Sunday, September 14, 2014

မိုင်းလားက တောရိုင်းတိရစ္ဆာန် ဈေးကွက်

 တောရိုင်း တိရစ္ဆာန် လိပ်ကလေး တကောင်ကို ဈေးကွက်တွင် တွေ့ရစဉ် (ဓာတ်ပုံ - နန်းဆိုင်နွမ် / ဧရာဝတီ) 
ဆင်စွယ် တချောင်းကို တရုတ်ယွမ် ၈၀ဝ (ဒေါ်လာ ၁၃၀) ခန့် ဈေးပေါက်သည်။ မြွေအရေခွံတချပ် ယွမ် ၁၀ဝ၀၊ ကျားသစ်အရေခွံ ၁ ကီလိုဂရမ် ယွမ် ၄၀ဝ၀၊ ကျားခြေတစုံ ယွမ် ၁၀ဝ၀ ခန့် ဈေးပေါက်နေပြီး အရှင်တကောင်လျှင် ယွမ် ၁ သန်း ( ဒေါ်လာ ၁၆၀ဝ၀ဝ) ခန့် ပေးဝယ်နိုင် ပါတယ်။ ထိုနေရာမှာ မြန်မာနိုင်ငံ ရှမ်းပြည်နယ် အရှေ့စူးစူး တရုတ်နယ်စပ်မြို့ မိုင်းလားမြို့က တောရိုင်းတိရစ္ဆာန်ဈေးမှာ ဖြစ်ပါတယ်။
မြန်မာအစိုးရရဲ့ နိုင်ငံတကာ တားမြစ် ရောင်းဝယ်ဖောက်ကားမှုမှာ ထိုးထားခဲ့တဲ့ လက်မှတ်ဟာ ဒီနေရာမှာ
အသုံးမဝင် ပါဘူး။ မျိုးတုံးမယ့် အန္တရာယ်နဲ့ ရင်ဆိုင်နေရတဲ့ ရှားပါး တောရိုင်း တိရိစ္ဆာန်တွေကို အဲဒီဈေးမှာ ပေါ်ပေါ်ထင်ထင် ရောင်းချလျက် ရှိပြီး ငွေကြေးကို တရုတ်ငွေဖြင့်သာ ပေးချေကြ ပါတယ်။ တောရိုင်းတိရစ္ဆာန်တွေရဲ့ ခန္ဓာကိုယ် အစိတ် အပိုင်း တွေက တိုင်းရင်းဆေး၊ အဆင်တန်ဆာတွေနဲ့ အစားအသောက် ပြုလုပ်ဖို့ အတွက် ဝယ်ယူကြ ပါတယ်။
စားသောက်ဆိုင်များမှာ ဒရယ်သား ၁ ကီလိုကို ယွမ် ၃၀ဝ ပေးရပြီး တောက်တဲ့က ယွမ် ၁၆၀ဝ၊ ပုရွက်စားကောင်လို အကောင်မျိုး ဆိုလျှင် ယွမ် ၆၀ဝ အထိ ဈေးပေါက်တယ်။
တိရိစ္ဆာန်တွေက စားသောက်ဆိုင်များရှေ့ လှောင်အိမ်ငယ်များထဲမှာ နေကြရပြီး သူတို့ကို လက်ညှိုးထိုး စားသောက်ဖို့ လာသူတွေကို ဆွဲဆောင်နေကြရတယ်။ သူတို့ကို ရွေးချယ်ပြီး ဟင်းအိုးထဲပို့မှာကို စောင့်နေကြရပါတယ်။ လှောင်ချိုင့် ထဲက မျောက်ကလေးတွေဆို စားသောက်မယ့်သူတွေ လာကြည့်ရင် ကြောက်ရွံ့တုန်လှုပ်စွာ နောက်ဆုတ်သွားတတ် ကြတယ်။
