ရေနံနှင့် သဘာဝဓာတ်ငွေ့ ကဏ္ဍတွင် ပြည်ပမှ လာရောက်ရင်းနှီး မြှုပ်နှံမည့် ကုမ္ပဏီများနှင့် ပူးပေါင်းဆောင် ရွက်ရန် အတွက် စွမ်းအင်ဝန်ကြီးဌာနတွင် မှတ်ပုံတင်ထားသည့် မြန်မာကုမ္ပဏီများမှာ ဇွန် ၁၂ ရက်အထိ ၁၄၀ ကျော် ရှိပြီဖြစ်ကြောင်း စွမ်းအင်ဝန်ကြီးဌာန ထုတ်ပြန်ချက်အရ သိရသည်။
မြန်မာထိပ်တန်း စီးပွားရေး လုပ်ငန်းများဖြစ်သော ရွှေတောင်၊ ဧဒင်နှင့် IGE ကုမ္ပဏီတို့ အပါအ၀င် မြန်မာ ကုမ္ပဏီ ၁၄၀ ကျော် ရေနံနှင့် သဘာဝဓာတ်ငွေ့ ကဏ္ဍတွင် ရင်းနှီးမြှုပ်နှံရန် မှတ်ပုံတင်ပြီးဖြစ်ကြောင်း သိရှိရသည်။ ကမ္ဘောဇ၊ အေ၀မ်း၊ ပတ္တမြားနဂါး၊ တာမိုးညဲချမ်းသာ အစရှိသည့် ကုမ္ပဏီများလည်း မှတ်ပုံတင်ပြီးဖြစ်ကာ ဇွန် ၁၂ ရက်အထိ မှတ်ပုံတင်ထားသည့် ကုမ္ပဏီ စုစုပေါင်း ၁၄၅ ခုရှိကြောင်း သိရသည်။
၂၀၁၃ ခုနှစ် ဇန်န၀ါရီလအတွင်း ရေနံနှင့် သဘာဝဓာတ်ငွေ့ ကုန်တွင်းလုပ်ကွက် ၁၈ ကွက်ကို တင်ဒါခေါ်ယူ ခဲ့ပြီး ပြည်တွင်းပြည်ပ ကုမ္ပဏီများ လျှောက်ထားခဲ့ကြောင်း သိရပါသည်။ ကမ်းလွန်လုပ်ကွက်များကိုလည်း တင်ဒါခေါ်ယူ သွားမည်ဖြစ်ကြောင်း သိရသည်။
၂၀၁၂ ခုနှစ် နှစ်ဆန်းပိုင်းတွင်လည်း ကုန်းတွင်းရေနံနှင့် သဘာဝဓာတ်ငွေ့လုပ်ကွက် ၁၈ ကွက်ကို ပထမအကြိမ် ဈေးပြိုင်တင်ဒါ ခေါ်ယူခဲ့ပြီး နိုင်ငံပေါင်း ၁၈ နိုင်ငံမှ ကုမ္ပဏီ ၃၇ ခု အဆိုပြု တင်ပြခဲ့ပြီး ထိုကုမ္ပဏီ များအနက် ရှစ်ခုကို လုပ်ကွက် ၁၀ ကွက်တွင် ပြည်တွင်းပုဂ္ဂလိက ကုမ္ပဏီများနှင့် အကျိုးတူ ပူးပေါင်းကာ လုပ်ကိုင်ခွင့် ပြုခဲ့ပြီးဖြစ်သည်။
ရေနံနှင့် သဘာဝဓာတ်ငွေ့ကဏ္ဍ အကျိုးအမြတ် ပိုမိုရရှိစေရန် ကုန်းတွင်း၊ ကမ်းဝေး ရှာဖွေရေးပိုင်းကို အားစိုက်ဆောင်ရွက်ရန် ပြင်ဆင်နေပြီး ကမ်းလွန်ရေနံ ရှာဖွေရေး လုပ်ငန်းကို အသွင်ပြောင်း ဖွဲ့စည်းရန် ညှိနှိုင်းဆောင်ရွက်နေကြောင်း စွမ်းအင်ဝန်ကြီးဌာန၏ ထုတ်ပြန်ချက်များအရ သိရသည်။
လက်ရှိ မြန်မာနိုင်ငံတွင် နိုင်ငံခြား ရင်းနှီးမြှုပ်နှံမှုဖြင့် တူးဖော်ထုတ်လုပ် ရောင်းချနေသည့် ကမ်းလွန်ရေနံနှင့် သဘာဝဓာတ်ငွေ့ စီမံကိန်း နှစ်ခုရှိပြီး ရတနာနှင့် ရဲတံခွန်စီမံကိန်းတို့ ဖြစ်သည်။
ထို့ပြင် ယခုနှစ်အတွင်း ဇောတိကနှင့် ရွှေစီမံကိန်းမှ ထွက်ရှိသော သဘာဝဓာတ်ငွေ့များကို ထိုင်းနိုင်ငံနှင့် တရုတ်နိုင်ငံသို့ ပိုက်လိုင်းဖြင့် တင်ပို့ရောင်းချမည်ဖြစ်ကြောင်း သိရသည်။
Eleven
No comments:
Post a Comment