 |
| မိုးသည်းထန်စွာရွာသွန်းမှုကြောင့် ကလေးမြို့နယ် ဇင်းကလင်းကျေးရွာအနီးတွင် ချောင်းရေကြီးမှုဖြစ်ပေါ်နေသည်ကို တွေ့ရစဉ် |
ချင်းတောင်၊ ချင်းတောင်ခြေဒေသနှင့် ကဘော်ချိုင့်ဝှမ်းဒေသတို့မှာ နှစ်စဉ်မိုးရာသီကာလအတွင်း၌ လမ်းပန်းဆက်သွယ်ရေးခက်ခဲလျှက် ရှိနေဆဲဖြစ်ကြောင်း ဒေသခံများ၏ပြောကြားချက်အရ သိရသည်။
"မိုးရာသီဆိုရင် ဒီဘက်နယ်ကလမ်းတွေမကောင်းတော့ဘူး။ နှစ်စဉ်နှစ်တိုင်း မိုးရာသီဆိုရင် သွားလာရေးကခက်ခဲနေဆဲပဲ။ လမ်းတွေပြင်တယ်ဆိုပေမယ့် ကောင်းမလာသေးဘူး" ဟု ဒေသခံတစ်ဦးက ပြောကြားသည်။
ပြီးခဲ့သော သြဂုတ် ၂၉ ရက်ညပိုင်းက ဂန့်ဂေါ- ပုလဲ-မုံရွာလမ်း ပုံတောင်ပေါ်ရှိ သရက်ပင်ကွေ့တွင် မိုးရွာသွန်းမှုကြောင့် ကားများပိတ်လျက်ရှိပြီး ယခင်နှစ်များကဲ့သို့ ယခုနှစ်မိုးရာသီတွင်လည်း ပုံတောင်၊ ပုံညာတောင်ပေါ်များတွင် ကားလမ်းများ မကြာခဏပိတ်ဆို့မှုဖြစ်ပေါ်လျက်ရှိကြောင်း သိရသည်။
"ပုံတောင်ပုံညာတောင်ပေါ်မှာက မိုးရွာလိုက်တော့ လမ်းသားချဲ့တဲ့မြေတွေလမ်းပေါ်ရောက်ပြီး ရွှံ့တွေလိုဖြစ်နေတယ်။ အတက်ကားမောင်းရတာ အန္တရာယ်များလွန်းပါတယ်။ မိုးရာသီတစ်ရာသီလုံး မကြာခဏလမ်းပိတ်ဆို့ပါတယ်" ဟု သြဂုတ် ၂၉ ရက်က အဆိုပါလမ်းကိုဖြတ်သန်းသူ ကိုထွန်းကဆိုသည်။
သြဂုတ် ၃၀ ရက်တွင် ချင်းတောင်ခြေဒေသ၌ မိုးသည်းထန်စွာရွာသွန်းမှုကြောင့် ဇင်းကလင်းကျေးရွာနှင့် ဂျီတီစီကျောင်းကြားရှိ တံတားကွင်းလမ်းတွင် ရေမြုပ်ခဲ့ပြီး သွားလာမှုများ ခေတ္တပြတ်တောက်ခဲ့ရသည်။
"အဲဒီချောင်းလေးမှာ တံတားဆောက်နေတော့ ကွင်းလမ်းကတံတားလေးနဲ့သွားရတာ။ ဒါပေမဲ့ အဲဒီတံတားကလည်း တစ်ဖက်ကရေတိုက်စားနေပြီး တံတားပေါ်လည်း ရေတွေကျော်နေတော့ ကားတွေသွားမရဘူး။ ဆိုင်ကယ်တစ်စီး ကျပ် ၁၅၀၀ ပေးပြီး အထမ်းနဲ့ဖြတ်ရတယ်" ဟု ခရီးသွားတစ်ဦးကဆိုသည်။
ကလေးမြို့တွင် သြဂုတ် ၃၀ ရက်က ရွာသွန်းခဲ့သော မိုးရေချိန်မှာ ၃ ဒသမ ၆၆ လက်မရှိသည်ဟု မိုးဇလဌာနမှ သိရသည်။
ချင်းတောင်နှင့် ချင်းပြည်နယ်တို့၏ မြေပြန့်ဒေသနှင့်ဆက်သွယ်ရေးမှာ မိုးရာသီကာလတွင် ကလေး-ဂန့်ဂေါ-ပုလဲ- မုံရွာလမ်းနှင့် ကလေးဝမှတစ်ဆင့် ရေလမ်းခရီးတို့ကိုသာ ဒေသခံများအသုံးပြုမှုများပြားသည်ဟု သိရသည်။
eleven
No comments:
Post a Comment