တရုတ်ပြည်က ဧည့်သည်တွေ ရာချီပြီး မိုင်းလားမြို့ကို နေ့စဉ် ဝင်ထွက်သွားလာနေတယ်။ သူတို့ဟာ မိုင်းလားမြို့ကို လာရောက်ပြီး မြန်မာတွေ လက်လှမ်းမမီတဲ့ ဈေးပေးရတဲ့ ကာစီနိုကစားဝိုင်းတွေမှာ လာကစားခြင်း၊ ပြည့်တန်ဆာတွေ နဲ့ ပျော်ပါးခြင်း၊ တောရိုင်းသတ္တဝါ ဟင်းပွဲတွေကို မှာယူစားသောက်ခြင်းတွေ လုပ်ကြပါတယ်။ မိုင်းလားမြို့ဈေးဟာ နံနက် ၄ နာရီခန့်မှာ စတင်အသက် ဝင်လာပြီး ပတ်ဝန်းကျင် ကျေးရွာတွေက ဒေသထွက်ကုန်တွေ လာရောက် ရောင်းချ ပါတယ်။ အလေးချိန်ကို တရုတ်အလေးချိန် ဂျင်နဲ့ တွက်ချက် ရောင်းချကြတယ်။ ၁ ဂျင်မှာ ၅၉၇ ဂရမ် ရှိပါတယ်။
“ကုန်သည် အများစုကတော့ တရုတ်တွေပဲ။ သူတို့က တရုတ်ပြည်က တခြား တဆင့် ဝယ်သူတွေနဲ့ အဆက်အသွယ် ရှိတော့ ဒီက တောကောင်တွေကို ဟိုကို တင်ပို့ကြတယ်” လို့ ဒေသခံတဦး ဖြစ်သူ ကိုမင်းသူက ဆိုပါတယ်။ ဆက်လက်ပြီး သူက တောရိုင်းတိရစ္ဆာန် အများစုက အရှင် ရောင်းချခံရပြီး ဈေးကွက်ထဲတွင်တော့ သယ်ယူရ လွယ်ကူစေဖို့ သတ်ဖြတ်ပြီး အရေခွံခွာကာ ရောင်းချနေကြတယ် လို့ ပြောပြတယ်။
သူက ကာစီနို ကစားဝိုင်းတခုမှာ ကျားတကောင်ကို လေလံဆွဲ ဝယ်ယူတာမျိုး ကြုံတွေ့ဖူးကြောင်းလည်း ပြောပြ ပါတယ်။ “တော်တော်ကြီးတဲ့ ကျားကြီးဗျ။ လေလံပွဲမှာ တရုတ်တယောက်က ယွမ် ၁ သန်းနဲ့ နိုင်သွားတယ်” လို့ ကိုမင်းသူက ဆိုပါတယ်။
မြို့ဈေးက တောရိုင်းတိရစ္ဆာန် ရောင်းချနေတဲ့ အမည်မဖော်လိုတဲ့ ရှမ်းတိုင်းရင်းသူတဦးရဲ့ ဆိုင်မှာတော့ ချိုနဲ့ သမင်ခေါင်း ၂ ခု၊ ကျားသစ်သားရေ၊ ကျားရိုးနဲ့ ကျားလက်သည်း၊ မျောက်ထီးအင်္ဂါနဲ့ မျောက်သွား၊ ဝက်ဝံသားရေနဲ့ ပုရွက်စားကောင်သားရေ စတာတွေကို ပြသရောင်းချတာ တွေ့ရပါတယ်။
ရှားပါး တောရိုင်းတိရစ္ဆာန် ပစ္စည်းများကို တရုတ်တိုင်းရင်းဆေးများ ဖော်စပ်ဖို့ အတွက် ဝယ်ယူကြသလို အိမ် အလှဆင်ဖို့နဲ့ အဆောင် ပစ္စည်းလုပ်ဖို့ အတွက်လည်း ဝယ်ယူကြတယ် လို့ ဆိုင်ရှင်က ရှင်းပြတယ်။
