အလုပ်ခန့်ထားမှုဆိုင်ရာသဘောတူစာချုပ်(အီးစီ)ကို ယနေ့အချိန်အထိ လုပ်သားဦးရေ နှစ်သိန်းခုနစ်သောင်းကျော်
ချုပ်ဆိုထားပြီးဖြစ်ကြောင်း သတင်းရရှိသည်။
အဆိုပါအီးစီစာချုပ်ကို စက်တင်ဘာမှစ၍ ချုပ်ဆိုစေခဲ့ပြီး တစ်လအတွင်း အပြီးချုပ်ဆိုရန်ဖြစ်သော်လည်း အလုပ်ရှင်၊ အလုပ်သမားစာချုပ်ပါအချက်အလက်များနှင့်ပတ်သက်ပြီး ညှိနှိုင်းမှုများအချိန်ယူပြုလုပ်နေရ၍ ကြန့်ကြာမှုအချို့ရှိခဲ့ရကြောင်း အလုပ်သမားညွှန်ကြားမှုဦးစီးဌာနညွှန်ကြားရေးမှူးချုပ် ဦးမျိုးအောင်က ပြောသည်။
မြန်မာနိုင်ငံတွင် စက်ရုံအလုပ်ရုံပေါင်း တစ်သောင်းကျော်ရှိပြီး လုပ်သားဦးရေသန်းချီရှိနေ၍ လေးလတာအတွင်း အီးစီစာချုပ်ချုပ်ဆိုနိုင်မှုအရေအတွက်မှာ တစ်နိုင်ငံလုံးအတိုင်းအတာဖြင့် နည်းနေသေးသည်ဟု အလုပ်သမားအရေးလှုပ်ရှားသူများက ဆိုသည်။
‘‘တချို့စက်ရုံတွေမှာ ညှိမရလို့ ကြန့်ကြာနေတာတွေရှိနေသေးပေမယ့် တချို့အလုပ်သမားတွေကျတော့ ရွေးကောက်ပွဲအပြီးမှာ အနိုင်ရတဲ့ပါတီကို မျှော်လင့်ပြီး အသာတကြည်လက်မှတ်ထိုးပေးလိုက်ကြတာတွေရှိတယ်’’ဟု အလုပ်သမားအရေးလှုပ်ရှားသူဒေါ် မျိုးမျိုးအေးကပြောသည်။
အဆိုပါစာချုပ်သည် အလုပ်ရှင်နှင့်အလုပ်သမားတစ်ဦးချင်းစီအလိုက် လက်မှတ်ရေးထိုးချုပ်ဆိုရသော စာချုပ်ဖြစ်ပြီး ယခင်ကဲ့သို့ လုပ်သားအားလုံးစုပေါင်းချုပ်ဆိုသည့် စာချုပ်မဟုတ်သည့်အတွက် တစ်ဦးချင်းညှိနှိုင်းမှုများပြုလုပ်နေရခြင်းကြောင့် အချိန်ကြာမြင့်မှုရှိ နေခြင်းလည်းဖြစ်သည်ဟုအလုပ်သမား၊ အလုပ်အကိုင်နှင့် လူမှုဖူလုံရေးဝန်ကြီးဌာနပြည်ထောင်စုဝန်ကြီးက
ဆိုသည်။
အီးစီစာချုပ်ကို သတ်မှတ်အချိန်ကာလအတွင်းချုပ်ဆိုနိုင်ခြင်းမရှိပါက အလုပ်ရှင်၊ အလုပ်သမားအား ဥပဒေနှင့်အညီအရေးယူ ဆောင်ရွက်မှုပြုလုပ်နိုင်သော်လည်း အရေးယူဆောင်ရွက်သည့် အဆင့်သို့သွားဦးမည်မဟုတ်ဟု ၎င်းကပြောသည်။
အလုပ်ရှင်အနေဖြင့်အလုပ်သမားအား အလုပ်တစ်ခုခန့်ထားပြီးပါက ရက်ပေါင်း ၃၀အတွင်းအလုပ်ခန့်ထားမှုဆိုင်ရာသဘောတူ စာချုပ်ချုပ်ဆိုသွားရမည်ဟု အလုပ်အကိုင်နှင့်ကျွမ်းကျင်မှုဖွံ့ဖြိုး တိုးတက်ရေးဥပဒေတွင်ပြဋ္ဌာန်းထားသည်။
ထိုသို့သတ်မှတ်ကာလအတွင်း စာချုပ်ချုပ်ဆိုရန် ပျက်ကွက်ပါက ခြောက်လထက်မပိုသော ထောင်ဒဏ်ဖြစ်စေ၊
ငွေဒဏ်ဖြစ်စေ၊ဒဏ်နှစ်ရပ်လုံးဖြစ်စေချမှတ်နိုင်သည်ဟု ယင်းဥပဒေ၌ ဖော်ပြထားသည်။
ထို့အပြင် စာချုပ်ပါစည်းကမ်းချက်များ ဖောက်ဖျက်ပါက သုံးလထက်မပိုသော ထောင်ဒဏ်ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးစဖြစ်စေချမှတ်နိုင်သည်ဟု ဆက်လက်ပါရှိသည်။
7 day
No comments:
Post a Comment