Friday, September 14, 2012

မသွဲ့သွဲ့ဝင်း၊ မအေးနက်နှင့် မဖြူဖြူဝင်းတို့ ယနေ့ ညနေပိုင်းက ပြန်လည် လွတ်မြောက်လာ


  စစ်ကိုင်းတိုင်းဒေသကြီး မုံရွာခရိုင် ဆားလင်းကြီးမြို့နယ် လက်ပံတောင်းတောင် ကြေးနီစီမံကိန်းရွာများမှ မုံရွာမြို့သို့ ဘုရားဖူးသွားရောက်ရင်း ထိန်းသိမ်းခံခဲ့ရသော ၀က်မှေးရွာသူ အမျိုးသမီးသုံးဦးဖြစ်သည့် မသွဲ့သွဲ့ဝင်း၊ မအေးနက်နှင့် မဖြူဖြူဝင်းတို့ စက်တင်ဘာလ ၁၄ ရက်နေ့ ညနေပိုင်းတွင် ပြန်လည် လွတ်မြောက် လာခဲ့ကြောင်း သိရပါသည်။

မသွဲ့သွဲ့ဝင်း၊ မအေးနက်နှင့် မဖြူဖြူဝင်းတို့ အပါအ၀င် ၀က်မှေးနှင့် ရွှေလှေ ရွာမှ ကျေးရွာသူ ၁၂ ဦးသည် စစ်ကိုင်းတိုင်းဒေသကြီး မုံရွာခရိုင် ဆားလင်းကြီးမြို့နယ်အတွင်း မြန်မာ့စီးပွားရေးဦးပိုင်လီမိတက်နှင့် တရုတ်နိုင်ငံ ၀မ်ဘိုကုမ္ပဏီတို့ ပူးပေါင်းဆောင်ရွက်လျက်ရှိသည့် လက်ပံတောင်းတောင် ကြေးနီစီမံကိန်းကြောင့် သိမ်းဆည်းခံခဲ့ရသည့် ယာမြေဧက ၇၈၀၀ ကျော် ပြန်ရရေးနှင့် စီမံကိန်း ရပ်တန့်ပေးရန်အတွက် စက်တင်ဘာလ ၁၀ ရက်နေ့က မုံရွာမြို့ ဆုတောင်းပြည့်ဘုရားကြီးသို့ ၀တ်ပြုဆုတောင်းရန် သွားရောက်ရင်း ထိန်းသိမ်းခံခဲ့ရခြင်း ဖြစ်ပါသည်။

ထိန်းသိမ်းခံခဲ့ရသူ ၁၂ ဦးအနက် ၉ ဦးမှာ စက်တင်ဘာလ ၁၀ ရက်နေ့ ညနေပိုင်းက ပြန်လည် လွတ်မြောက်ခဲ့ပြီး မသွဲ့သွဲ့ဝင်း၊ မအေးနက်နှင့် မဖြူဖြူဝင်းတို့ကိုမူ ဆားလင်းကြီး မြို့နယ်ရဲစခန်းမှ ပ၁၇၈/၁၂၊ပုဒ်မ၄၅၂/ ၄၂၇/၂၉၄/၃၄၁ တို့ဖြင့် အမှုဖွင့် အရေးယူပြီး ဆက်လက်ထိန်းသိမ်းခဲ့ခြင်း ဖြစ်ပါသည်။

ကျေးရွာသူ ၁၂ ဦးကို ထိန်းသိမ်းခဲ့ခြင်းနှင့် ပတ်သက်ပြီး မုံရွာမြို့၌ ဆန္ဒပြမှုများ ဖြစ်ပေါ်ခဲ့ကာ ထိန်းသိမ်းထားသူများကို ပြန်လွှတ်ပေးရန် တောင်းဆိုမှုများ ရှိခဲ့ပါသည်။

ထို့အပြင် ပုလဲမြို့နယ် ပြည်သူ့လွှတ်တော် ကိုယ်စားလှယ် ဒေါ်ခင်စန်းလှိုင်က စစ်ကိုင်းတိုင်းဒေသကြီး ၀န်ကြီးချုပ် ဦးသာအေးအား စက်တင်ဘာလ ၁၂ ရက်နေ့တွင် ပထမအကြိမ် တွေ့ဆုံခဲ့ပြီး စက်တင်ဘာလ ၁၄ ရက်နေ့တွင် ဒုတိယ အကြိမ်တွေ့ဆုံကာ ထိန်းသိမ်းထားသူများကို ပြန်လွှတ်ပေးရန်နှင့် လက်ပံတောင်းတောင် ကြေးနီစီမံကိန်းရွာများနှင့် ပတ်သက်သော ကိစ္စရပ်များကို ဆွေးနွေးခဲ့ကြပါသည်။ ထို့အတူ မုံရွာခရိုင် ဗကသ ကျောင်းသားများနှင့် ၈၈ မျိုးဆက်ကျောင်းသားများ အဖွဲ့မှလည်း မုံရွာမြို့သို့ သွားရောက်ပြီး ထိန်းသိမ်းခံရသူများနှင့် ပတ်သက်သော အရေးကိစ္စများကိုလည်း ဆောင်ရွက်ခဲ့သည်။

ဝက်မှေးကျေးရွာသူ သုံးဦးဖြစ်သည့် မသွဲ့သွဲ့ဝင်း၊ မအေးနက်နှင့် မဖြူဖြူဝင်းတို့ ပြန်လည်လွတ်မြောက်လာသည့် နည်းတူ ပြည်သူ့ အကျိုးဆောင် ကွန်ယက်မှ ကိုဝေဠု လည်းပြန်လည် လွတ်မြောက်လာကြောင်း သိရပါသည်။ ကိုဝေဠုသည် သြဂုတ်လ နောက်ဆုံးပတ်အတွင်းက ကြေးနီစီမံကိန်းအတွက် ယာမြေဧက ၇၈၀၀ ကျော်သိမ်းဆီးခံခဲ့ရသည့် ကျေးရွာ ၂၆ ရွာမှ ရွာသူရွာသားများ၏ ဆန္ဒပြမှုတွင် ကူညီခဲ့သည့် ပြည်သူ့အကျိုးဆောင်ကွန်ယက်အဖွဲ့မှ အဖွဲ့ဝင် တစ်ဦး ဖြစ်ပါသည်။

ကိုဝေဠုအား ဖမ်းဆီးစဉ်က မည်သည့်ပြစ်မှုကြောင့် ဖမ်းဆီးထားသည်ဆိုသည်ကို သိရှိရခြင်းမရှိဘဲ စက်တင်ဘာလ ၃ ရက်နေ့မှသာ ဆားလင်းကြီးမြို့နယ်ရဲစခန်းက ပြစ်မှုအမှတ် ၂၀၆/၂၀၁၂၊ ဥပဒေပုဒ်မ ၂၉၅/ ၂၉၅(က)/၁၁၇ ဖြင့် အရေးယူထား ကြောင်း သိရှိခဲ့ရသည်။ ကိုဝေဠုသည် ရန်ကုန်မြို့တွင် ကျင်းပမည့် UN နှင့် တွေ့ဆုံဆွေးနွေပွဲတစ်ခုသို့ ယာမြေအသိမ်းခံတောင်သူများအား တက်ရောက်ရန် ခေါ်ဆောင်လာစဉ် ထိန်းသိမ်းခံခဲ့ရခြင်း ဖြစ်သည်။

No comments:

Post a Comment