ဒဂုံမြို့နယ် ကမ္ဘာအေး ဘုရားလမ်းပေါ်တွင် ဖေဖော်ဝါရီလ ၂၈ ရက် နံနက် ၁ နာရီခန့်က ယာဉ်စစ်ဆေးရေး ဆောင်ရွက်နေသော ဆိပ်ကမ်းမြို့နယ်မှ ယာဉ်ထိန်း တပ်ဖွဲ့ပိုင်ကားကို ကိုယ်ပိုင်ယာဉ် တစ်စီးက အရှိန်လွန်ပြီး ဝင်တိုက် ခဲ့သောကြောင့် ယာဉ်ထိန်းရဲ တပ်ဖွဲ့ဝင်သုံးဦး ထိခိုက်ဒဏ်ရာ ရရှိခဲ့ကြောင်း ရန်ကုန်တိုင်းဒေသကြီး ရဲတပ်ဖွဲ့မှူးရုံးမှ သိရှိရသည်။
ကြည့်မြင်တိုင်မြို့နယ် သီတာရပ်ကွက်တွင် နေထိုင်သော အသက် ၃၀ အရွယ် ကိုမျိုးမင်းဆန်း မောင်း လာသည့် Alphard အမျိုးအစား ကိုယ်ပိုင်ယာဉ်က ကမ္ဘာအေး ဘုရားလမ်းရှိ ကျောက်တိုင်မှတ်တိုင် အရောက် တွင် အရှိန်မထိန်းနိုင် ဖြစ်ပြီး ညာဘက်လမ်းဘေး၌ ရပ်ထားသော မာဇဒါဂျစ် အမျိုးအစား ယာဉ်ထိန်း တပ်ဖွဲ့ပိုင် ကားကို ဝင်တိုက်မိခဲ့ခြင်း ဖြစ်ကြောင်း ဒဂုံမြို့မရဲစခန်းမှ ရဲအရာရှိတစ်ဦးက ပြောကြားသည်။
“ယာဉ်စစ် တာဝန်ပြီးလို့ ယာဉ်ထိန်း ရဲအုပ်အပါအဝင် သုံးဦးက ကားပေါ်မှာ နားနေတုန်း နောက်ကနေ အရှိန်နဲ့ ဝင်တိုက်မိတာပါ။ ရဲသုံးဦးလုံး ကားကသံတိုင်တွေနဲ့ ဆောင့်မိပြီး ဦးခေါင်း၊ ရင်ဘတ်နဲ့ လက်တွေမှာ ဖူးရောင်ပေါက်ပြဲ ဒဏ်ရာတွေ ရခဲ့တာ” ဟု ၎င်းကဆက်လက် ပြောကြားသည်။
အဆိုပါ ယာဉ်တိုက်ခံရမှုကြောင့် ဆိပ်ကမ်းမြို့နယ် ယာဉ်ထိန်းတပ်စုမှ ရဲအုပ်မင်းစိုး၊ တပ်ကြပ် အောင်သန်းဦးနှင့် တပ်သား ကျော်စည်သူတို့ သုံးဦးကို ရန်ကုန် ပြည်သူ့ဆေးရုံကြီးသို့ တင်ပို့ ကုသထားပြီး ယာဉ်နှစ်စီးစလုံးမှာ ပျက်စီး ဆုံးရှုံးခဲ့ကြောင်း ဆိပ်ကမ်း မြို့မရဲစခန်းထံမှ စုံစမ်းသိရှိရသည်။ ယာဉ်ထိန်းရဲ တပ်ဖွဲ့ပိုင် မော်တော်ယာဉ်ကို ဝင်တိုက်မိသော ယာဉ်မောင်း ဖြစ်သူကို ဒဂုံမြို့မရဲစခန်းမှ ယာဉ်(ပ) ၁၀/၁၄၊ ပုဒ်မ ၂၇၉/၃၃၇/၃၃၈ ဖြင့် အမှုဖွင့်ပြီး စစ်ဆေးလျက် ရှိကြောင်း ရန်ကုန်တိုင်းဒေသကြီး ရဲတပ်ဖွဲ့မှူးရုံးထံမှ သိရှိရသည်။
The Voice Weekly
No comments:
Post a Comment