အလုပ်သမားများအတွက် အနည်းဆုံးအခကြေးငွေ အမြန်ဆုံးသတ်မှတ်ပေးရန် ဖိအားပေးမှုများရှိနေ ချိန်တွင် လွှတ်တော်အမတ်များ လစာတစ်လ ကျပ် ၁၀သိန်း တိုးမြှင့်ခံစားရန် အတည်ပြုခဲ့သည်။ မကြာမီမှာပင် အစိုးရ၀န်ထမ်းများ လစာတိုးမြှင့်ရေးအသံကလည်း ကျယ်ကျယ်လောင်လောင် ထွက်ပေါ် လာသည်။ ၀န်ထမ်းများ အခြေခံလစာ ကျပ်တစ်သိန်းခွဲနှင့် အမြင့်ဆုံး ကျပ် ဆယ့်နှစ်သိန်းထိ တိုးပေးရန် ဆွေးနွေးနေသည်ဆိုခြင်းကြောင့် ပြည်သူတို့၏ ကုန်ဈေးနှုန်းခြောက်အိပ်မက်က တစ်စတစ်စ ကြီးထွားလာပါပြီ။ ကျွဲကူးရေပါဖြစ်လာမည့် ကုန်ဈေးနှုန်းမြင့်တက်မှုက အလုပ်သမား လူတန်းစားများ အတွက်သာမက အလုပ်ရှင်များအတွက်ပါ တစ်ပူပေါ် နှစ်ပူဆင့်မည့်အနေ အထားဖြစ်သည်။
ဦးရဲဝင်းအောင်
(ဝင်းလျှပ်စစ်၊ စက်မှု၊ မန္တလေး)
အစိုးရဝန်ထမ်းဆိုတာ ဒီအတိုင်းလုပ်လို့ရတာမှမဟုတ်တာ။ ဘွဲ့ရ ပညာတတ်ဖြစ်မှဆိုတော့ သူတို့နဲ့လိုက်လျောညီထွေတဲ့ လစာကတော့ တိုးပေးရမှာပေါ့။ ဒါပေမဲ့ အဲဒီလိုတိုးပေးလိုက်လို့ အခက်အခဲတွေ့သွား မှာတွေက စက်ရုံ၊ အလုပ်ရုံတွေမှာလုပ်နေတဲ့သူတွေပေါ့။ တချို့စက်ရုံ တွေမှာက လစာတို့၊ နေ့တွက်တို့များများပေးပေမယ့် တချို့စက်ရုံတွေကျ တော့ လုပ်ခလစာနည်းနည်းလေးပဲ ပေးတာကြောင့် အလုပ်ရုံတချို့မှာ တော့ လစာနဲ့ပတ်သက်ပြီး အခက်အခဲတွေရှိသွားနိုင်မယ်။ ဝန်ထမ်း တွေဘက်ကလည်း တတ်သင့်တတ်အပ်တဲ့ အသိပညာမျိုးတွေ ရှိထား သင့်တယ်။ လုပ်ငန်းရှင်တွေဘက်ကလည်း သူတို့ဝန်ထမ်းတွေထဲက အသိပညာ၊ အတတ်ပညာရှိတဲ့သူကိုမှပဲ လစာတိုးပေးချင်တာပေါ့။ ဒီအစိုးရလက်ထက်မှာ စိတ်ချမ်းသာရတာဆိုရင် အရင်တုန်းက ကိုယ့်မှာ အဆက်အသွယ်ကောင်းရှိမှ လုပ်နိုင်တာမျိုးတွေရှိပေမယ့် ဒီဘက်ခေတ် မှာကတော့ ကိုယ်တကယ်သိ၊ တကယ်တတ်မှပဲလုပ်လို့ရတော့တာလေ။
မအိအိမွန်
(Production Manager, TV Guide, Forever Group Co;Ltd)
