မိမိတို့နိုင်ငံတွင် တွေ့ဆုံဆွေးနွေးခြင်းဖြင့် နိုင်ငံရေးပြဿနာများကို အဖြေရှာကြမည်ဟူသော ကြွေးကြော်သံမှာ ယခုတလော ရှေ့တန်းကို ပိုပြီးရောက်လာနေသည်ဟု ဆိုရပါမည်။ ကောင်းပါသည်။ ကြိုဆိုရမည်သာ ဖြစ်ပြီး မင်္ဂလာရှိသော ကြွေးကြော်သံ အဖြစ်လည်း သံသယဖြစ်စရာ မရှိပါ။
သို့သော် တွေ့ဆုံဆွေးနွေးပွဲ ပုံသဏ္ဌာန်များက ရှုပ်ထွေးနေသည်ဟု ယူဆရပါသည်။ ဆွေးနွေးပွဲများ အတွက် ဦးဆောင်ဆွေးနွေးဖို့ ကြိုးစားသည့် အဖွဲ့အစည်းများ ပုဂ္ဂိုလ်များကလည်း အမျိုးမျိုးဖြစ်နေသည်။ ပို၍ ဆိုးသည်မှာ တစ်ဦးတစ်ယောက် သို့မဟုတ် အဖွဲ့အစည်းတစ်ခုခုက ဦးစီးဦးရွက်ပြုပြီး ပြုလုပ်သည့် တွေ့ဆုံ ဆွေးနွေးပွဲကို ကျန်သူများက ပြတ်သားရှင်းလင်းစွာ သဘောထားမပေးဘဲ၊ မိမိတို့ကလည်း နောက်ထပ် ဆွေးနွေးပွဲတစ်ခုကို ဦးဆောင်ဦးရွက်ပြုဖို့ ကြိုးစားနေကြသည့်ကိစ္စမှာ ပြည်သူများ နားလည်ရ ပိုမိုရှုပ်ထွေးအောင် လုပ်နေသလို ဖြစ်နေသည်ဟု ယူဆရပါမည်။ ဥပမာ ပေးရလျှင် မိမိတို့တိုင်းပြည် တွေ့ဆုံဆွေးနွေးရေး ကြိုးပမ်းမှုများမှာ ကျစ်လျစ်သိပ်သည်းပြီး ရိုးသားမှု အခြေခံအားနည်းသည့်အတွက် တစ်တော တစ် ကြက်ဖတွန်သလိုများ ဖြစ်နေသလားဟု မေးခွန်းထုတ်ရမလို ဖြစ်နေသည်။
မိမိတို့ပြည်သူများသည် နှစ်ပေါင်း ခြောက်ဆယ်ကျော် အနာ့ပဆုပ်လိုဖြစ်နေခဲ့သည့် တိုင်းပြည် နိုင်ငံရေး ပြဿနာများကို တစ်ကြိမ်တည်း တစ်နှစ်တည်းနှင့်တော့ ဖြေရှင်းလို့ မရနိုင်သည်ကို သိကြပါသည်။ သို့သော် နိုင်ငံရေးပြဿနာများကို အဓိက ဦးဆောင်ဖြေရှင်းကြရမည့်၊ ဆွေးနွေးညှိနှိုင်း အဖြေရှာကြရမည့်သူများသည် ပြည်သူတို့၏မျက်နှာ၊ တိုင်းပြည်မျက်နှာကိုငဲ့ကာ ရိုးသားပွင့်လင်း ရှင်းလင်းဖို့တော့ အမှန်တကယ်လိုအပ်ပါသည်။ ဦးဆောင်ဆွေးနွေး အဖြေရှာကြမည့် ခေါင်းဆောင်များ ရိုးသားဖြူစင်မှု တိုင်းပြည်အပေါ် စေတနာထားမှုနှင့် ပွင့်လင်းမြင်သာမှုအပေါ် မူတည်ကာ မိမိတို့တိုင်းပြည် ပြုပြင်ပြောင်းလဲရေးလုပ်ငန်းများ လျင်မြန်စွာ အောင်မြင်လာနိုင်မည်သာ ဖြစ်သည်။
