ဘလာဒီဗော့စတော့၊ စက်တင်ဘာ - ၈ ပစိဖိတ်ဒေသ လွတ်လပ်စွာကုန်သွယ်မှုပေါ်ထွန်းလာရေးအတွက်
ကုန်သွယ်ရေးဆိုင်ရာ အဟန့်အတားများကို ဖယ်ရှားပေးစေလိုကြောင်း
အမေရိကန်နိုင်ငံခြားရေးဝန်ကြီး ဟီလာရီကလင်တန်က
ဒေသတွင်းနိုင်ငံများကိုတိုက်တွန်းပြောဆိုကြောင်း BBC သတင်းဌာန ကရေးသားဖော်ပြသည်။ ရုရှားနိုင်ငံ၊ ဘလာဒီဗော့စတော့ ဆိပ်ကမ်းမြို့ တွင် စက်တင်ဘာလ ၈ ရက်နေ့က စတင်ကျင်းပသော အာရှပစိဖိတ်ထိပ်သီးဆွေးနွေးပွဲ၌ နိုင်ငံခြားရေးဝန်ကြီးဟီလာရီကလင်တန်က ယင်းသို့ပြောဆိုခြင်းဖြစ်သည်။
"ချိန်ခွင်လျှာမျှပြီး တည်ငြိမ်မှုရှိတဲ့စီးပွားရေး
ပုံသွင်းတည်ဆောက်တယ်ဆိုတာ နိုင်ငံတွေအတွက် လုံးဝဥဿုံအရေးကြီးပြီး
ရှုပ်ထွေးနက်နဲတဲ့ စိန်ခေါ်မှုတစ်ခုပဲဖြစ်ပါတယ်။ တစ်နိုင်ငံချင်းစီ
သီးခြားချဉ်းကပ်လုပ်ဆောင်သွားရမယ့်ကိစ္စလည်းဖြစ်ပါတယ်။ တကယ်လို့ ကျွန်မတို့အနေနဲ့ မှန်မှန်ကန်ကန်လုပ်ဆောင်နိုင်မယ်ဆိုရင် ဂလိုဘယ်လိုက်ဇေးရှင်း(ကမ္ဘာပြုမှုဖြစ်စဉ်)ဆိုတာ မြင့်တက်လာတဲ့ နေထိုင်မှုအဆင့်အတန်းတွေနဲပအတူ ထိပ်ဆုံးကိုရောက်အောင်သွားရမယ့် ပြိုင်ပွဲတစ်ခုဖြစ်လာနိုင်ပါတယ်။ ချမ်းသာကြွယ်ဝမှုကို ပိုမိုကျယ်ပြန့်စွာ မျှဝေခံစားနိုင်မှာပါ" ဟု ဟီလာရီကလင်တန်ကပြောကြားသည်။
ထိပ်သီးဆွေးနွေးပွဲကို အိမ်ရှင်နိုင်ငံအဖြစ်လက်ခံကျင်းပပေးသည့်
ရုရှားသမ္မတ ဗလာဒီမာပူတင်က ကမ္ဘာ့စီးပွားရေးနှင့်ပတ်သက်၍
စိုးရိမ်ပူပန်မိကြောင်း၊ အထူးသဖြင့် ဥရောပ၏ ကြွေးမြီအကျပ်အတည်းဖြစ်ကြောင်း
ထုတ်ဖော်ပြောဆိုသည်။
"ကမ္ဘာလုံးဆိုင်ရာစီးပွားရေး ပြန်လည်နာလန်ထူမှုဟာ အားနည်းလာပြီဖြစ်ပါတယ်။ ကုန်သွယ်ရေးပမာဏကြီးမားလာအောင်လုပ်ဆောင်ခြင်း၊ အရင်းအနှီးစီးဆင်းမှုမြှင့်တင်ခြင်းစတာတွေလုပ်ဆောင်မှသာ အနုတ်လက္ခဏာဆောင်တဲ့ လားရာတွေကို ကျွန်တော်တို့တတွေကျော်လွှားနိုင်မှာဖြစ်ပါတယ်။ ပွင့်လင်းတဲ့ဈေးကွက်တွေနဲ့ လွတ်လပ်တဲ့ကုန်သွယ်ရေးစတာတွေရဲ့ အခြေခံကျတဲ့ မူဝါဒတွေအတိုင်းလိုက်လံအကောင်အထည်ဖော်ဖို့လည်းအရေးကြီးပါတယ်"
ဟု ရုရှားသမ္မတ ဗလာဒီမာပူတင်ကပြောကြားသည်။ "ဦးစားပေးရမယ့် ပန်းတိုင်ကတော့
ပုံစံအမျိုးမျိုးနဲ့ရှိနေတဲ့ ပြည်တွင်းအကျိုးစီးပွားကာကွယ်ရေးမူဝါဒတွေအားလုံးကို
တိုက်ဖျက်ရမှာဖြစ်ပါတယ်။ တံတိုင်းတွေမတည်ဆောက်ဘဲ
တံတားတွေထိုးပေးနိုင်ဖို့ဆိုတာ အင်မတန်အရေးကြီးပါတယ်" ဟု ၎င်းကဆိုသည်။
တရုတ်ပြည်သူ့သမ္မတနိုင်ငံ သမ္မတ ဟူဂျင်တောင်ကမူ ကမ္ဘာလုံးဆိုင်ရာစီးပွားရေး ပြန်လည်နာလန်ထူထောင်နိုင်ရေးအတွက် မိမိ၏တိုင်းပြည်စီးပွားရေးဖွံ့ဖြိုးတိုးတက်မှုကို ဆက်လက်ထိန်းသိမ်းပေးသွားမည်ဖြစ်ကြောင်း ကတိကဝတ်ပြုပြောဆိုသည်။ "ပုံမှန်တည်ငြိမ်မှုရှိတဲ့စီးပွားရေးနဲ့ ခိုင်မာတောင့်တင်းမှုရှိတဲ့ တိုးတက်မှုအကြား ချိန်ခွင်လျှာမျှအောင် ကျွန်တော်တို့အနေနဲ့ဆက်လက်ထိန်းသိမ်းသွားပြီး တစ်ဖက်မှာ စီးပွားရေးတည်ဆောက်မှုပုံစံကိုထိန်းညှိသွားပါမယ်။ ဖြစ်လာနိုင်ခြေရှိတဲ့ ငွေကြေးဖောင်းပွမှုတွေကို စီမံခန့်ခွဲသွားမယ်။ ပြည်တွင်းဝယ်လိုအားမြင့်တက်လာအောင် ပြုလုပ်ပြီး အခြေခံဈေးနှုန်းတည်ငြိမ်မှုအပါအဝင် တည်ငြိမ်မှုနဲ့တိုးတက်မှုရှိတဲ့စီးပွားရေးဖြစ်အောင်လုပ်ဆောင်သွားမှာဖြစ်ပါတယ်" ဟု သမ္မတ ဟူဂျင်တောင်ကပြောကြားသည်။
No comments:
Post a Comment