ပြည်ပဧည့်သည် ဝင်ရောက်မှု အများဆုံး စေတီတော်ဖြစ်သော ရွှေတိဂုံစေတီတော်၏ နိုင်ငံခြား ဧည့်ဝင်ကြေး ကို အောက်တိုဘာ လမှစ၍ တိုးမြှင့်ကောက်ခံမည် ဖြစ်ကြောင်း ယင်းစေတီတော်၏ ဂေါပကအဖွဲ့ဝင်တစ်ဦးဖြစ်သည့် ဦးဝင်းကြိုင်က ပြောကြားသည်။
တိုးမြှင့်ကောက်ခံရရှိသည့် ငွေများဖြင့် ရွှေတိဂုံစေတီတော်၏ ရင်ပြင်တော်ပေါ်ရှိ ထင်ရှားသော နေရာများနှင့် စေတီပုထိုး၊ ရုပ်ပွား ဆင်းတုတော်၊ ရုပ်တုနေရာများတွင် အင်္ဂလိပ်ဘာသာဖြင့် ဆိုင်းဘုတ်များ ရေးသားချိတ်ဆွဲခြင်း၊ ဘုရားသမိုင်းနှင့် စေတီလမ်းညွှန် စာအုပ်များကို အင်္ဂလိပ်ဘာသာဖြင့် အခမဲ့ဖြန့်ဝေပေးသွားခြင်းတို့ ပြုလုပ်မည်ဖြစ်ကြောင်း ဂေါပကအဖွဲ့၏ ထုတ်ပြန်ချက်အရ သိရသည်။
ရွှေတိဂုံစေတီတော် အပါအဝင် အခြားယဉ်ကျေးမှု ဇုန်များဖြစ်သော ပုဂံ၊ အင်းလေးဇုန်တို့တွင်လည်း ဧည့်ဝင်ကြေးများ တိုးမြှင့်ကောက် ခံလိုက်ခြင်းကြောင့် ယဉ်ကျေးမှုဇုန် အုပ်စုလိုက် ခရီးသွား လုပ်ငန်းများ အနည်းငယ် ထိခိုက်မှု ရှိကြောင်း Supreme Services Team (S.S.T) ခရီးသွားကုမ္ပဏီ အုပ်ချုပ်မှုဒါရိုက်တာ ဦးစောလှချစ်က ပြောကြားသည်။
“ဒီလိုတိုးကောက်မယ်ဆိုတာကို ကြိုတင်အကြောင်းကြားခဲ့တာ မရှိဘူး။ သတ်မှတ်ထားတဲ့ဈေးနဲ့ ကြိုရောင်းထားရတော့ အုပ်စုလိုက် လုပ်တဲ့ ကုမ္ပဏီတွေ ထိတာပေါ့။ ဧည့်သည်တွေကို မျက်နှာ အပျက်မခံနိုင်တော့ ဘယ်တတ်နိုင်မလဲ စိုက်ရမှာပေါ့” ဟု ၎င်းက ဆိုသည်။
လက်ရှိ ရွှေတိဂုံစေတီတော်သို့ နိုင်ငံခြားသားဧည့်သည် တစ်ရက်လျှင် ပျမ်းမျှ ၈၀၀ ခန့် ဝင်ရောက်လျက်ရှိပြီး ပြီးခဲ့သည့် ၂၀၁၂ ခုနှစ် အလားတူကာလအတွင်း တစ်ရက်လျှင် နိုင်ငံခြားသား ခရီးသွားဧည့်သည် ပျမ်းမျှဦးရေ ၆၀၀ ခန့် ဝင်ရောက်မှု ရှိခဲ့ကြောင်း ဂေါပက အဖွဲ့ ထံမှ စုံစမ်းသိရှိရသည်။
ဟိန်းမြတ်စိုး
The Voice Weekly
No comments:
Post a Comment