ယခုဆိုလျှင် တွေ့ဆုံဆွေးနွေး အဖြေရှာဖို့ အဆိုတင်မှုများကလည်း ပုံသဏ္ဌာန် အမျိုးမျိုး ဖြစ်လာနေသည်။ တစ်နေရာက သည်လို ဆွေးနွေးသင့်သည်ဟု အဆိုတင် သွင်းချိန် နောက်တစ်နေရာက အခြား ဆွေးနွေးမှု ပုံသဏ္ဌာန်ကို ဇွတ်အတင်းရွေးချယ်ကာ ဆွေးနွေးပွဲကျင်းပဖို့ ကြိုးစားလာသည်။ သည်လိုနှင့် နှစ်ပွင့်ဆိုင်၊ လေးပွင့်ဆိုင်၊ ခြောက်ပွင့်ဆိုင်၊ ဆယ့်နှစ်ပွင့်ဆိုင်၊ ဆယ့်လေးပွင့်ဆိုင်၊ အခုတော့ လေးဆယ့်ရှစ်ပွင့်ဆိုင် အစ ရှိသဖြင့် အင်မတန် ရှုပ်ထွေးပြီး အများပြည်သူ မကြည်ညိုနိုင်လောက်အောင်၊ မလေးစားနိုင်လောက်အောင် ဆွေးနွေးမှုပုံသဏ္ဌာန်များ အမျိုးမျိုးဖြစ်လာသည့်အတွက် မိမိတို့ခေါင်းဆောင်များအတွင်း ရိုးသားမှုမှ ရှိပါသေး၏လောဟု မေးခွန်းထုတ်ရမလို အရုပ်ဆိုး အကျည်းတန်လာခဲ့ရပါသည်။
တွေ့ဆုံဆွေးနွေးမှုများ၏ ဦးတည်ချက်မှာ တိုင်းပြည်နှင့် လူမျိုးအကျိုးကို ရည်ရွယ်ပြီး မိမိတို့အတွင်း ရှုပ်ထွေး လျက်ရှိသော၊ ပဋိပက္ခဖြစ်လျက်ရှိသော ပြဿနာများကို ငြိမ်းချမ်းသည့်နည်းဖြင့် အဖြေရှာကြရန်ဖြစ်သည်။ အနှစ်သာရမှာ ရှုပ်နေသည်များကို ရှင်းအောင် ဆောင်ရွက်ကြရန်ဖြစ်သည်။ ပဋိပက္ခများကို ငြိမ်းစေရန်၊ လျော့ပါးစေရန် ဖြစ်သည်။ ယခုလို တစ်တောတစ်ကြက်ဖတွန်သည့်သဘော သူတလူ ငါတစ်မင်း တွေ့ဆုံ ဆွေးနွေးဖို့ကြိုးစားနေကြခြင်းသည် အပြန်အလှန် မယုံသင်္ကာဖြစ်မှုနှင့် အပြန်အလှန်လက်ဦးမှုယူရေး ဟူသည့် မူလဦးတည်ချက်ပျောက်စေသည့် အကျိုးရလဒ်များကိုသာ ဖိတ်ခေါ်ရာရောက်ပါသည်။ရှင်း အောင်ကြိုးပမ်းရာမရောက်ဘဲ ပိုမိုရှုပ်ထွေးစေသည့် တွေ့ဆုံဆွေးနွေးပွဲများသာ ဖြစ်လာနိုင်ပါသည်။
ထို့ကြောင့် မိမိတို့တိုင်းပြည်တာဝန်ရှိသူများသည် တွေ့ဆုံဆွေးနွေးပွဲများကို တိုင်းပြည်နှင့်လူမျိုးအကျိုး မျက်မှောက်ပြု ဦးတည်သည့် တွေ့ဆုံဆွေးနွေးပွဲ ပုံသဏ္ဌာန်များဖြစ်အောင် ကြိုးပမ်းကြဖို့ လိုအပ်ကြောင်းနှင့် မိမိတို့ပြည်သူများကလည်း မိမိတို့တိုင်းပြည်တွင် စစ်မှန်သော တွေ့ဆုံဆွေးနွေးပွဲများ ဖြစ်ပေါ်လာစေရေး လူထု နည်းလူထုဟန်ဖြင့် ဝိုင်းဝန်းတွန်းအားပေးကြဖို့ လိုအပ်ကြောင်း တိုက်တွန်း လိုက်ရပါသည်။
Mizzima
