မြန်မာနိုင်ငံတွင် လွတ်လပ်မှုများ တိုးတက်လာဟု Freedomhouse အဖွဲ့ ဖော်ပြ

 

၂၀၁၁-၂၀၁၂ ခုနှစ်အတွင်း မြန်မာနိုင်ငံတွင် နိုင်ငံရေးနှင့် လူမှုရေးလွတ်လပ်မှုများ တိုးတက်လာကြောင်း ကမ္ဘာ့နိုင်ငံများ၏ ယင်းလွတ်လပ်မှုနှစ်မျိုးကို တိုင်းတာဖော်ပြသော Freedomhouse အဖွဲ့က ထုတ်ပြန်လိုက်သည်။
မြန်မာနိုင်ငံသည် လွတ်လပ်မှု မရှိဟူသော အဆင့်သတ်မှတ်ချက်တွင်သာ ရှိနေသေးသော်လည်း ၂၀၁၂ အတွင်း ဒရာမာဆန်ဆန် အဖြစ်အပျက်များ ရှိခဲ့ပြီးနောက် နိုင်ငံရေးလွတ်လပ်ခွင့်တွင် အဆင့် ၇ မှ အဆင့် ၆ သို့ တိုးတက်ခဲ့ကာ အရပ်ဘက်လွတ်လပ်မှုတွင် အဆင့် ၆ မှ အဆင့် ၅ သို့ တိုးတက်ခဲ့သည်ဟု စာရင်းတွင် ဖော်ပြသည်။

အဆင့်သတ်မှတ်ချက်တွင် အဆင့် ၇ မှာ အဆိုးဆုံးဖြစ်သည်။ ၂၀၁၀-၂၀၁၁ အတွက် ထုတ်ပြန်ချက်တွင် အရပ်ဘက်လွတ်လပ်မှုတွင် ၇ မှ ၆ သို့ အဆင့်တက်ခဲ့ပြီး ယခုအကြိမ်တွင် နိုင်ငံရေးနှင့် အရပ်ဘက်လွတ်လပ်မှုတွင်ပါ အဆင့်တစ်ခုစီ တိုးလာခြင်းဖြစ်သည်။

အတိုက်အခံပါတီများ ကြားဖြတ်ရွေးကောက်ပွဲတွင် အောင်မြင်စွာ ပါဝင်ယှဉ်ပြိုင်နိုင်ခဲ့ခြင်း၊ မီဒီယာ၊ ပုဂ္ဂလိကတိုင်ပင်ဆွေးနွေးမှု၊ ပြည်သူလူထုစုဝေးမှု၊ အရပ်ဘက်လူ့အဖွဲ့အစည်း၊ ပုဂ္ဂလိကစီးပွားရေးလုပ်ငန်းများနှင့် အခြားလှုပ်ရှားမှုများအပေါ် ကာလကြာမြင့်စွာကပင် ထားရှိသော ကန့်သတ်ချက်များအား ဆက်လက်ဖြေလျှော့ပေးခြင်းများ ရှိခဲ့၍ အဆင့်သတ်မှတ်ချက် တိုးလာသည်ဟု Freedom in the World စာရင်းတွင် ကိုးကားဖော်ပြထားသည်။

-Ref: Foreign Policy