လစာတက်မယ်ဆို အရင်ဆုံးစိုးရိမ်တာကတော့ ကုန်ဈေးနှုန်းတက် မှာပါပဲ။ အခုလည်း လက်တွေ့မတိုးသေးတာတောင် တက်နေတယ် လေ။ ဒီကုန်ဈေးနှုန်းတက်တဲ့ဒဏ်ကို အခံရဆုံးက ကုမ္ပဏီဝန်ထမ်းတွေ ပဲ။ ဘာဖြစ်လို့လဲဆိုတော့ အစိုးရက လခတိုးသွားရင် ကုမ္ပဏီဝန်ထမ်းတွေ က အရင်လခတွေနဲ့ ဒီအတိုင်းကျန်ခဲ့တာ။ နောက် နှစ်လ၊ သုံးလလောက် ကြာမှ လိုက်တိုးတာဆိုတော့ ဒီဒဏ်တွေကို ကုမ္ပဏီဝန်ထမ်းတွေက ခံရ တယ်။ ပြည်သူတစ်ဦးအနေနဲ့ လစာတိုးတဲ့အပေါ် အကောင်းမြင်ပါတယ်။ ဒါပေမဲ့ ကုန်ဈေးနှုန်းကို ထိန်းပေးဖို့လိုပါတယ်။ အခြေခံလစာတွေသတ် မှတ်ရင်လည်း အစိုးရဝန်ထမ်းတွေနဲ့ ကုမ္ပဏီဝန်ထမ်းတွေကို တစ်ပြေး ညီဖြစ်စေချင်တယ်။ လစာတိုးဖို့ကတော့ ဝန်ထမ်းတိုင်းမျှော်လင့်တဲ့ကိစ္စ ပါပဲ။ အထူးသဖြင့် အခြေခံဝန်ထမ်းတွေမှာဆိုရင် အဆင်ပြေမှုမရှိတဲ့ အတွက် ဒီကိစ္စကို အမြန်ဆုံးအကောင်အထည်ဖော်စေချင်ပါတယ်။ အစိုးရဝန်ထမ်းတွေ မှာက ကုမ္ပဏီဝန်ထမ်းတွေလို Bonus ရတာ၊ တစ် နှစ်တစ်ခါခရီးသွားရတာတွေမရှိတဲ့ အတွက် သူတို့ဘက်မှာ အခွင့်အရေး တွေပိုနည်းတယ်လို့ ထင်ပါတယ်။ ဝမ်းသာစရာအကောင်းဆုံးကတော့ ဖုန်းတွေလူတိုင်းသုံးနိုင်လာတာ။ စိတ်ပျက်စရာအကောင်းဆုံးကတော့ ဒီအစိုးရလက်ထက်မှာ မှုခင်းတွေအဖြစ်များလာပြီး တရားဥပဒေစိုးမိုး ရေး အားနည်းလာတာကိုပါ။
မခင်ချိုချိုဦး
(အရောင်းအဝယ်)
လစာတိုးရင် ကုန်ဈေးနှုန်းတက်မယ်။ ဝယ်ရခြမ်းရတာ၊ ရောင်းချ ရတာတွေ အဆင်မပြေဖြစ်မယ်။ အပြင်ကလူကတော့ တစ်လနှစ်သိန်းရ ဖို့က မလွယ်ဘူး။ ခုလည်းဈေးဝယ်တဲ့နေရာမှာ အစစအရာရာဈေးတက် တယ်။ ဆန်တွေဈေးတက်တယ်။ အသားငါးကအစ၊ အိမ်ခန်းခတွေလည်း ဈေးတက်တယ်။ အိမ်ငှားခတွေလည်းဈေးတက်တယ်။ အစိုးရဝန်ထမ်း တွေ လစာတိုးရင်တော့ သူတို့ကို အလုပ်ကိုပိုလုပ်စေချင်တာပေါ့။ စည် ပင်ဆို ဒီရပ်ကွက်မှာ အမှိုက်အကုန်မသိမ်းဘူး။ လစာရထားတဲ့အတွက် တွေ့တဲ့အမှိုက်အကုန်သိမ်းရမှာပေါ့။ ယူသင့်ယူထိုက်တာ ယူသွားတယ်။ မယူချင်တာကျထားခဲ့တော့ လမ်းမှာအမှိုက်ပွတယ်။ လစာတိုးသွားတာ ပဲရှိတယ်။ တာဝန်မကျေဘူး။ အစိုးရသစ်သက်တမ်းအတွင်းမှာ ပြည်သူ တစ်ဦးအနေနဲ့ အပွင့်လင်းဆုံးပြောရင် ဝမ်းသာစရာတစ်ခုမှ မရှိဘူး။ ဖုန်း ၁,၅၀၀ ဆိုပေမယ့် ဟန်းဆက်သိန်းချီပေးရတယ်။ နိုင်ငံရေးပဋိပက္ခတွေ လည်း စိတ်ပျက်တယ်။ နိုင်ငံရေးလှုပ်စိလှုပ်စိဖြစ်ရင် ပြည်သူတွေက စိတ်ညစ်တယ်။
ကိုကျော်ဝေလင်း
(ကုန်သည်)
ဝန်ထမ်းလစာတိုးတာက တကယ်တိုးတာ၊ မတိုးတာအသာထား။ တိုးမယ်လို့ အသံထွက်တာနဲ့ ကုန်ဈေးနှုန်းက တန်းလိုက်တက်တာပဲလေ။ အဲဒီအခါကျတော့ ဝန်ထမ်းမဟုတ်တဲ့ သာမန်ပြည်သူတွေပဲ အဲဒီနောက် ကို အမီလိုက်ရတာ။ သာမန်ပြည်သူတွေရဲ့ လုပ်ခလစာတွေကမြင့်မလာ ဘဲ ကုန်ဈေးနှုန်းနောက်ကိုလိုက်ရတော့ သာမန်ပြည်သူတွေပဲ ဒုက္ခ ရောက်တာ။ ဝန်ထမ်းတွေကိုပဲမကြည့်ပါနဲ့။ ဝန်ထမ်းမဟုတ်တဲ့ သာမန် ပြည်သူတွေ ရာခိုင်နှုန်းအနေနဲ့တော့ ဘယ်လောက်ရှိမလဲမပြောတတ် ဘူး။ အဲဒါကြောင့် သာမန်ပြည်သူတွေဘဝကိုလည်း ထဲထဲဝင်ဝင်သိ အောင်လုပ်ပါဦးလို့ အစိုးရကို ပြောချင်ပါတယ်။ အစိုးရသစ်လက်ထက် မှာ ဝမ်းသာစရာအကောင်းဆုံးရယ်တော့တစ်ခါမှ မကြုံဖူးပါဘူး။ ဝမ်း သာရတော့မလိုလိုနဲ့ တကယ်ဝမ်းသာရတဲ့အခြေအနေအထိတော့ မရောက်ပါဘူး။ မကောင်းမြင်တာတော့မဟုတ်ပါဘူး။ စိတ်ပျက်စရာ အကောင်းဆုံးကတော့ အစိုးရသစ်တက်ပြီးတဲ့အချိန်မှာ နည်းမျိုးစုံနဲ့ ပြည်သူတွေကို လိမ်လိုက်၊ လှန့်လိုက်၊ ခြောက်လိုက်နဲ့ အမျိုးမျိုးစိတ်ဆင်း ရဲသောကရောက်အောင်လုပ်နေတယ်။ ပြည်သူတွေတကယ်လိုချင်တဲ့ ပန်းတိုင်ကတော့ အစိုးရသစ်သက်တမ်းလေးနှစ်ထဲကိုရောက်နေပြီ ဘာမှမမြင်ရသေးပါဘူး။
ဦးခင်မောင်ရီ
(တက္ကစီယာဉ်မောင်း)
မလေးရှားမှာ မြန်မာတွေလုပ်တဲ့လစာ ဒီမှာရ,ရမယ်။ ဒါမှ အိမ်နီး ချင်းနိုင်ငံတွေနဲ့ တိုးတက်တာသွားမျှမယ်။ အစိုးရဝန်ထမ်းတွေ လစာတိုး ရင်တော့ အပြင်ဝန်ထမ်းတွေ၊ လုပ်သားတွေကတော့ ကုန်ဈေးနှုန်းတက် မှာကို စိုးရိမ်မှာပေါ့။ အစိုးရဝန်ထမ်းမှမဟုတ်ဘူး။ အပြင်မှာလုပ်နေတဲ့ လူတွေလည်း လူတန်းစေ့လစာရမှဖြစ်မယ်။ အစိုးရကိုတော့ တောင်းဆို တင်ပြချင်တာမရှိဘူး။ ဖြစ်မှမဖြစ်တာကို။ နိုင်ငံတစ်ခုကိုထူထောင် မယ်ဆို အဲဒီနိုင်ငံက အောင်မြင်ဖို့လိုတယ်။ ကွန်မြူနစ်ပဲဖြစ်ဖြစ်၊ ဆိုရှယ်လစ် ပဲဖြစ်ဖြစ် ကြိုက်တဲ့ ဝါဒလုပ် အောင်မြင်ဖို့ပဲလိုတယ်။ တိုင်း သူပြည်သားနဲ့ အုပ်ချုပ်သူလူတန်းစားမျှတမှ တိုင်းပြည်က အောင်မြင် မယ်။
မစန်းကြည်
(အရောင်းဝန်ထမ်း၊ ဈေးချိုတော်)
ကျွန်တော်တို့ကျ မတိုးနိုင်သေးဘူးဆိုတော့ သူတို့ကို လစာတိုးပေး မယ့်အပေါ် စိုးရိမ်တယ်။ အလုပ်ရှင်နဲ့ ကိုယ်နဲ့ပြေပြေလည်လည်ညှိညှိ နှိုင်းနှိုင်းလုပ်မယ်ဆိုလုပ်လို့ရတယ်။ ဒါပေမဲ့ အဓိက,က ကုန်ဈေးနှုန်းပဲ။ ကုန်ဈေးနှုန်းကလိုက်တက်မယ်ဆိုရင်တော့ ဘယ်လိုမှအဆင်မပြေဘူး။ အစိုးရဝန်ထမ်းတွေ လစာတိုးမယ်တော့ကြားတယ်။ ပုဂ္ဂလိကတွေက တော့ ငြိမ်နေတုန်းပဲ။ အစိုးရဝန်ထမ်းတွေတက်ရင်တော့ ဘယ်လိုအသံ ထွက်မလဲမသိသေးဘူးပေါ့။ အဲဒီအတိုင်း ကုန်ဈေးနှုန်းတက်ရင်တော့ မတောင်းရင်တောင် တိုးပေးမယ်လို့တော့ထင်တာပဲ။ အစိုးရဝန်ထမ်း တွေတက်ရင်လည်း သဘောကျတယ်။ ဒါပေမဲ့ အကုန်လုံးက ကုန်ဈေး နှုန်းလိုက်တက်မှာကိုကြောက်နေကြတာ။ လစာတိုးပေမယ့် အဲဒါတွေ လိုက်တက်တော့ ဘာမှမထူးတော့ဘူးလေ။ အရင်လိုပဲပြန်ဖြစ်သွားမှာပဲ စိုးတာ။
မခိုင်မေ
(ကျူရှင်ဆရာမ) ကြည့်မြင်တိုင်မြို့နယ်
ကုမ္ပဏီဝန်ထမ်းနဲ့ လက်လုပ်လက်စားတွေကတော့ ကုန်ဈေးနှုန်း တက်မှာကို စိုးရိမ်မိမှာပဲ။ အစိုးရလခစားက ပင်စင်တို့ ဘာတို့ရှိတယ် လေ။ အပြင်ဝန်ထမ်းက လစာပဲရှိမှာ။ ပြီးတော့ ကုမ္ပဏီမှာက လစာတိုး ဖို့ဆိုတာက သူတို့ကုမ္ပဏီက အဆင်ပြေမှရမှာလေ။ ပိုဆိုးမှာက လက်လုပ်လက်စားပဲ။ သူတို့က ပုံမှန်မဟုတ်ဘူးလေ။ အမြတ်ငွေက လျော့သွားရင် ပိုကျပ်တည်းလာလိမ့်မယ်။ လက်လုပ်လက်စားတွေက အတိုးနဲ့ အများဆုံးရှင်သန်နေရတာ။ လစာတိုးလို့ ပိုအဆင်ပြေလာမယ် မထင်ဘူး။ အကုန်လုံးလိုက်တက်လာရင် လက်လုပ်လက်စားတွေက ပို လို့ဆိုးလာမယ်။ ၀န်ထမ်းတွေက ပုံမှန်ရနေလို့ ခံသာမယ်လေ။ လစာတွေလိုက်တိုးနေတာထက် ကုန်ဈေးနှုန်းကို တည်ငြိမ်အောင် ကြိုးစားသင့် တယ်ထင်တာပဲ။ အစိုးရက အခြေခံကုန်ဈေးနှုန်းကို ငြိမ်အောင်ထိန်း နိုင်မယ်။ ပြီးတော့ အိမ်ငှားခတွေကို လိုက်ထိန်းနိုင်ပြီဆိုမှ လစာတိုးမှာကို စဉ်းစားသင့်တာပေါ့။ အဓိကလိုအပ်ချက် နှစ်ခုက အဲဒါပဲ။ နေဖို့နဲ့ စားဖို့ အဆင်ပြေရင် လူတိုင်းက အဆင်ပြေမယ်လေ။ ခြုံပြောရရင် လစာတွေ တိုးမယ့်အစား ကုန်ဈေးနှုန်းတွေ၊ အိမ်ငှားခတွေ၊ ဆိုင်ငှားခတွေကိုသာ အရင်ထိန်း။ တရားဥပဒေစိုးမိုးရေးနဲ့ စည်းကမ်းကျဖို့နဲ့ ကျန်းမာရေး၊ ပညာရေးစောင့်ရှောက်မှုတွေပေးဖို့ပါပဲ။
ဇေယျာအောင်
(ကုမ္ပဏီဝန်ထမ်း)
လစာတိုးတာကတော့ကောင်းပါတယ်။ အစိုးရဝန်ထမ်းတွေက မလောက်မငဖြစ်နေတယ်။ လောလောဆယ်အနေအထားမှာဆိုရင် ကုမ္ပဏီဝန်ထမ်းကတော့သာနေတယ်။ ဝန်ထမ်းတွေကို လခတိုးပေးရင် လာဘ်စားတာတွေလည်းပျောက်သွားနိုင်တယ်။ တစ်ခုစိုးရိမ်စရာရှိတာ က ကုန်ဈေးနှုန်းဘယ်လိုထိန်းနိုင်မလဲ၊ အစိုးရက အဲဒါကို ဘာလုပ်ပေး နိုင်မလဲ။ တိုးတာကတော့ကောင်းပါတယ်။ ဈေးနှုန်းလေးတစ်ချက်ပဲ။ အဲဒီလိုလခတိုးလို့ ကုန်ဈေးနှုန်းတိုးရင် တောင်သူလယ်သမားတွေ အတွက်ကျတော့ ဆန်စပါးဈေးက ကျန်ခဲ့တယ်လေ။ အဲဒါကြောင့် လစာ ကတော့တိုးပေးသင့်တယ်။ ဒါပေမဲ့ ကုန်ဈေးနှုန်းပြန်ထိန်းပေးဖို့တော့လို တယ်။ စိတ်ပျက်စရာအကောင်းဆုံးကတော့ တစ်ခါတလေ မလိုအပ်ဘဲ ဆန္ဒပြတာတွေ၊ ဘာမှမဟုတ်ဘဲ ဆန္ဒပြတာတွေကတော့မကောင်းဘူး။ ဝမ်းသာစရာအကောင်းဆုံးကတော့ အိုဘားမားမြန်မာနိုင်ငံကို ပထမဆုံး အကြိမ်လာတုန်းက ပြည်သူတွေလည်း အရမ်းမျှော်လင့်ထားကြတယ်။ အမေရိကန်နေ ဆန်ရှင်တွေဖွင့်ပေး၊ ကျန်းမာရေးကိစ္စတွေကိုလည်း ဘတ်ဂျက်တွေတိုးပေးတာကတော့ ဝမ်းသာစရာကောင်း တယ်ထင် တယ်။
ဦးသိန်းနိုင်
(အငြိမ်းစားအရာထမ်းတစ်ဦး)
