ဂျပန်နိုင်ငံရှိ ကားစက်ရုံတစ်ခုတွင် လုပ်ငန်းခွင်ဝင်နေသည့် အလုပ်သင်ဝန်ထမ်းတစ်ဦး
ဂျပန်နိုင်ငံသို့ သင်တန်း သားလုပ်သားဖြင့်သွားရောက် လုပ်ကိုင်သော မြန်မာလုပ်သားများကို ဒုက္ခသည် အဖြစ် ခိုလှုံခွင့်မပြုရန် မြန်မာအေဂျင်စီအသင်းချုပ်က ဂျပန်နိုင်ငံလူဝင်မှုကြီးကြပ်ရေးဌာနသို့ တောင်းဆို ထားကြောင်း ပြည်ပအလုပ်အကိုင်ဝန် ဆောင်မှုလုပ်ငန်းရှင်များအသင်းချုပ်မှ အထွေထွေအတွင်းရေးမှူး ဦးကျော်ထင်ကျော်ကပြောသည်။
ပြီးခဲ့သည့် ၂၀၁၃ခုနှစ်မှစ၍ ဂျပန်နိုင်ငံသို့ မြန်မာအလုပ်သမား သွားရောက်မှုကို ထပ်မံစေလွှတ် ခွင့်ပြု ပြီးနောက် နှစ်နိုင်ငံသဘော တူစာချုပ်လက်မှတ်ရေးထိုးကာ လုပ်သားများစေလွှတ်လျက်ရှိသည်။ ယင်းကဲ့ သို့ စေလွှတ်လျက် ရှိသည့်အနက် အလုပ်သမား ၃၅ ရာခိုင်နှုန်းခန့်မှာ လုပ်ငန်းခွင်မှ ထွက်ပြေးပြီး နိုင်ငံရေး ခိုလှုံခွင့် တောင်းကာ ဒုက္ခသည်အဖြစ် နေ ထိုင်မှုများရှိနေသည်။
‘‘ဟိုမှာ ဒုက္ခသည်ခိုလှုံမယ်ဆိုရင် နေထိုင်ခွင့်မကျသေးခင် တရားဝင်အလုပ်လုပ်နေခွင့်ရှိတယ်။ အဲဒါ ဒီကနေ သင်တန်းသားလုပ်သားနဲ့ သွားတဲ့သူတွေ ဒုက္ခသည်အဖြစ် နေထိုင်ခွင့်ရ အောင်လျှောက်ကြ တယ်။ အဲဒါကို လက်မခံဖို့ငါတို့အဖွဲ့က ဂျပန်လ၀ကညွှန်မှူးကို ပြောတယ်။ သူတို့ကလာမယ့် ၂၀၁၅ မှာလွှတ် တော်ထဲတင်ပြမယ်။ သူတို့ဆီက ၀န်ကြီးတွေက လွှတ်တော်ထဲတင် ပြပြီး မဲခွဲဆုံးဖြတ်မှာပေါ့’’ဟု ဦး ကျော်ထင်ကျော်ကပြောသည်။
ယင်းဖြစ်စဉ်ကြောင့် ဂျပန်မှ အလုပ်သမားကမ်းလှမ်းခြင်းထပ် မံထိခိုက်မည်စိုးသောကြောင့် မြန်မာအလုပ်သမားဝန်ကြီးဌာန က အေဂျင်စီအသင်းချုပ်ကို ကြီးကြပ် ရန်ညွှန်ကြားထားသည်။ ထို့ ကြောင့် မြန်မာအေဂျင်စီအသင်း ချုပ်က ဂျပန်နိုင်ငံရှိ အလုပ်သမား ကာကွယ်စောင့်ရှောက်ရေးအဖွဲ့ Japan Myanmar Association (JMA)နှင့် နိုဝင်ဘာ ၂၇ရက်က နားလည်မှုစာချွန်လွှာလက်မှတ် ရေးထိုးခဲ့သည်။
ယင်းအဖွဲ့သည် ဂျပန်နိုင်ငံ အတွင်း တရားဝင်လာရောက် လုပ်ကိုင်သော မြန်မာအလုပ်သမားများ အကာ အကွယ်ရရှိရန်နှင့် အခက်အခဲရှိပါက ကူညီဆောင်ရွက်ပေးမည်ဟုသိရသည်။ထို့အပြင် ယခင်က ဂျပန် နိုင်ငံသို့ သွားရောက်လုပ်ကိုင်သော မြန်မာအလုပ်သမားအများစုသည် နိုင်ငံရေးခိုလှုံခွင့်လျှောက်ထားပြီး လုပ် ငန်းခွင်ထက်လစာပိုများသော ပြင်ပအလုပ်နေရာများသို့ ပြောင်းရွှေ့လုပ်ကိုင်ခြင်းကြောင့် ယခင် အစိုးရလက်ထက်တွင် လုပ်သားစေလွှတ်မှုကို ရပ်ဆိုင်းခဲ့ခြင်းဖြစ် သည်။
‘‘ဂျပန်က မြန်မာတွေလုပ် သားခေါ်ယူမယ့်အပိုင်းမှာ ထိခိုက် နိုင်တယ်။ အဲဒီလို တရားမ၀င် ထွက်ပြေးတဲ့ သူတွေကို ဂျပန်အစိုး ရက ရာခိုင်နှုန်းသတ်မှတ်ချက် တွေရှိတယ်။ အဲဒီကုမ္ပဏီတွေကိုလည်း ဂျပန်လ၀က က အမည်ပျက် စာရင်းအသွင်းခံရတယ်။ အလုပ် ရှင်တွေအတွက်လည်း ထိခိုက် တယ်’’ဟု ဂျပန်သို့ မြန်မာ လုပ်သားများစေလွှတ်မှု ၁၀နှစ်ကျော် အတွေ့အကြုံရှိသည့် ပန်ဒါပါဝါ အေဂျင်စီ မန်နေဂျင်းဒါရိုက်တာ ဦးတင်မြင့်ကပြောသည်။
7Day DAILY
No comments:
Post a Comment