အမေရိကန်နိုင်ငံ သမ္မတဘားရက် အိုဘားမား အပါအဝင် အာဆီယံထိပ်သီး အစည်းအဝေးမှ ခေါင်းဆောင်များ ရန်ကုန်မြို့တော်သို့ လာရောက်မည့် ခရီးစဉ် ရှိသဖြင့် နိုဝင်ဘာလ ဒုတိယပတ်မှ စတင်ကာ ရန်ကုန်တိုင်းဒေသကြီးကို အနီရောင်အဆင့် သတ်မှတ်ပြီး အရေးပေါ် လုံခြုံရေး တိုးမြှင့်ထားကြောင်း ရန်ကုန်တိုင်းဒေသကြီး ရဲတပ်ဖွဲ့မှူးရုံးထံမှ စုံစမ်းသိရှိရသည်။
ရန်ကုန်မြို့တော်တွင် အရေးပေါ် လုံခြုံရေး တိုးမြှင့်မှုအတွက် ရဲတပ်ဖွဲ့ အင်အား နှစ်သောင်းခန့် အသုံးပြုမည် ဖြစ်ပြီး အမှတ် (၂) လုံခြုံရေး ရဲကွပ်ကဲမှုမှ တပ်ဖွဲ့ခွဲများ၊ အထူးစုံစမ်းရေးအဖွဲ့၊ စစ်မြေပြင် အင်ဂျင်နီယာတပ်နှင့် ရဲတပ်ဖွဲ့တို့ရှိ မိုင်းရှင်းလင်းရေး တပ်ဖွဲ့များ၊ မြို့နယ် အထွေထွေ အုပ်ချုပ်ရေး အဖွဲ့များနှင့် မီးသတ်တပ်ဖွဲ့ဝင်များ ပါဝင်မည် ဖြစ်ကြောင်း အဆိုပါ ရဲတပ်ဖွဲ့မှူးရုံးမှ ရဲအရာရှိတစ်ဦးက ပြောကြားသည်။
“၂၄ နာရီ လုံခြုံရေးကို နိုဝင်ဘာ ၇ ရက်နေ့ကတည်းက စတင်ခဲ့တာ၊ ရန်ကုန် လေဆိပ်မှာ အင်တာပို အဖွဲ့နဲ့ ပူးပေါင်းပြီး ၉ ရက်နေ့ ကတည်းက အမြင့်ဆုံး လုံခြုံရေးအဆင့် စစ်ဆေးမှုတွေ ဆောင်ရွက်နေသလို သံရုံး၊ ဟိုတယ်၊ မိုတယ်တွေနဲ့ မြို့ဝင် မြို့ထွက် ကားဂိတ်၊ သင်္ဘောဆိပ်တွေပါမကျန် နေရာပေါင်းစုံမှာ ရဲအင်အား အပြည့်နဲ့ လုံခြုံရေး ဆောင်ရွက်နေတယ်၊ လုံခြုံရေးကိစ္စမို့ အသေးစိတ်ဘယ်လို ဆောင်ရွက်ထားတယ် ဆိုတာတော့ ပြောလို့ မဖြစ်ဘူး” ဟု ၎င်းက ဆက်လက် ပြောကြားသည်။
အရေးပေါ် လုံခြုံရေး တိုးမြှင့်ထားချိန် ရန်ကုန်တိုင်းဒေသကြီး အတွင်းရှိ မြို့နယ်များအတွင်း ဧည့်စာရင်း စစ်ဆေးမှုများအပြင် ဒေသန္တရ လုံခြုံရေးအတွက် စားသောက်ဆိုင်များနှင့် KTV ဆိုင်များ ကို ည ၁၀ နာရီ နောက်ပိုင်း ဆိုင်ပိတ်ရန် မှာကြားထားကြောင်း ရန်ကုန် အရှေ့ပိုင်းခရိုင်နှင့် အနောက်ပိုင်းခရိုင် အထွေထွေ အုပ်ချုပ်ရေးမှူးရုံးများထံမှ စုံစမ်းသိရှိရသည်။
