နေပြည်တော် (မဇ္ဈိမ)။ ။ မတရားအသင်းများ အက်ဥပဒေ (၁၉၀၈ ခုနှစ် အိန္ဒိယဥပဒေ အမှတ် ၁၄) ကို ပြင်ဆင်တဲ့ ဥပဒေကြမ်းကို လက်ခံဆွေးနွေးရန် ပြည်သူ့ လွှတ်တော်ကို သင်္ဃန်းကျွန်းအမတ် ဦးသိန်းညွန့်က အဆိုတင်သွင်းခဲ့ရာ ပြည်တွင်း ငြိမ်းချမ်းရေးကို လွှတ်တော်က အမှန်တကယ် လိုလားပါလျှင် ယခုအဆိုကို လက်ခံဆွေးနွေး ပြင်ဆင်ပေးသင့်သည်ဟု ဧပြီ ၂ ရက် ပြည်သူ့လွှတ်တော် အစည်းအဝေးတွင် တိုက်တွန်းပြောကြားခဲ့သည်။
“ပြည်တွင်း ငြိမ်းချမ်းရေးအတွက် တစ်ပြည်လုံး အပစ်အခတ်ရပ်စဲရေး လက်မှတ်ရေးထိုးပြီး အခြေအနေမှာ ပြည်တွင်းငြိမ်းချမ်းရေးကို ကျွန်တော်တို့ လွှတ်တော်ကြီးက ကူညီချင်တယ် ဆိုရင် နိုင်ငံတော်ရဲ့ ဖွံ့ဖြိုးရေးကို လည်းထိခိုက်၊ တိုင်းရင်းသားတွေရဲ့ နေ့စဉ်ဘဝကိုလည်း ခြိမ်းခြောက်နေတဲ့ ဒီမတရားအသင်း ဥပဒေကို ဒီဥပဒေကို ပြင်ခြင်းအားဖြင့် တိုင်းရင်းသား ပြည်သူတွေ တိုင်းရင်းသားဒေသတွေမှာ ဒီဥပဒေကြောင့် ထောင်ထဲဝင်သွားရတဲ့ မိသားစုတွေဘက်က ရပ်တည်ပေးချင်တယ်ဆိုရင် ပြင်ဆင်ပေးသင့်ပါတယ်” ဟု အဆိုရှင်က ပြောခဲ့သည်။
၎င်း၏ ပြင်ဆင်အဆိုပြုချက်များနှင့် ပတ်သက်ပြီး ဦးသိန်းညွန့် က “မတရားအသင်းဆိုသည်မှာ ရုန့်ရင်း ကြမ်းတမ်းမှုများနှင့် ခြိမ်းခြောက်မှုများကို ကျူးလွန်ရန် အားပေးသော၊ သို့ မဟုတ် ကူညီသော အဖွဲ့ အစည်း၊ သို့မဟုတ် ထိုပြုမူချက်ကို ပြုကျင့်လေ့ရှိသော အဖွဲ့ ဝင်များ ပါဝင်သော အသင်းဖြစ်သည်လို့ ပုဒ်မ ၁၅ မှာ အဓိပ္ပာယ်ဖွင့်ထားပါတယ်။ အဲဒီပုဒ်မရဲ့ အောက်မှာ ကျွန်တော်က “တရားဝင် ဖွဲ့ စည်းထားသော အစိုးရအား လက်နက်ကိုင်၍ ပုန်ကန်တိုက်ခိုက်နေသည့် သောင်းကျန်းသူ အဖွဲ့ အစည်းများနှင့် အဖွဲ့ ဝင်များကို ဆိုသည်လို့ ပြင်ဆင်ထားပါတယ်” ဟု ရှင်းပြသည်။
ထို့ အပြင် သူ အဓိက ပြင်ဆင်လိုသည့် ပုဒ်မ ၁၇ အောက်တွင် ကင်းလွတ်ချက် ငါးချက် ဖြည့်စွက်ရခြင်း ကိုလည်း “ဒီပုဒ်မကြောင့် ဒီနေ့  ရှမ်းတို့  ကချင်တို့ ကရင်တို့  ကယားတို့ မှာ ဒါနဲ့ ပတ်သက်ပြီး တိုင်းရင်းသား ပြည်သူတွေ တော်တော်များများ ထောင်ထဲ ဝင်နေကြရပါတယ်” ဟု ပြောခဲ့သည်။
