Tuesday, February 10, 2015

ဗိုလ်ချုပ်အောင်ဆန်းမွေးနေ့ နှစ် (၁၀၀) ပြည့်အခမ်းအနားကို လွှတ်တော်၌ကျင်းပမည်ဖြစ်ရာ တပ်မတော်ကာကွယ်ရေးဦးစီးချုပ်အပါအ၀င် နိုင်ငံတော်အဆင့်ပုဂ္ဂိုလ်များအား ဖိတ်ကြားထား



ဗိုလ်ချုပ်အောင်ဆန်းနှစ် (၁၀၀) ပြည့်မွေးနေ့အခမ်းအနားကို လွှတ်တော် တွင်ကျင်းပမည်ဖြစ်ပြီး တပ်မတော် ကာကွယ်ရေးဦးစီးချုပ်အပါအ၀င် နိုင်ငံတော်အဆင့်ပုဂ္ဂိုလ်များကို ဖိတ်ကြားထားကြောင်း သတင်းရရှိသည်။
နေပြည်တော်ရှိ လွှတ်တော်ဝင်းအတွင်း၌ ဖေဖော်ဝါရီ ၁၁ ရက် နံနက် ၉ နာရီမှစတင်ကာ ပြည်ထောင်စုလွှတ်တော် ဗိုလ်ချုပ်နှစ် (၁၀၀) ပြည့် မွေးနေ့ အခမ်းအနား စတင်ကျင်းပမည်ဖြစ်ကြောင်း သိရသည်။
ဖေဖော်ဝါရီ ၁၃ ရက်တွင်ကျရောက်မည့် လွတ်လပ်ရေးဗိသုကာ ဗိုလ်ချုပ် အောင်ဆန်း၏မွေးနေ့ နှစ် (၁၀၀) ပြည့်အခမ်းအနားကျင်းပရန် ပြည်ထောင် စုလွှတ်တော်ရုံးမှ ဗိုလ်ချုပ်နှစ် (၁၀၀) ပြည့်အခမ်းအနားကျင်းပရေး ဗဟို ကော်မတီကို ဖွဲ့စည်းထားသည်။
"ရည်ရွယ်ချက်ကတော့ ဗိုလ်ချုပ်အောင်ဆန်းက တို့နိုင်ငံရဲ့ နိုင်ငံသူ နိုင်ငံသားတွေရဲ့ အားလုံးရဲ့ရင်ထဲမှာ အမြဲရှိနေတဲ့ ထာဝရ အမျိုးသား ခေါင်းဆောင်ကြီးပဲလေ။ ဒီအမျိုးသားခေါင်းဆောင်ကြီးရဲ့ နှစ် (၁၀၀) ပြည့်မွေးနေ့မှာ ကြုံတောင့်ကြုံခဲ အန်ကယ်တို့ ဗိုလ်ချုပ်ကို အမှတ်တရ အဖြစ်နဲ့သော်လည်းကောင်း၊ ဗိုလ်ချုပ်မှာကြားခဲ့တဲ့ လမ်းညွှန်ချက်တွေ၊ သြ၀ါဒတွေကို လိုက်နာဆောင်ရွက်ဖို့လည်းကောင်း၊ နောက်ဗိုလ်ချုပ်ဟာ အသက်စွန့်ပြီးတော့ နိုင်ငံတော်ကို လွတ်လပ်ရေးရအောင် ဆောင်ရွက် ပေးသွားတဲ့ ပုဂ္ဂိုလ်ဖြစ်တဲ့အတွက် သူ့ကိုဂုဏ်ပြုတဲ့အနေနဲ့ အဲဒီအချက် တွေကြောင့် ဒီအခမ်းအနားကိုကျင်းပရခြင်းဖြစ်ပါတယ်" ဟု ဗိုလ်ချုပ်နှစ် (၁၀၀) ပြည့် အခမ်းအနားကျင်းပရေးဗဟိုကော်မတီဥက္ကဋ္ဌ သူရဦးအေးမြင့် ကပြောကြားသည်။