“အကြမ်းဖက်သမားတွေ ဝင်လာလို့ အနီရောင်အဆင့် လုံခြုံရေး သတ်မှတ်တယ်ဆိုတာ မဟုတ်ပါဘူး၊ နိုင်ငံ့ခေါင်းဆောင်ကြီးတွေ လာရောက်မှာမို့လို့ အနီရောင်အဆင့် လုံခြုံရေး သတ်မှတ်ထားတာ” ဟု အနောက်ပိုင်းခရိုင် ရဲတပ်ဖွဲ့မှူးရုံးမှ ဒုတိယရဲမှူးကြီး ဝင်းကြည်က ရှင်းပြသည်။
နိုဝင်ဘာလ ၁၄ ရက်နေ့တွင် ရန်ကုန်သို့ လာရောက်မည့် အမေရိကန်နိုင်ငံ သမ္မတ အိုဘားမား ခရီးစဉ် လုံခြုံရေးအတွက် လမ်းကြောင်းများ ရှင်းလင်းရေး ကြိုတင်ဆောင်ရွက်လျက် ရှိကြောင်း၊ ရန်ကုန်မြို့တော်သို့ လာရောက် လည်ပတ်မည့် နိုင်ငံတကာ ခေါင်းဆောင်များ၏ လုံခြုံရေးအတွက် ရဲမှူးကြီးများက အနီးကပ် လုံခြုံရေး ဆောင်ရွက်မည် ဖြစ်ကြောင်း ရန်ကုန်တိုင်းဒေသကြီး ရဲတပ်ဖွဲ့မှူးရုံးထံမှ သိရှိရသည်။
“လူဦးရေ အများဆုံး နေထိုင်တဲ့ ရန်ကုန်တိုင်းဒေသကြီးမှာက ပြဿနာမျိုးစုံ၊ မှုခင်းဖြစ်ရပ်မျိုးစုံ မကြာခဏ ဖြစ်ပွားပေမယ့် အဆိုးဆုံး အခြေအနေထိ ဖြစ်မသွားရအောင် သက်ဆိုင်ရာ အဖွဲ့တွေက အချိန်ပြည့် ကြိုတင်ကာကွယ်မှုနဲ့ တားဆီး နှိမ်နင်းမှုတွေကို အသင့်အနေအထား ဆောင်ရွက်ထားပါတယ်၊ အခုလို နိုင်ငံ လုံခြုံရေးအဆင့် ဆောင်ရွက်နေချိန်မှာလည်း ရန်ကုန်တိုင်းဒေသကြီးအတွက် လုံခြုံရေးအင်အားက အပြည့်ရှိပါတယ်” ဟု ရန်ကုန်တိုင်းဒေသကြီး နယ်စပ်ရေးရာနှင့် လုံခြုံရေးဝန်ကြီး ဗိုလ်မှူးကြီး တင်ဝင်းက ပြောကြားသည်။
ရန်ကုန်တိုင်းဒေသကြီး အတွင်းရှိ ခရိုင်လေးခုမှ လုံခြုံရေးရဲအင်အား၊ ရဲတပ်ရင်း (၇) ခုမှ ရဲအင်အားတို့ စုပေါင်းလျှင် ရဲတပ်ဖွဲ့ဝင် သုံးသောင်းနီးပါး ရှိကြောင်း၊ အနီရောင်အဆင့် လုံခြုံရေးကာလအတွင်း တပ်မတော် (လေ) မှ နေ့စဉ် ကင်းလှည့် စစ်ဆေးမှုများ ဆောင်ရွက်မည် ဖြစ်ပြီး မြို့နယ်များအနှံ့ လုံခြုံရေး လှည့်ကင်းများ ဆောင်ရွက်ရာတွင် အသွင်ယူ စုံစမ်းစစ်ဆေးမှုများပါ ပါဝင်မည် ဖြစ်ကြောင်း ရန်ကုန်တိုင်းဒေသကြီး ရဲတပ်ဖွဲ့မှူးရုံးရှိ လုံခြုံရေးနှင့် ကွပ်ကဲမှူးရုံးထံမှ သိရှိရသည်။
The Voice Weekly
No comments:
Post a Comment