Wednesday, April 8, 2015

ရွေးကောက်ပွဲ အောင်မြင်ဖို့နဲ့ ဖွဲ့စည်းပုံပြင်ဖို့ ဘယ်ဟာ ပိုအရေးကြီးသလဲ

၂၀၁၅ ခုနှစ် နှစ်ဝက်အတွင်းသို့ ဝင်ရောက်လာတော့မည်ဖြစ်ရာ မြန်မာနိုင်ငံအတွက် အရေးကြီးအကြောင်းအရာနှစ်ခု သို့တည်းမဟုတ် မလုပ်မဖြစ် လုပ်ရမည့် အကြောင်းအရာနှစ်ခုရှိလာသည်။ ထိုအချက်နှစ်ခုမှာ ဖွဲ့စည်းပုံပြင်ဆင်ရေးနှင့် ၂၀၁၅ ရွေးကောက်ပွဲ ကျင်းပနိုင်ရေးပင်ဖြစ်သည်။

ဦးသိန်းစိန် ဦးဆောင်သည့် အစိုးရက သူ၏သက်တမ်းအတွင်း ၂၀၁၅ ရွေးကောက်ပွဲကို အောင်မြင်စွာကျင်းပနိုင်ရန် လိုလားလျက်ရှိနေသည်ကို မလွဲမသွေတွေ့မြင်ရမည်ဖြစ်သည်။ သမ္မတ သာမက၊ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ကလည်း ၂၀၁၅ နှစ်ကုန်ပိုင်းတွင် ကျင်းပရန်ရှိသည့် အထွေထွေ ရွေးကောက်ပွဲကို မည်သည့်နည်းနှင့်မျှ အပျက်မခံနိုင်ဟု ထုတ်ဖေါ်ပြောဆိုလာသည်။