ကင်းလွတ်ခွင့် ငါးရပ်တို့ မှာ မတရားအသင်းဝင်တို့ ၏ မိသားစုများ၊ မတရားအသင်းရှိရာသို့  သွားရောက်၍ စားသောက်ဖွယ်များ ရောင်းချအသက်မွေးရသူများ၊ မတရားအသင်း၏ လှုပ်ရှားမှုကို ကာလဒေသ အခြေအနေအရ အသက်ဘေးရှိသဖြင့် တိုင်တန်းခြင်းမပြုရဲသူများ၊ မတရားအသင်းများနှင့် ကြောက်ရွံ့ ၍ မတတ်သာဘဲ ဆက်ဆံနေရသူများ၊ ငြိမ်းချမ်းရေးအတွက် ကူညီပေးသူများသည် ထိုပြဋ္ဌာန်းချက်နှင့် မသက်ဆိုင်စေရ ဟူ၍ အဓိပ္ပာယ်ရသည်။
ဦးသိန်းညွန့် ၏ အဆိုကို ညောင်ရွှေအမတ် ဦးဝင်းဆွေက ထောက်ခံခဲ့သည်။ သို့ရာတွင် ပြည်ထဲရေး ဝန်ကြီးဌာန ဒုတိယဝန်ကြီးက ဥပဒေကို ပြင်ရန် သဘောတူသော်လည်း ထိုပြင်ဆင်ချက် အဆိုများသည် ယခင်ပြဋ္ဌာန်းချက်များနှင့် ယှဉ်ကြည့်ပါက အချို့ က အဓိပ္ပာယ် မကွာခြားခြင်း၊ အချို့  တိကျမှုမရှိခြင်း တို့ကြောင့် လွှတ်တော်က လက်ခံဆွေးနွေးရန် မသင့်ကြောင်း ပြောကြားခဲ့သည်။
ပြည်သူ့ လွှတ်တော် ဒုတိယ ဥက္ကဋ္ဌ ဦးနန္ဒကျော်စွာက “လက်ရှိ ဒီဥပဒေဟာ တည်ဆဲဥပဒေဖြစ်ပြီး အင်္ဂလိပ်လို ပြဋ္ဌာန်းထားတဲ့အတွက် ပြင်ဆင်မယ်ဆိုရင် အခုလို တစ်ပိုဒ်ကလေး နှစ်ပိုဒ်ကလေး ပြင်မယ့်အစား အစအဆုံး အပြည့်အစုံ ရေးသားပြီးတော့ တင်သွင်းခဲ့မယ်ဆိုရင် ဟောင်းနွမ်းပြီး အသုံးမဝင်တော့တဲ့ အနှောင့်အယှက် ဖြစ်နေတဲ့ ဥပဒေတွေကို အလွယ်တကူ ပယ်ဖျက်လိုက်နိုင်မှာ ဖြစ်ပါတယ်။ အခုတင်သွင်းတဲ့ ဥပဒေကြမ်း ဟာလည်း မြန်မာဘာသာနဲ့ တင်သွင်းထားခြင်းဖြစ်ပါတယ်။ အင်္ဂလိပ်ဘာသာဖြင့် ပြင်ဆင်ပြီးမှ ပြန်လည် တင်ပြရန် ဥပဒေကြမ်းကော်မတီကလည်း တင်ပြထားပါတယ်။ လွှတ်တော်က ပြင်ဆင်တာကို လက်မခံတာ မဟုတ်ပါဘူး၊ ဆွေးနွေးရန် မသင့်တဲ့အတွက် မူလပြဋ္ဌာန်းထားတဲ့ ဘာသာနဲ့ ပြန်ပြီး ရေးသားတင်သွင်းနိုင်ရန် ပြန်လည် ရုပ်သိမ်းစေတာ ဖြစ်ပါတယ်” ဟု ပြောကာ အဆိုကို ရုပ်သိမ်းစေခဲ့သည်။
အင်းတော် အမတ် ဦးကျော်နိုင်ဌေးကလည်း ထိုမတရားအသင်း ဥပဒေအတွက် ပြင်ဆင်ချက်အဆိုများကို မြန်မာဘာသာဖြင့် ရေးသားတင်သွင်းခဲ့သဖြင့် လွှတ်တော်က ဆွေးနွေးရန် မသင့်ဟူသည့် ဆုံးဖြတ်ချက်ဖြင့် အဆိုကို ပြန်လည်ရုပ်သိမ်းစေခဲ့သည်။
ဦးကျော်နိုင်ဌေးက “နိုင်ငံတော်မှာ လက်နက်ကိုင် အဖွဲ့ အစည်းတွေ ရှိပါတယ်။ မငြိမ်းချမ်းမှုတွေ ရှိတဲ့အတွက် လက်နက်ကိုင်အဖွဲ့ အစည်းတွေ ရှိတာပါ။ ဒီဥပဒေဟာ တော်တော့်ကို ထိရှလွယ်တဲ့ ကိစ္စတွေရှိတယ်၊ တစ်ဘက်ကလည်း ဒီအဖွဲ့ တွေကို အားပေးတဲ့လူတွေ ရှိတယ်။