ကုမ္ပဏီတွေလည်း ဝန်ထမ်းတွေကိုတော့ လစာကချိန်ဆပေးရတာ ပါပဲ။ အစိုးရဝန်ထမ်းတွေရဲ့ အခြေခံလစာကို ချိန်ဆပြီးတော့ ကုမ္ပဏီ တွေကလည်း ပေးရတာကိုး။ လစာတိုးရင်တော့ ကုန်ဈေးနှုန်းတက်တဲ့ သဘောသဘာဝတွေရှိခဲ့တယ်။ အခုလည်း တိုးတောင်မတိုးရသေးဘူး။ နည်းနည်းတက်လာပြီ။ ဒါကတော့ လစာတိုးတိုင်း ကုန်ဈေးနှုန်းတက်ဖို့ အတွက် တစ်ခုတည်းသော အကြောင်းရင်းမဟုတ်ဘူးပေါ့။ တခြား အချက်အလက်တွေပါတာပေါ့။ ဒါကိုမတက်ဖို့အတွက် အစိုးရ၊ ပညာ ရှင်နဲ့ အသင်းအဖွဲ့တွေက ဝိုင်းပြီးထိန်းညှိဖို့လိုတယ်။ ဝန်ထမ်းတွေရဲ့ အခြေခံလစာက သူတို့အနေနဲ့ တကယ်မလောက်တာအမှန်ပဲ။ ထိုက် သင့်တဲ့ လစာတိုးပေးဖို့ကတော့ လိုအပ်တယ်။ ဒီလိုတိုးပေးသလိုပဲ ဝန် ထမ်းတွေဘက်ကလည်း ပြည်သူကိုကောင်းမွန်တဲ့ ဝန်ဆောင်မှုတွေပြန် ပေးဖို့လိုပါတယ်။ ဒီအစိုးရသစ်လက်ထက်မှာ ဝမ်းသာစရာတွေကတော့ အများကြီးပဲ။ အကောင်းဆုံးကတော့ ဖုန်းကိုပဲပြောချင်တယ်။ ဘာ ကြောင့်လဲဆိုတော့ ဒီအပြောင်းအလဲက သန်းနဲ့ချီတဲ့ပြည်သူလူထုကို အကျိုးပြုတယ်လေ။ ဒါကြောင့်ပါ။ စိတ်ပျက်စရာတွေလည်းရှိတာပေါ့။ အဲဒီထဲကတော့ တိုင်းပြည်အတွက် တကယ်လိုအပ်တဲ့ တွေ့ဆုံဆွေးနွေး မှုတွေကို မြန်မြန်ပြုလုပ်ပြီး ရလဒ်ကောင်းတွေပေါ်ထွက်ဖို့ အရေးကြီး တယ်။ အဲဒီလမ်းကြောင်းကို ဝေဝါးစေမယ့်၊ ဝေးကွာစေမယ့်လုပ်ရပ်တွေ ရှိလာလေ အစိုးရကို စိတ်ပျက်ရလေပေါ့။
မရီရီသန်း
( ခရီးသွားလုပ်ငန်းလုပ်ကိုင်သူ) စမ်းချောင်းမြို့နယ်။
အစိုးရ၀န်ထမ်းတွေအနေနဲ့ လစာတိုးမယ်ဆိုတော့ ကောင်းတဲ့ လက္ခဏာပေါ့။ ဒါပေမဲ့ အချို့ပုဂ္ဂလိကအလုပ်တွေက ၀န်ထမ်းတွေ ဆိုရင် အစိုးရ၀န်ထမ်းရဲ့ အခြေခံလစာတောင်မရတဲ့ သူတွေရှိတယ်။ အစိုးရအနေနဲ့ လစာနှုန်းထားတွေကို အစိုးရရော ပုဂ္ဂလိကပါ တစ်ပြေး ညီဖြစ်အောင် မူဝါဒချပေးသင့်ပါတယ်။
အခုလိုအစိုးရ၀န်ထမ်းတွေ လစာတိုးမယ်ဆိုရင်တော့ ကောင်း တယ်။ အာဆီယံက နှုန်းထားတွေနဲ့လည်း ညီသွားတာပေါ့။ ဒါပေမဲ့ ကုန်ဈေးနှုန်းကို မတက်အောင် ထိန်းဖို့လိုမယ်။
