"သူ(တရားလိုရဲမှူး)ကိုယ်တိုင် ထွက်ဆိုတာပါ။ ရွယ်နေတယ်ဆိုတဲ့ စကားကတော့ အမှန်တရားကို ကျောခိုင်းပြီး ထွက်ဆိုတဲ့ ထွက်ဆိုချက်ပေါ့။ အဲ့ဒါ လက်မခံနိုင်ဘူး" ဟု ဖမ်းဆီးခံကျောင်းသားများ၏ ရှေ့နေ ဦးရောဘတ်စန်းအောင်က ပြောသည်။
တရားခွင်အတွင်း ၀င်ရောက်နားထောင်ခွင့်ရခဲ့သူ တစ်ဦးဖြစ်သည့် ဖမ်းဆီးခံကျောင်းသား ကိုမင်းသွေးသစ်၏ မိခင်ဖြစ်သူ ဒေါ်ခင်ခင်ယုကလည်း "ရွယ်တာလို့ပြောတယ်။ ရွယ်တာဆိုရင် ရိုက်တာထိတဲ့ပုံတွေ ထပ်ပြီးတင်ပြရဦးမလားလို့ ဦးအောင်သိန်းက ပြောတယ်။ အဲ့ဒါကျ ဘာမှ ပြန်မပြောနိုင်ဘူး" ဟု ပြောသည်။
သပိတ်မှောက်ကျောင်းသားများ၏ အကြမ်းဖက်ဖြိုခွဲခံရမှု ဓာတ်ပုံမှတ်တမ်းကို ကျောင်းသားများ၏ ရှေ့နေဖြစ်သူ ဦးအောင်သိန်းက တရားရုံးသို့တင်ပြစဉ် တရားလိုဖြစ်သူ လက်ပံတန်းမြို့နယ်ရဲတပ်ဖွဲ့မှူး၊ ရဲမှူးဘုန်းမြင့်က ယင်းသို့ ထွက်ဆိုခဲ့ခြင်းဖြစ်သည်ဟု ဆိုသည်။
ရဲမှူး၏ ထွက်ဆိုချက်အပေါ် ဖမ်းဆီးခံကျောင်းသားခေါင်းဆောင် မဖြိုးဖြိုးအောင်က "ဒါဟာ ဟာသတောင် ဖြစ်တာပေါ့။ ရဲတပ်ဖွဲ့တွေက ဘယ်လောက်တောင် အတွင်းအား ကြီးမားသလဲဆိုတဲ့ အမြင်တွေတောင် ဖြစ်ကြတာပေါ့။ တစ်ကယ်တမ်းကျတော့ ရွယ်ရုံနဲ့တော့ ခေါင်းတွေမကွဲပါဘူး။ မှန်(ကားမှန်)တွေ မကွဲပါဘူး" ဟု ရုံးထုတ်အပြီး သတင်းသမားများ၏ မေးမြန်းမှုကို ဖြေကြားခဲ့သည်။
တရားရုံးသို့ ဦးအောင်သိန်းတင်ပြသည့် ဓာတ်ပုံများမှာ အကြမ်းဖက်ဖြိုခွဲခံရစဉ်က သတင်းသမားများ မှတ်တမ်းတင် ရိုက်ကူးထားသော မီဒီယာ အသီးသီးတွင် ဖော်ပြခဲ့သည့် ဓာတ်ပုံများဖြစ်သည်။
အဆိုပါ ဓာတ်ပုံများကိုလည်း တရားလိုရဲမှူး၏ ရှေ့နေက ကန့်ကွက်ခဲ့ပြီး "ဓာတ်ပုံတွေဆိုတာက ကွန်ပျူတာနဲ့ပြင်လို့ရတယ်ဆိုပြီး အဓိပ္ပာယ်မရှိတာတွေ လျှောက်ပြောတယ်" ဟု ဒေါ်ခင်ခင်ယုက ပြောသည်။
သပိတ်မှောက်ကျောင်းသားများနှင့် ၀န်းရံပြည်သူများအား လုံခြုံရေးရဲများက မတ်လ ၁၀ရက်တွင် အကြမ်းဖက်ဖြိုခွင်းကာ ရိုက်နှက်ဖမ်းဆီးခဲ့ခြင်းဖြစ်ပြီး ရဲမှူးဘုန်းမြင့်က တရားလိုပြုလုပ်ကာ နိုင်ငံတော်အကြည်ညိုပျက်စေမှုပုဒ်မအပါအ၀င် ပုဒ်မ ၅ခုဖြင့် တရားစွဲဆိုခဲ့ခြင်းဖြစ်သည်။
လက်ပံတန်းမြို့တွင် ရက်သတ္တပတ်ကျော်အကြာ သပိတ်မှောက်ဆန္ဒပြခဲ့သည့် ကျောင်းသားများနှင့် ၀န်းရံပြည်သူများကို လုံခြုံရေးရဲများက အကြမ်းဖက်ဖြိုခွင်းကာ နံပါတ်တုတ်များဖြင့် ရိုက်နှက်ဖမ်းဆီးခဲ့သည်။ လုံခြုံရေးရဲများသည် သပိတ်မှောက်ကျောင်းသားများအပြင် သွားရောက်သတင်းယူနေသည့် သတင်းသမားများကိုပါ လိုက်လံရိုက်နှက်ခဲ့သည့်အတွက် မဇ္ဈိမအပါအ၀င် သတင်းသမားအများစု ထွက်ပြေးခဲ့ရသည်။
mizzima
No comments:
Post a Comment