သို့သော် လက်ရှိအစိုးရသည် အထွေထွေ ရွေးကောက်ပွဲ ကျင်းပနိုင်ရန်အလွန်လိုလားလျက်ရှိပြီး အတိုက်အခံဟု ခေါ်ဆိုနိုင်သည့် ဒေါ်အောင်ဆန်းစုကြည် ဦးဆောင်သည့် အမျိုးသားဒီမိုကရေစီအဖွဲ့ချုပ်ကမူ ဖွဲ့စည်းပုံပြင်ဆင်နိုင်ရေးကို ရည်မှန်းချက် ကြီးကြီးမားမား ထားရှိသည်။
ဧပြီလ ၈ ရက်တွင် သမ္မတ၊ ကာကွယ်ရေးဦးစီးချုပ်၊ လွှတ်တော်ဥက္ကဋ္ဌများ၊ ဒေါ်အောင်ဆန်းစုကြည်၊ တိုင်းရင်းသားကိုယ်စားလှယ် ဒေါက်တာအေးမောင်အပါအဝင် နိုင်ငံရေးပါတီမှ ခေါင်းဆောင်များ တွေ့ဆုံမှုတွင် ရွေးကောက်ပွဲ အောင်မြင်စွာကျင်းပနိုင်ရေးနှင့် ရွေးကောက်ပွဲမကျင်းပမီ ကြားကာလ နိုင်ငံတည်ငြိမ်နိုင်ရေး ဆွေးနွေးကြမည်ဖြစ်သည်။ ဤအချင်းအရာကိုကြည့်ခြင်းဖြင့် ဦးသိန်းစိန် ဦးဆောင်သည့် အစိုးရသည် ရွေးကောက်ပွဲအပေါ် မည်မျှ အလေးအနက်ထားသည်ကို တွေ့မြင်နိုင်သည်။
အမျိုးသားဒီမိုကရေစီ အဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်ကမူ ဖွဲ့စည်းပုံမပြင်နိုင်ပါက ရွေးကောက်ပွဲသည် တရားမျှတသည့် ရွေးကောက်ပွဲ မဖြစ်နိုင်ဟု ပူပူနွေးနွေး ထုတ်ဖေါ်ပြောဆိုထားသည်။ အလားတူပင် ရွေးကောက်ပွဲကို သပိတ်မှောက်ကောင်း မှောက်နိုင်သည်ဟု ထုတ်ဖေါ်ပြောဆိုလာခဲ့သည်။ ယင်းနောက် ၄၈ ပွင့်ဆိုင် ဆွေးနွေးပွဲတွင် ရွေးကောက်ပွဲ အောင်မြင်စွာ ကျင်းပနိုင်ရန် ဆွေးနွေးမည်ဟု စီမံလာခဲ့သည့် လက်ရှိအစိုးရ၏ စီမံမှုသည် စိတ်ဝင်စားဖွယ်ကောင်းနေတော့သည်။
ဖွဲ့စည်းပုံပြင်ဆင်ရေးနှင့် ရွေးကောက်ပွဲကျင်းပနိုင်ရေးတို့က ရေမြေ့သခင်အစိုးရဟု မြန်မာ့ထုံးတမ်းအရ အရိုးစွဲနေသည့် လူ့အဖွဲ့အစည်းတစ်ခု၏ ခွင့်ပြုချက်ဖြင့်သာ ပြင်ဆင်နိုင်၊ ကျင်းပနိုင်သည့် အခြေအနေသို့ ရောက်နေသည့် အခြေအနေလည်း ဖြစ်နေသည်။ သို့ဆိုလျှင် ရွေးကောက်ပွဲ ကျင်းပနိုင်ရန်နှင့် ဖွဲ့စည်ပုံပြင်ရန် မည်သည်က အရေးကြီးပါသနည်း။
"နှစ်ခုလုံးအရေးကြီးတယ်၊ ပြည်သူတွေကို သနားပါ နောင်မျိုးဆက်တွေကို နှစ်ပေါင်းများစွာ စစ်ထဲမှာ တစ်ဖက်နဲ့ တစ်ဖက်အားပြိုင်တဲ့ ဆင်းရဲတွင်းထဲမှာ မနေရအောင် ဖွဲ့စည်းပုံကိုပြင်ပြီး ရွေးကောက်ပွဲကိုလုပ်ပေးရမယ်" ဟု ၈၈မျိုးဆက် ငြိမ်း/ပွင့်မှ ဦးဂျင်မီက ဆိုသည်။
၂၀၁၀ ရွေးကောက်ပွဲအပြီး တက်ရောက်လာသည့် ဦးသိန်းစိန်အစိုးရနှင့် ဦးရွှေမန်းဦးဆောင်သည့် လွှတ်တော်တို့က ဖွဲ့စည်းပုံကို ပြင်ဆင်သွားမည်ဟု အသီးသီး သံပြိုင်ဂတိပြုကာ အတိုက်အခံခေါင်းဆောင်ကို လွှတ်တော် အတွင်း ခေါ်သွင်းခဲ့သည်။
ယင်းဂတိက အစိုးရသက်တမ်းနှင့် အတူ လေးနှစ်အတွင်းကို ရောက်ရှိခဲ့သော်လည်း ဖွဲ့စည်းပုံပြင်ဆင်ရေးကမူ တိကျသည့် ဆုံဖြတ်ချက်များ လွှတ်တော်အတွင်း ယနေ့ထိ မရောက်လာသေးပေ။ ထို့အခြေအနေများကြောင့်ဟု သမ္မတသည် ယခင်က ရိုးသားသည် ယခုမူ မရိုးသားတော့ဟု ဒေါ်အောင်ဆန်းစုကြည် ထုတ်ဖေါ်ပြောဆိုခြင်းဟု တိတိပပ တွက်ဆမရနိုင်သော်လည်း မှန်းဆကြည့်နိုင်သည်။