အခုလို ဈေးထဲမှာ ရောင်းချနေတဲ့ တောရိုင်းသတ္တဝါတို့ရဲ့ အစိတ်အပိုင်းတွေကို မြို့ရဲ့ အနီးနားမှာရှိတဲ့ “ဝ” ကိုယ်ပိုင်အုပ်ချုပ်ခွင့်ရ ဒေသကနေ တင်သွင်းတယ်လို့ သူက ပြောဆိုပါတယ်။
“ပစ္စည်းတွေက တန့်ယန်းကနေသွင်းတာ။ ဒေသခံတွေ ဆီကနေ ဝယ်လာတာ။ ဒီမှာက ဒါမျိုးတွေ မရနိုင်တော့ဘူး။ အသက်ရှိတဲ့ အကောင်တွေက ရှမ်းပြည်နယ် တခြားနေရာတွေကနေလည်း သွင်းကြတယ်”လို့ သူက ရှင်းပြပါတယ်။
ဈေးထဲမှာ တောရိုင်းတိရစ္ဆာန်တွေ အပြင် ကြက်တူရွေး၊ သာလိကာနဲ့ သာလိကာနဲ့ မျိုးနွယ်တူ ငှက်တွေကိုလည်း ရောင်းချနေတာ ကိုလည်း တွေ့ရပါတယ်။ ဒါ့အပြင် ဆင်သားရေကို အရွယ်အစားမျိုးစုံ ပိုင်းထစ် ခုတ်ဖြတ်ပြီး အပိုင်းအသေး တခုကို ယွမ် ၅၀ နဲ့ ရောင်းချနေတာမျိုးလည်း တွေ့ရပါတယ်။ ဆင်သားရေကို မီးမြှိုက်ပြီး ရလာတဲ့ ပြာမှုန့်ကို ရေနဲ့ဖျော်၊ ဆေးလုပ်သောက်ကြတယ် လို့လည်း သိရပါတယ်။
“ဗိုက်နဲ့ ပတ်သက်တဲ့ ရောဂါတွေ အတွက် သုံးလို့ရတယ်” လို့ ဆင်သားရေ ရောင်းချနေတဲ့ အသက် ၁၆ နှစ်အရွယ် ပလောင်တိုင်းရင်းသူက ပြောပါတယ်။ “ဆေးလုပ်သောက်ပြီးရင် သိသိသာသာကို နေလို့ ကောင်းသွားတယ်” လို့ သူက ထပ်ပြောပြီး ဈေးရောင်းပါတယ်။
ဈေးထဲမှာ တောရိုင်းကောင်တွေကို ရောင်းဝယ်သူ အများစုဟာ သူတို့ရဲ့ ပစ္စည်းတွေကို သတင်းထောက်တွေ၊ ဓာတ်ပုံသမားတွေ လာရောက် ဓာတ်ပုံရိုက်ကူးတာကို မနှစ်သက်ပါဘူး။ အမျိုးသမီး တယောက်က ဒေသခံ အာဏာပိုင်တွေ အရေးယူတာ ခံရတတ်တယ် လို့ ပြောပါတယ်။
မိုင်းလားမြို့ကို တိုင်းရင်းသား လက်နက်ကိုင်တပ်များမှ ဦးစီးအုပ်ချုပ်လျက်ရှိပြီး ယင်းကဲ့သို့ ရောင်းဝယ်ဖောက်ကားဖို့ အတွက် သူတို့ရဲ့ ခွင့်ပြုချက် ရယူဖို့ လိုပါတယ်။ ရှားပါး အဖိုးတန် ပစ္စည်းများကို ရောင်းဝယ် ဖောက်ကားမှုများမှ ၎င်းတို့ကို အခွန်ကြေးငွေလည်း ပေးဆောင်ရတယ်လို့ သိရှိရပါတယ်။     ။

ဧရာဝတီ

No comments:

Post a Comment