သူရဦးအေးမြင့်က "အဓိက,ကတော့ အားလုံးရဲ့ရင်ထဲအသည်းထဲမှာ ဗိုလ်ချုပ်ဆိုတာကို နှစ် (၁၀၀) ပြည့်မှာ ပြန်ပြီးတော့ ထင်ထင်ရှားရှား ပေါ်လာအောင် ဆောင်ရွက်လိုခြင်းဖြစ်ပါတယ်" ဟုဆိုသည်။
ဗိုလ်ချုပ်နှစ် (၁၀၀) ပြည့်အခမ်းအနားတွင် "အခုလုပ်နေတဲ့ ဗိုလ်ချုပ် ရဲ့မှတ် တမ်းရုပ်ရှင်ပေါ့လေ။ အဲဒါလေးကိုစုဆောင်း ထားပြီးတော့မှ ရှစ်မိနစ်၊ ကိုးမိနစ်စာလောက်ပြပါမယ်။ အဲဒါပြီးတဲ့နောက်မှာ ပြည်ထောင်စု လွှတ်တော်နာယကကြီး အမှာစကားပြောပါမယ်။ အဲဒါပြီးတဲ့နောက်မှာ ပါတီ ၁၉ ခုနဲ့ တပ်မတော် သားကိုယ်စား လှယ်ဆိုပြီးတော့ စုစုပေါင်းအဖွဲ့ ၂၀ ရှိပါတယ်။ အဲဒီ ၂၀ က ကိုယ်စားလှယ်တစ်ဦးစီ စာတမ်းဖတ်ပါမယ်။ ဗိုလ်ချုပ်နဲ့ပတ်သက်တဲ့ ဗိုလ်ချုပ်ရဲ့အမှတ်တရပေါ့။ အဲဒါကို ခြောက် မိနစ်စီ ဖတ်ပါမယ်" ဟု သူရဦးအေးမြင့် ကပြောကြားသည်။
လွှတ်တော်၌ကျင်းပမည့် ဗိုလ်ချုပ်အောင်ဆန်း၏မွေးနေ့ နှစ် (၁၀၀) ပြည့် အခမ်းအနားသို့ တပ်မတော် ကာကွယ်ရေး ဦးစီးချုပ်၊ ပြည်ထောင်စု တရား သူကြီးချုပ်၊ နိုင်ငံတော်ဖွဲ့စည်းပုံအခြေခံဥပဒေဆိုင်ရာ ခုံးရုံးဥက္ကဋ္ဌ စသည့် နိုင်ငံတော်အဆင့်ပုဂ္ဂိုလ်များကို ဖိတ်ကြားထားကြောင်း သတင်း ရရှိသည်။
"တပ်မတော်ကာကွယ်ရေးဦးစီးချုပ်ကိုလည်းဖိတ်ထားတယ်။ တခြား နိုင်ငံတော်အဆင့်တွေလည်း အကုန်လုံး ဖိတ်ထားတယ်။ တရားသူကြီးချုပ်တို့၊ ရှေ့နေချုပ်တို့ နောက် ဒီခုံရုံးဥက္ကဋ္ဌတို့ပေါ့ကွာ။ တက်ဖို့၊ မတက်ဖို့ကတော့ ပြန် Confirm တော့မလာသေးဘူး။ သမ္မတကြီးကိုဖိတ်တာတော့မသိဘူး။ အဲဒါတော့ တို့ကော်မတီအဆင့် လောက်ကဖိတ်လို့မရဘူး" ဟု ဗိုလ်ချုပ်နှစ် (၁၀၀) ပြည့်အခမ်းအနားကျင်းပရေး ဗဟိုကော်မတီမှအဖွဲ့ဝင် ဦးစောလှထွန်း ကပြောကြားသည်။
"အဘဗိုလ်ချုပ်ကမှာသွားတယ်။ တို့နိုင်ငံကြီးတိုးတက်ဖို့၊ ကိုယ်ကျိုးတွေစွန့် အကုန်လုံးစည်းလုံးညီညွတ်ဖို့၊ စည်းလုံးညီညွတ်မှသာလျှင် အောင်မြင်မယ် ဆိုတာကို သက်သေသာဓကတွေနဲ့ မိန့်ကြားသွားတာတွေ အများကြီးကြား ခဲ့ဖူးပါတယ်။ ဒါကြောင့် ဒီအချိန်မှာတော့ ကျွန်တော်တို့တိုင်းသူပြည် သားအား လုံး၊ တိုင်းရင်းသားပြည်သူအားလုံးဟာ စည်းစည်းလုံးလုံး ညီညီညွတ်ညွတ်နဲ့ ကိုယ့်အမိနိုင်ငံတော်ကြီးတိုးတက်အောင်၊ ဖွံ့ဖြိုးအောင်၊ တည်ငြိမ် အေးချမ်းအောင် အားလုံးပူးပေါင်းဆောင်ရွက်သင့်ပြီလို့ ပြောချင်ပါတယ်" ဟု သူရဦးအေးမြင့်ကပြောကြားသည်။
ဗိုလ်ချုပ်အောင်ဆန်း၏မွေးနေ့ နှစ် (၁၀၀) ပြည့်အခမ်းအနားကို အစိုးရ ဘက်ကဆောင်ရွက်မှုများနှင့်ပတ်သက်၍ "ဒါလဲ သူတို့သဘောပေါ့နော်။ ဒါက ပြည်သူကဆုံးဖြတ်ရမှာပေါ့။ လုပ်သင့်မလုပ်သင့်ဆိုတာ ပြည်သူကသိပါတယ်။ လုပ်တာ၊ မလုပ်တာကတော့ ကာယကံရှင်တွေနဲ့ပဲဆိုင်တာပါပဲ" ဟု အမျိုး သားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်က မီဒီယာများ ကိုပြောကြားသည်။
Writer: 
ဝေယံဖြိုးဦး၊ မျိုးမင်းထက်

No comments:

Post a Comment