်းဒေခံ ရှမ်းတိုင်းရင်းသားအချို့၏ ပြောပြချက်အရ သိရှိရပါသည်။
စိုင်းအောင်ခမ်း
No comments:
Post a Comment