ပြည်ထောင်စုလွှတ်တော် နာယက ဦးရွှေမန်း၏ ၂၀၁၅ မေလအတွင်း ပြည်သူ့ဆန္ဒခံယူပွဲကျင်းပပေးမည်၊ ပြင်ဆင်ပြီးသည့် ဖွဲ့စည်းပုံတစ်ရပ် လူထုထံသို့ အပ်နှင်းမည်ဆိုသည့် ကတိပင်လျှင် မှေးမှိန်နေသေးသည့် အခြေအနေရှိနေသည်။ ယင်းကား လွှတ်တော်က ဖွဲ့စည်းထားသည့် အခြေခံဥပဒေ ပြင်ဆင်ရေး ၃၁ဦး ကော်မတီ ၏ အစီရင်ခံစာက လွှတ်တော်တွင်းသို့ လုံးဝမရောက်လာသေးခြင်းကြောင့်ဟု နိုင်ငံရေး လေ့လာသူတို့က သုံးသပ်ကြသည်။
ဦးသိန်းစိန်အစိုးရကလည်း ဖွဲ့စည်းပုံပြင်ဆင်ရေးအတွက် နိုင်ငံထိပ်သီးခေါင်းဆောင်များ တွေ့ဆုံဆွေးနွေးမှုကို အမြဲပင် ငြင်းဆန်နေသေးသည်။ ထိရောက်သည့် ဆွေးနွေးမှုများထက် တစ်ဦး နှစ်မိနစ်ကျ ဆွေးနွေးရသည့် ၄၈ ပွင့်ဆိုင် တွေ့ဆုံဆွေးနွေးမှုကိုသာ လိုလိုလားလား ကျင်းပရန် ပြင်ဆင်နေသည်။ ၄၈ ပွင့်ဆိုင် ဆွေးနွေးမှု အစီအစဉ်များတွင် ရွေးကောက်ပွဲ ကျင်းပနိုင်ရန်သာ အလေးအနက်ထားပြီး ဖွဲ့စည်းပုံ ပြင်ဆင်ရေး မပါဝင်ပေ။
"ဖွဲ့စည်းပုံ၊ ၄၃၆မပြင်လို့ကတော့ ရွေးကောက်ပွဲကို ဘယ်လောက်တရားမျှတစွာ လုပ်လုပ် ဒီမိုကရေစီအစိုးရ ပေါ်လာမှာမဟုတ်ဘူး၊ ပြည်သူ့ကိုယ်စားလှယ် ၇၅ ရာခိုင်နှုန်းက တပ်က ၂၅ရာခိုင်နှုန်းကို ကြည့်ပြီးလုပ်နေရမှာပဲ၊ ဘယ်တော့မှ ဒီမိုကရေစီအစိုးရမပေါ်ဘူး" ဟု ဦးဂျင်မီက သုံးသပ်သည်။
၂၀၁၃ ခုနှစ် နှစ်လယ်မှာ စတင်ကာ အတိုက်အခံခေါင်းဆောင်နှင့် ဦးသိန်းစိန်းအစိုးရတို့ ဆက်ဆံရေးသည် ၂၀၁၂ခုနှစ်ကဲ့သို့ အဆင်ပြေသည့် ဆက်ဆံရေးမျိုး၏ အောက်ဆုံးနီးပါး အဆင့်သို့ ကျဆင်းလာနေသည်။
"၂၀၁၀နေအိမ်အကျယ်ချုပ်မှ လွတ်မြောက်စေခြင်းက အစိုးရနှင့် ပြန်လည်သင့်မြတ်စေပေမယ့် လက်ရှိ ဦးသိန်းစိန်အစိုးရက သဘောထား တင်းမာသူမျာဖြစ်တယ်" ဟု ရိုက်တာသတင်းဌာနကို အတိုက်အခံ ခေါင်းဆောင် ဖြေကြားသည့် အချက်က မီးမောင်းထိုးပြနေသည်။
သဘောထားတင်းမာသူ၊ ရိုးသားသူမဟုတ်တော့ ဟူသည့် စကားလုံးများဖြင့် အတိုက်အခံခေါင်းဆောင် ဒေါ်အောင်ဆန်းစုကြည်က ဖွဲ့စည်းပုံပြင်ရန် တောင်းဆိုနေသကဲ့သို့ "သဘောထားတင်းမာသူ" ဟု စွပ်စွဲခံရသည့် သမ္မတ ဦးသိန်းစိန်ကလည်း ရွေးကောက်ပွဲ အောင်မြင်စွာ ကျင်းပနိုင်ရန်သာ လိုလားနေပုံရသည်။
အကွဲအလွဲများရှိနေသည့် အစိုးရနှင့် အတိုက်အခံအကြား ပြည်သူနှင့် အတိုက်အခံတို့ တောင်းဆိုချက်များထက် အစိုးရ၏ ဆန္ဒအတိုင်းသာဆောင်ရွက်မည်လောကို ပြည်သူများအားလုံးက စောင့်ကြည့်ရမည်ဖြစ်သည်။ "အစိုးရ သူလုပ်ချင်တာ လုပ်လို့မရတာတော့ သေချာတယ်၊ ကျွန်တော်တို့တွေ ဒီမိုကရေစီကို ရအောင် နှစ်ပေါင်းများစွာ လုပ်လာတယ် အခုလဲလုပ်ရမှာပ်" ဟု ဦးဂျင်မီက ဆိုသည်။

၂၀၁၅ နှစ်အကုန်၏ မြန်မာ့နိုင်ငံရေးအခင်းအကျင်းသည် အလွန်စိတ်ဝင်စားဖွယ်ကောင်းနေပါသည်။ နိုင်ငံအတွက် အလွန်အရေးပါလှပြီး အလှည့်အပြောင်းဖြစ်စေမည့် အချင်းအရာနှစ်ရပ်ဖြစ်သော ဖွဲ့စည်းပုံပြင်ရေးနှင့် ရွေးကောက်ပွဲ ကျင်းပနိုင်ရေး မည်သည်က ပိုအရေးကြီးပါသနည်း။ "နှစ်ခုလုံးအရေးကြီးတယ်" " ဖွဲ့စည်းပုံကိုပြင်ပြီး ရွေးကောက်ပွဲကို လုပ်ပေးရမယ်" ဟု ဦးဂျင်မီက ဆိုထားသည်။ သို့သော် အချိန်နှင့် ဒီရေသည် လူကိုမစောင့်ဟူသည့် စကားပုံက အားလုံးကို သတိပေးနေသည်။
Mizzima 

No comments:

Post a Comment