စက်တင်ဘာလအတွင်းက ထိုင်းနိုင်ငံ ခိုတောင်ကျွန်း(လိပ်ကျွန်း)ရှိ ဆိုင်ရီးကမ်းခြေ၌ ဗြိတိန်နိုင်ငံသာ ၂ဦး အသတ်ခံခဲ့ရသည့်အမှုဖြင့် စွပ်စွဲခံ မြန်မာလူငယ် ၂ဦးက ၎င်းတို့သည် ယင်းအမှုနှင့် ပတ်သက်မှု လုံးဝမရှိကြောင်း နိုင်ငံတကာရပ်ဝန်းတွင် သြဇာလွှမ်းမိုးမှု ကြီးမားသူ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ထံသို့ ကော့စမွီအကျဉ်းထောင်မှနေ၍ စာရေးသားပြီး အကူအညီတောင်းခံ လိုက်သည်။
မြန်မာလူငယ် ၂ဦးဖြစ်သည့် ကိုဇော်လင်းနှင့် ကိုဝေဖြိုး ၂ဦးအား ဗြိတိန်နိုင်ငံသား ၂ဦးကို ပေါက်တူးဖြင့် ရိုက်သတ်မှု၊ မစ္စ၀ုသရစ်ခ်ျအပေါ် မုဒိန်းပြုကျင့်မှုအပါအ၀င် စုစုပေါင်း ၆ မှုဖြင့် တရားစွဲဆိုခံထားရခြင်း ဖြစ်ပြီး သေဒဏ်ကျခံရဖွယ်ရာ အခြေအနေနှင့် ရင်ဆိုင်နေရသည်။
ဒေါ်အောင်ဆန်းစုကြည်ထံသို့ရေးသားထားသော အဆိုပါစာတွင် ကိုဇော်လင်းနှင့် ကိုဝေဖြိုးတို့က ယင်းအမှုသည် ၎င်းတို့နှင့် သက်ဆိုင်မှု လုံးဝမရှိကြောင်း၊ သို့ဖြစ်၍ ၎င်းတို့ ၂ဦး၏ ပြဿနာအား ဒေါ်အောင်ဆန်းစုကြည်မှ ကူညီပေးစေလိုကြောင်း ပါရှိသည်။
“ထောင်ထဲမှာ မနေချင်ပါဘူး တကယ်ဆို သတ်သွားတဲ့သူဟာ သူများနိုင်ငံမှာ စီးပွားတောင် လုပ်စားနေလောက်ပြီ ထင်ပါတယ် ….. အမေ ဒီစာကို ဖတ်ရချိန်မှာ သားတို့ ၂ယောက်အပေါ် ဘယ်လို သဘောထားမယ်ဆိုတာ သားတို့ မသိနိုင်ပါဘူး ဖြစ်နိုင်မယ်ဆိုရင်တော့ အမေစုကို ကူညီစေချင်တယ် …. အကူအညီလည်း တောင်းခံပါတယ် …. ” စသည်ဖြင့် ရေးသားထားသည်။
ယင်းအပြင် ၎င်းတို့ ၂ဦး ထိုင်းနိုင်ငံ၌ ဆင်းရဲပင်ပန်းစွာ အလုပ်ကြိုးစား၍ မိဘများအား ကူညီနေခဲ့ကြကြောင်း၊ ယင်းကဲ့သို့ မိဘများအားထောက်ပံ့နိုင်သည့်အတွက် ၎င်းတို့ အတိုင်းအဆမဲ့ ပျော်ရွှင်ခဲ့ကြောင်း၊ သို့သော် ယခုအချိန်၌ ၎င်းတို့၏ မျှော်လင့်ချက်များ ပျက်စီးသွားခဲ့ရပြီဖြစ်ကြောင်း၊ ၎င်းတို့ နှစ်ဦးအတွက် ဆုတောင်းမေတ္တာပို့ပေးစေကြလိုကြောင်းတို့လည်း ရေးသားထားပြီး “ဒီအမှုက အမြန်ဆုံးလွတ်မြောက်ပါစေလို့ အသနားခံပါတယ် အမေစုရယ် …”ဟု စာကို အဆုံးသတ်ထားသည်ကို တွေ့ရသည်။
ထိုင်းရဲတပ်ဖွဲ့၏ ကနဦးအမှုတွဲသည် ခိုင်လုံမှုမရှိသဖြင့် ထိုင်းရှေ့နေများကောင်စီက တကြိမ် ပယ်ချခဲ့သေးသည်။ ထို့နောက် ၁ လ နီးပါးအကြာ သက်သေအထောက်အထားများ ထပ်မံဖြည့်စွက်ပြီး တင်ပြခဲ့ခြင်းကို ရှေ့နေများက ဒီဇင်ဘာ ၃ရက်က စွဲချက်တင်ရန် လက်ခံခဲ့ခြင်း ဖြစ်သည်။
ကနဦးက လူသတ်မှုကျုးလွန်မိခဲ့ကြောင်း ၎င်းတို့က ၀န်ခံခဲ့သော်လည်း စုံစမ်းစစ်ဆေးသူများက ၎င်းတို့အား ရိုက်နှက်ခြင်း၊ သတ်ပစ်မည်ဟု ခြိမ်းခြောက်ခြင်းတို့ကြောင့်သာ ၀န်ခံခဲ့ခြင်းဖြစ်သည်ဟုဆိုကာ ယင်းထွက်ဆိုချက်အား ပြန်လည်ရုပ်သိမ်းခဲ့ကြသည်။
စွပ်စွဲခံ မြန်မာလူငယ် ၂ဦးဘက်မှ လိုက်ပါဆောင်ရွက်နေသည့် တရားခံရှေ့နေများအနေနှင့် တရားလိုဘက်မှ တင်ပြမည့် သက်သေအထောက်အထားများအား ကြည့်ရှုခွင့် မပေးဘဲ လျောက်လဲချက်ကို ဒီဇင်ဘာ ၁၈ရက်နေ့ နောက်ဆုံးထားပြီး ၇ရက် အတွင်း ရုံးတော်သို့ တင်ပေးရမည်ဆိုသော ထိုင်းတရားရုံး၏ လုပ်ထုံးများအပေါ် လူ့အခွင့်အရေးအဖွဲ့အစည်းများက စိုးရိမ်ပူပန်မိကြောင်း ထုတ်ဖော်ပြောကြားထားသည်။
News Watch(စောင့်ကြည့်သတင်းဂျာနယ်)
No comments:
Post a Comment