ရှမ်းပြည်နယ်အရှေ့ပိုင်း၏ မြို့တော် ကျိုင်းတုံမြို့၌ ဇန်နဝါရီလ ၂၇ ရက်နေ့က စတင်၍ သုံးရက်ကြာ ကျင်းပမည့် တတိယအကြိမ်မြောက် လားဟူ တိုင်းရင်းသားများ စုပေါင်းနှစ်သစ်ကူး ပွဲတော်တွင် ရုပ်ရှင်သရုပ်ဆောင် စိုးပြည့်သဇင် အပါအဝင် နိုင်ငံကျော်တေးသံရှင်များဖြင့် အခမဲ့ဖျော်ဖြေမည် ဖြစ်ကြောင်း ပွဲတော်ကျင်းပရေး ကော်မတီတို့ထံမှ သိရသည်။
ကျိုင်းတုံမြို့ ဟွေခါးကျေးရွာ လားဟူစာပေနှင့် ယဉ်ကျေးမှုရုံး၌ တတိယအကြိမ်မြောက် ကျင်းပမည့် ယင်းပွဲတော်ကို ဇန်နဝါရီလ ၂၇ ရက်မှ ၂၉ ရက်နေ့အထိ သုံးရက်ကြာ ကျင်းပမည် ဖြစ်ကြောင်း၊ ယင်းပွဲတော် ကာလအတွင်း လားဟူတိုင်းရင်းသား ရိုးရာအကများဖြင့် ဖျော်ဖြေမည့်အပြင် ဇန်နဝါရီလ ၂၉ ရက်နေ့၌ ရုပ်ရှင်သရုပ်ဆောင် စိုးပြည့်သဇင် အပါအဝင် နောနော်၊ အိုင်ရင်းဇင်မာမြင့်၊ ကောင်းကောင်း၊ အိုက်ထွန်းနှင့် Baung စသည့် နိုင်ငံကျော်တေးသံရှင်များဖြင့် အခမဲ့ဖျော်ဖြေပေးမည် ဖြစ်ကြောင်း ပွဲတော်ကျင်းပရေး ကော်မတီဝင်တစ်ဦးက ဆိုသည်။
“လားဟူတိုင်းရင်းသားတွေ အနေနဲ့ နှစ်သစ်ကူးပွဲတော်ကို ၁၉၇၃ ခုနှစ်က စပြီး နှစ်စဉ် ကျင်းပခဲ့တယ်။ လားဟူတိုင်းရင်းသား မျိုးနွယ်စုတွေ စုပေါင်းပြီး နှစ်သစ်ကူးပွဲတော်ကို လုပ်ဖြစ်တာ သုံးနှစ်ပဲ ရှိပါသေးတယ်။ ရှမ်းပြည်နယ် တောင်ပိုင်းနဲ့ မြောက်ပိုင်းမှာ နေထိုင်ကြတဲ့ လားဟူမျိုးနွယ်စုတွေပါ ဆင်နွှဲကြမှာပါ” ဟု လားဟူ တိုင်းရင်းသားရေးရာဝန်ကြီး ဦးရှာမွေလှရှဲန်က ပြောကြားသည်။
ရှမ်းပြည်နယ်အရှေ့ပိုင်း၌ အများဆုံး နေထိုင်သည့် လားဟူတိုင်းရင်းသား မျိုးနွယ်စုများ အနေနှင့် ယခင်နှစ်များက နှစ်သစ်ကူးပွဲတော်ကို ချယ်ရီပန်းများ ပွင့်ချိန်၌ ၎င်းတို့နေထိုင်ရာ ကျေးရွာများ၌သာ ကျင်းပခဲ့ပြီး ၁၉၇၃ ခုနှစ် နောက်ပိုင်းတွင် ပညာတတ် လားဟူ တိုင်းရင်းသားများ၏ ဆုံးဖြတ်ချက်ဖြင့် တပို့တွဲလဆန်း ၁ ရက်နေ့ကို လားဟူ တိုင်းရင်းသားတို့၏ နှစ်သစ်ကူးပွဲတော်ရက် အဖြစ် တရားဝင် သတ်မှတ်ခဲ့ကြောင်း ၎င်းက ရှင်းပြသည်။
“လားဟူတိုင်းရင်းသား မျိုးနွယ်စုမှာ လားဟူ (အဝါ) နဲ့ လားဟူ (အနက်) ဆိုပြီး မျိုးနွယ်စုကြီးနှစ်ခု ရှိတယ်။ လားဟူ (အဝါ) မှာက မျိုးနွယ်စုလေးစု ရှိပြီး လားဟူ (အနက်) မှာက မျိုးနွယ်စု ၂၀ ရှိတယ်” ဟု ဦးရှာမွေလှရှဲန်က ဆက်လက်ရှင်းပြသည်။
ပြည်နယ်အဆင့် ဌာနဆိုင်ရာ အဖွဲ့အစည်းများနှင့် တိုင်းစစ်ဌာနချုပ် အခြေစိုက်သည့် ကျိုင်းတုံမြို့တွင် နှစ်စဉ်နှစ်တိုင်း တိုင်းရင်းသားများ၏ နှစ်သစ်ကူးပွဲတော်များကို ကျိုင်းတုံ မြို့မအားကစားကွင်းကြီး အတွင်း၌ ကျင်းပကြောင်း၊ ယင်းပွဲတော်များ၌ နိုင်ငံကျော်တေးသံရှင်များ တစ်ကြိမ်မျှ ဖျော်ဖြေပေးဖူးခြင်း မရှိကြောင်း ကျိုင်းတုံမြို့ခံများက ပြောဆိုသည်။
The Voice Weekly
No comments:
Post a Comment