ကချင်ပြည်နယ် တနိုင်းမြို့နယ်အတွင်းရှိ ပယင်းမှော်နှင့် အခြားမှော်များ၌ အလုပ်လုပ် ကိုင်နေသော မှော်သူ မှော်သား များအား KIA အဖွဲ့မှ မောင်းထုတ်လျက်ရှိရာ ဧပြီ ၇ ရက်နေ့တွင် ဇီးဖြူကုန်းမှော်၌ လမ်းစရိတ် မရှိ၍ မပြန်နိုင်သော မှော်သူမှော်သားများအား လူသစ်အဖြစ် ဖမ်းဆီးခေါ်ဆောင်သွားကြောင်း ယင်းမှော်သူမှော်သား များထံမှ သိရသည်။
တနိုင်းမြို့ပေါ်သို့ ပြန်လည်ဝင်ရောက်လာသော မှော်သူမှော်သားများမှာ တစ်သောင်းကျော်ခန့်ရှိနေပြီး အဆိုပါ မှော်များ၌ အလုပ်လုပ်ကိုင်နေသူများမှာ အင်အားတစ်သိန်းကျော်ခန့်ရှိသည် ဟုလည်း ဒေသခံမှော် လုပ်သား တစ်ဦးက ပြောသည်။
မတ်လ ၃၀ ရက်မှစ၍ ကချင်ပြည်နယ်တွင် သန်းခေါင်စာရင်းကောက်ယူလျက်ရှိရာ KIA မှ ၎င်းတို့၏ ထိန်းချုပ် နယ်မြေများ၌ ကောက်ယူခွင့်မပြုသည့်အပြင် ထိန်းချုပ်နယ်မြေမဟုတ်သော ကျေးရွာများအထိပါ လိုက်လံ ခြိမ်းခြောက်နေမှုကြောင့် တနိုင်းမြို့အနီးတွင် တိုက်ပွဲများ ဖြစ်ပွားနေကြောင်း သိရသည်။
`` KIA အဖွဲ့က ပထမတော့ ခြိမ်းခြောက်တားမြစ်တယ်၊ ဒီတော့ သန်းခေါင်စာရင်းကောက်မယ့် ၀န်ထမ်းတွေကို တပ်မတော်က လုံခြုံရေးလိုက်ပေးတယ်၊ နောက်တော့ KIA က ခြိမ်းခြောက်ရုံအဆင့်မဟုတ်ဘဲ ချောင်းပြီးပစ်လို့ တပ်မတော်က ဒုတပ်ရင်းမှူးတစ်ဦးကျသွားတယ်၊ လုံခြုံရေးရှိနေတာတောင် စိတ်မချရတော့ ကျွန်တော်တို့လည်း သန်းခေါင်စာရင်းကောက်သာနေရတယ်၊ ခပ်လန့်လန့်ပါပဲ ´´ ဟု မန်စီမြို့နယ်တွင် သန်းခေါင်စာရင်းလိုက်လံကောက်ယူနေသော ဆရာတစ်ဦးက ဆိုသည်။
KIA အဖွဲ့၏ ခြိမ်းခြောက်မောင်းထုတ်မှုကြောင့် တနိုင်းမြို့ပေါ်သို့ ရောက်လာကြသော မှော်သူမှော်သားများ သည် နေရပ်များသို့ ပြန်နေကြပြီဖြစ်သော်လည်း အချို့မိသားစုများမှာ လမ်းစရိတ်မရှိ၍ မှော်ထဲ၌ ဆက်လက် နေထိုင်ကြရကြောင်း တနိုင်းမြို့သို့ ရောက်လာသော မှော်လုပ်သားများထံမှ သိရသည်။
``အချို့က လမ်းစရိတ်မရှိလို့ မှော်ထဲမှာ ကျန်ခဲ့ကြတယ်၊ KIA က အတင်းမောင်းထုတ်တော့ လမ်းစရိတ်မရှိလို့ မပြန်နိုင်တဲ့အကြောင်း ပြောပါတယ်၊ ဒါပေမယ့် KIA အဖွဲ့က ထိုးကြိတ်ရိုက်နှက်ပြီး လူသစ်အဖြစ် ဖမ်းခေါ်သွား ပါတယ်၊ ကျွန်တော်တို့ မိသားစုတောင် ဇီးဖြူကုန်းမှော်ကနေ မနည်းလွတ်အောင် ထွက်ပြေးခဲ့ရတာ ´´ ဟု မိတ္ထီလာဘက်မှ လာရောက်လုပ်ကိုင်နေသော မှော်လုပ်သား ကိုကျော်ဌေး က ပြောသည်။
KIA အဖွဲ့မှ ဖမ်းဆီးခေါ်ဆောင်သွားသော မှော်သူမှော်သားများမှာ အင်အား(၃၀)ခန့်ရှိပြီး အဆိုပါမှော်ထဲ၌ မနေရဲတော့ပဲ တနိုင်းမြို့ပေါ်သို့ ဖြစ်သလို ပြေးလာကြရကြောင်း ၎င်းက ဆက်လက်ပြောကြားသွားသည်။
ကေကေ (တနိုင်း)
Photo. Internet
No comments:
Post a Comment