အခုလက်ရှိအစိုးရသစ်လက်ထက်မှာတော့ အပြင်ပုဂ္ဂလိက လုပ် ငန်းက ၀န်ထမ်းတစ်ယောက်အနေနဲ့ ပြောင်းလဲလာတာတော့ သိပ်ထွေ ထွေထူးထူးမရှိပါဘူ။ ဒါပေမဲ့ အစိုးရရုံးတွေနဲ့ ပတ်သက်လုပ်ရတဲ့ အလုပ်တွေဆိုရင်တော့ ၀င်ထွက်ရတာ ကောင်းလာတယ်။ အရင်လို မဟုတ်တော့ဘူး။
မအိဖြူ
(ရွှေပန်းထိမ်လုပ်ငန်း) မြောက်ဥက္ကလာပမြို့နယ်
လစာတိုးတာကတော့ ၀မ်းသာစရာပါ။ ၀ယ်လိုအားတွေမြင့်ပြီး နောက်ဆက်တွဲစီးပွားရေးပါ ကောင်းလာနိုင်တယ်။ တစ်ဖက်က ကုန် ဈေးနှုန်းကြီးမြင့်လာမှာကိုတော့ စိုးရိမ်မိတယ်။ ကုန်ဈေးနှုန်းတိုးလာမှာ ကို အရင်ထိန်းချုပ်သင့်တယ်။ အစိုးရအနေနဲ့ ကုန်ဈေးနှုန်းက အစ အစစအရာရာကို တည်ငြိမ်အောင် ထိန်းပေးဖို့ အစိုးရ၀န်ထမ်းမဟုတ်တဲ့ ပြည်သူတစ်ယောက်အနေနဲ့ ပြောချင်တယ်။ အစိုးရ၀န်ထမ်းတွေ လစာ တိုးတာကို ၀မ်းသာပေမယ့် အခြေခံပြင်ပ၀န်ထမ်းတွေ အနိမ့်ဆုံးလုပ်ခ လစာမသတ်မှတ်ရသေးတာ စိတ်ပျက်စရာပါပဲ။
ကိုဝင်းနိုင်မိုး
(ကုန်သည်) မင်္ဂလာဒုံမြို့နယ်
အစိုးရ၀န်ထမ်းတွေလစာတိုးမယ်ဆိုတဲ့အပေါ်မှာ ၀မ်းသာပါတယ်။ ဒါပေမဲ့ နေရာတကာမှာရှိနေတဲ့ အဂတိလိုက်စားမှု၊ လာဘ်ပေးလာဘ်ယူ မှုတွေကို ဘယ်လိုကိုင်တွယ်မှာလဲဆိုတာကိုလည်း သိချင်ပါတယ်။ အနိမ့်ဆုံးအခြေခံလုပ်ခလစာကို ခုထိမသတ်မှတ်နိုင်သေးတဲ့အတွက် စက်ရုံ၊ အလုပ်ရုံက အလုပ်သမားတွေ ဆန္ဒပြမှုတွေဖြစ်လာမယ်။ အခြေခံလက် လုပ်လက်စားတွေ ကုန်ဈေးနှုန်းကြီးမြင့်မှုခံစားရမှာကို ဘယ်လိုကုစား မလဲ။ တစ်ဖက်က၀န်ထမ်းတွေအတွက် ၀မ်းသာမိပေမယ့် ကုန်ဈေးနှုန်း ကြီးလို့ တစ်နေ့စာတစ်နေရှာစားရသူတွေအဖို့ ထမင်းနပ်မှန်အောင် စားရ ဖို့နဲ့ မိသားစုဘ၀ရပ်တည်ရေးအတွက် ပိုခက်ခဲသွားမှာကိုတော့ စိတ်ပျက် စရာပါ။ ဒါကြောင့်ဝန်ထမ်းတွေ လစာတိုးမယ်ဆို ကျန်တဲ့ပြည်သူတွေ အတွက်လည်း ထိခိုက်နစ်နာစေမှာကိုပါ တာဝန်ယူမှုရှိစေချင်ပါတယ်။ ဒီလိုမဟုတ်ဘဲ ၀န်ထမ်းတွေပဲ အဆင်ပြေမယ်၊ ကျန်ပြည်သူတွေက ကမ္မ သကာဆိုရင်တော့ ကောင်းသောရည်ရွယ်ချက်နဲ့ လစာတိုးပေးတာမှဟုတ်ရဲ့လားလို့မေးခွန်းထုတ်ရမှာပါ။
No comments:
Post a Comment