အယ်လ်ကေဒါအဖွဲ့က မြန်မာနိုင်ငံကို အကြမ်းဖက် တိုက်ခိုက်မည်ဟု ကြေညာပြီးနောက် ရခိုင်ပြည်နယ် မောင်တောခရိုင်ရှိ အရေးကြီး အဆောက်အအုံများကို ဗုံးဖောက်ခွဲမည်ဟု သတင်းများ ရရှိထားသဖြင့် လုံခြုံရေး သတိထားရန် မောင်တောခရိုင် အုပ်ချုပ်ရေးမှူးရုံးက ဌာနဆိုင်ရာများကို ညွှန်ကြားထားကြောင်း ခရိုင်အုပ်ချုပ်ရေးမှူးရုံးက ပေးပို့သည့် သတိပေးစာအရ သိရသည်။
ဘင်္ဂလားဒေ့ရှ်-မြန်မာနယ်စပ်တွင် အခြေပြု လှုပ်ရှားနေသည့် ရိုဟင်ဂျာ သွေးစည်းညီညွတ်ရေးအဖွဲ့ (RSO) အမည်ရ ဘင်္ဂါလီ လက်နက်ကိုင်အဖွဲ့သည် အကြမ်းဖက် စစ်သွေးကြွအဖွဲ့ အယ်လ်ကေဒါနှင့် ပူးပေါင်းကာ ယင်းသို့ လုပ်ဆောင်ရန် သတင်းရထားသည်ဟု ဆိုကာ စက်တင်ဘာလ ၅ ရက်နေ့က အစိုးရဌာနများကို ခရိုင်အုပ်ချုပ်ရေးမှူးရုံးက ပေးပို့သည့် သတိပေးစာတွင် ဖော်ပြသည်။
RSO များသည် ဒေသခံ ဘင်္ဂါလီများ ဟန်ဆောင်က အရေးကြီးသော အဆောက်အအုံများကို ဗုံးခွဲဖျက်ဆီးရန်၊ လတ်တလော တိုက်ခိုက်မှုများ ပြုလုပ်ရန်၊ ဌာနဆိုင်ရာ အကြီးအကဲများကို ဖမ်းဆီးရန် လုပ်ဆောင်မည်ဟု သတင်းများ ရရှိထားကြောင်း အဆိုပါ သတိပေးစာတွင် ဖော်ပြထားသည်။
အယ်လ်ကေဒါက မြန်မာနိုင်ငံကို အကြမ်းဖက် တိုက်ခိုက်မည်ဟု ပြောဆိုပြီးနောက် လုံခြုံရေး တိုးမြှင့်ဆောင်ရွက်နေကြောင်း မောင်တောမြို့နယ်တွင် တာဝန်ကျနေသည့် ရဲအရာရှိတစ်ဦးက ပြောကြား သည်။
“အရေးကြီးတဲ့ နေရာတွေကို အားဖြည့်ရွှေ့ပြောင်း လှုပ်ရှားကြတာ ဖြစ်ပါတယ်။ လက်နက်ကိုင်တွေရဲ့ လုပ်ထုံးလုပ်နည်း အရပေါ့” ဟု ၎င်းကဆိုသည်။
အယ်လ်ကေဒါအဖွဲ့က အကြမ်းဖက်မည်ဆိုသည့် သတင်းများ မထွက်ပေါ်ခင်ကပင် လုံခြုံရေး အစီအမံများကို လုပ်ဆောင်ထားပြီး အရေးကြီး အဆောက်အအုံများ ဖြစ်သည့် လျှပ်စစ်ဓာတ်အားပေးရေးရုံး အုပ်ချုပ်ရေးမှူး ရုံးတို့တွင် လုံခြုံရေး ချထားကြောင်း မောင်တောခရိုင် ရဲတပ်ဖွဲ့မှူး ဒုတိယရဲမှူးကြီး ရွှေသန်းက ပြောဆိုသည်။
“အုပ်ချုပ်ရေးမှူးရုံးတို့၊ EPC ရုံးတို့ကို လုံခြုံရေး ယူထားပါတယ်။ ရုံးတိုင်း လုံခြုံရေးယူဖို့က မလွယ်ဘူး။ လှည့်ကင်း လှည့်ပေးနေပါတယ်” ဟု ၎င်းက ရှင်းပြသည်။
ကျောင်းဆရာ ကျောင်းဆရာမများ အတွက်လည်း လုံခြုံရေး ဆောင်ရွက်ပေးနေကြောင်း၊ လတ်တလောတွင် အယ်လ်ကေဒါ၊ RSO အဖွဲ့များ လှုပ်ရှားမှု မရှိသေးကြောင်း ဒုတိယရဲမှူးကြီး ရွှေသန်းက ဆက်လက် ပြောကြားသည်။
(LC၊ ခင်မောင်အေး)
The Voice Weekly
No comments:
Post a Comment