တစ်ဘက်ကလည်း အဲဒီအဖွဲ့ အစည်းတွေံကို မတတ်သာလို့ လက်ခံပြီးတော့ ပတ်သက်နေရတဲ့ သူတွေရှိတယ်။ ဒါ အပြစ်မဲ့ ပြည်သူတွေပါ။ အပြစ်မဲ့ ပြည်သူတွေဟာ ဥပဒေနဲ့ မညီတဲ့ မတရားအသင်းတွေနဲ့  မတတ်သာလို့ ပတ်သက်နေရပေမယ့် ဒီဥပဒေနဲ့ အရေးယူခံနေကြရတယ်။ ဒါကြောင့် ဒီဥပဒေကို ပြင်ဆင်နိုင်ဖို့ အဆိုတင်သွင်းရခြင်း ဖြစ်ပါတယ်။ အပြစ်မယ့် ပြည်သူတွေဟာ သူတို့  ရဲ့ စားဝတ်နေရေးအတွက်ဖြစ်စေ၊ အသက်ဘေးကို ကြောက်ရွံ့ ရတဲ့အတွက်ဖြစ်စေ ဆက်ဆံ ပတ်သက်ရတယ်ဆိုရင် ဒီဥပဒေမှာ ပြဋ္ဌာန်းထားတဲ့ ပြစ်မှုနဲ့ အကျုံးမဝင်ပါဘူး၊ ပြစ်ဒဏ်ထိုက်တယ်လို့ လည်း မမှတ်ယူနိုင်ပါဘူးဆိုပြီး ဒီဥပဒေ ပုဒ်မ ၁၈ ရဲ့နောက်မှာ ပုဒ်မ ၁၉ ဆိုပြီးတော့ စကားရပ်များကို အစားထိုးပြီးတော့ ပြင်ဆင်လိုက်ပါတယ်” ဟု အဆိုကို မရုပ်သိမ်းမီ လွှတ်တော်သို့  ရှင်းပြခဲ့သည်။
ထိုသို့ အရေးတကြီး ပြင်ဆင်ရန် လိုအပ်နေသော်လည်း အင်္ဂလိပ်ဘာသာဖြင့် ပြဋ္ဌာန်းထားသည့် တည်ဆဲ ဥပဒေများကို ပြင်ဆင်နိုင်ရေးတွင် လွှတ်တော်၏ ဆောင်ရွက်ချက်မှာ တက်ကြွမြန်ဆန်မှု မရှိကြောင်း သီပေါမြို့နယ်အမတ် ဦးရဲထွန်းက ဝေဖန်ထောက်ပြခဲ့သေးသည်။
သို့ရာတွင် ပြည်သူ့ လွှတ်တော် ဒုတိယဥက္ကဋ္ဌ ဦးနန္ဒကျော်စွာက “ဦးရဲထွန်း ကိုယ်ပြောတဲ့ စကားကိုယ် မှတ်မိမယ်ဆိုရင် အတော်လေး စိတ်မကောင်းစရာ ရှိပါတယ်။ နံပါတ် ၁ ကတော့ ကျွန်တော်တို့ လွှတ်တော်ကြီးက တက်တက်ကြွကြွ မြန်မြန်ဆန်ဆန် လုပ်တာမရှိဘူး။ ဒါဟာ လွှတ်တော်ကြီးတစ်ခုလုံးကို အပြစ်တင်လိုက်တယ် ပြောမလား၊ စော်ကားလိုက်တယ်လို့ ပြောရမလား မသိပါဘူး။ ကျွန်တော်ကတော့ တော်တော်လေး ခံစားလိုက်ရပါတယ်။ လက်ရှိပြဋ္ဌာန်းထားတာက အင်္ဂလိပ်လို ဖြစ်နေတယ်၊ မပယ်ဖျက်ရသေးတဲ့ တည်ဆဲဥပဒေလည်း ဖြစ်နေတယ်၊ ဒါကို ပြင်ဆင်မယ်ဆိုရင် ဒီတစ်ပုဒ်တည်း မဟုတ်ဘဲ ပြည့်စုံအောင် မြန်မာမှုပြုပြီး ပြင်ဆင်မယ်ဆိုရင် အဟောင်းကို ရုပ်သိမ်းပြီး အသစ်ကို ထည့်ရပါမယ်။ ဒီနေရာလေး တစ်ပိုဒ်တည်းကိုပဲ မြန်မာမှုပြုပြီးထည့်လိုက်ရင် နက်တိုင်တပ်ပြီး ပုဆိုးကြီးနဲ့  သွားနေသလို ဖြစ်နေမှာပေါ့” ဟု ပြန်လည်ရှင်းပြခဲ့ပြီး အပြန်အလှန် အချေအတင် ပြောဆိုကြရမှုများလည်း ဧပြီ ၂ ရက်က ပြည်သူ့ လွှတ်တော်၌ ဖြစ်ပွားခဲ့သည်။
Mizzima
No comments:
Post a Comment